৩০. ৱত্তনিদ্দেসো

ৱত্তন্তি –

২১৩. আগন্তুকো ন আৰামং, পৱিসে সউপাহনো;

সছত্তোগুণ্ঠিতো সীসে, কৰিত্ৱা ৱাপি চীৱৰং.

২১৪. পানীযেন ন ধোৱেয্য, পাদে ৱুড্ঢতৰেপি চ;

আৱাসিকেভিৱাদেয্য, পুচ্ছেয্য সযনাসনং.

২১৫. গমিকো পটিসামেত্ৱা, দাৰুমত্তিকভণ্ডকং;

ৱিহাৰঞ্চ থকেত্ৱান, আপুচ্ছ সযনাসনং.

২১৬. আপুচ্ছিতব্বে অসতি, সংগোপেত্ৱান সাধুকং;

পক্কমেয্যঞ্ঞথা তস্স, পক্কন্তুং ন চ কপ্পতি.

২১৭. আৱাসিকো পঞ্ঞাপেয্য, ৱুড্ঢাগন্তুস্স আসনং;

উপনিক্খিপে পাদোদ-প্পভুতিং পত্তচীৱৰং.

২১৮. পচ্চুগ্গন্ত্ৱান গণ্হেয্য, পানীযেন চ পুচ্ছযে;

আগন্তুকেভিৱাদেয্য, পঞ্ঞপে সযনাসনং.

২১৯. অজ্ঝাৱুত্থমৱুত্থং ৱা, গোচৰাগোচৰং ৱদে;

ৱচ্চপস্সাৱঠানানি, কতিকং সেক্খসম্মুতিং.

২২০. পৱেসনিক্খমে কালং, পৰিভোজিযপানিযং;

নিসিন্নোৱ নৱকস্স, এতং সব্বং সমুদ্দিসেতি.