১৪. ভূমিনিদ্দেসো

ভূমিযোতি –

১৩৬. সম্মুতুস্সাৱনন্তা চ, গোনিসাদী গহাপতি;

কপ্পিযা ভূমিযো যাসু, ৱুত্থং পক্কঞ্চ কপ্পতি.

১৩৭. ৱাসত্থায কতে গেহে, সঙ্ঘিকে ৱেকসন্তকে;

কপ্পিযা কুটি লদ্ধব্বা, সহসেয্যপ্পহোনকে.

১৩৮. গেহে সঙ্ঘস্স ৱেকস্স, কৰমানেৱমীৰযং;

পঠমিট্ঠকথম্ভাদিং, ঠপেয্যুস্সাৱনন্তিকা;

‘‘কপ্পিযকুটিং কৰোম, কপ্পিযকুটিং কৰোমা’’তি.

১৩৯. যেভুয্যেনাপৰিক্খিত্তো, আৰামো সকলোপি ৱা;

ৱুচ্চতে ‘‘গোনিসাদী’’তি, সম্মুতী সঙ্ঘসম্মতা.

১৪০. ভিক্খুং ঠপেত্ৱা অঞ্ঞেহি, দিন্নো তেসংৱ সন্তকো;

অত্থায কপ্পকুটিযা, গেহো গহপতী মতো.

১৪১. অকপ্পকুটিযা ৱুত্থসপ্পিআদীহি মিস্সিতং;

ৱজেয্য অন্তোৱুত্থত্তং, পুৰিমং কালিকদ্ৱযং.

১৪২. তেহেৱ ভিক্খুনা পক্কং, কপ্পতে যাৱজীৱিকং;

নিৰামিসংৱ সত্তাহং, সামিসে সামপাকতা.

১৪৩. উস্সাৱনন্তিকা যেহি, থম্ভাদীহি অধিট্ঠিতা;

তেসুযেৱাপনীতেসু, তদঞ্ঞেসুপি তিট্ঠতি.

১৪৪. সব্বেসু অপনীতেসু, ভৱে জহিতৱত্থুকা;

গোনিসাদী পৰিক্খিত্তে, সেসা ছদনৱিব্ভমাতি.