১৫. উপজ্ঝাচৰিযৱত্তনিদ্দেসো

উপজ্ঝাচৰিযৱত্তানীতি –

১৪৫. নিস্সাযুপজ্ঝাচৰিযে, ৱসমানো সুপেসলো;

দন্তকট্ঠাসনং তোযং, যাগুং কালে দদে সদা.

১৪৬. পত্তে ৱত্তং চৰে গাম-প্পৱেসে গমনাগমে;

আসনে পাদপীঠে চ, কথলোপাহনচীৱৰে.

১৪৭. পৰিভোজনীযপানীয-ৱচ্চপ্পস্সাৱঠানিসু;

ৱিহাৰসোধনে ৱত্তং, পুন পঞ্ঞাপনে তথা.

১৪৮. ন পপ্ফোটেয্য সোধেন্তো, পটিৱাতে চ সঙ্গণে;

ৱিহাৰং ভিক্খু পানীয-সামন্তা সযনাসনং.

১৪৯. ন্হানে ন্হাতস্স কাতব্বে, ৰঙ্গপাকে চ ধোৱনে;

সিব্বনে চীৱৰে থেৱে, ৰজন্তো ন ৱজে ঠিতে.

১৫০. একচ্চস্স অনাপুচ্ছা, পত্তং ৱা চীৱৰানি ৱা;

ন দদেয্য ন গণ্হেয্য, পৰিক্খাৰঞ্চ কিঞ্চনং.

১৫১. একচ্চং পচ্ছতো কাতুং, গন্তুং ৱা তস্স পচ্ছতো;

পিণ্ডপাতঞ্চ নিন্নেতুং, নীহৰাপেতুমত্তনো.

১৫২. কিচ্চযং পৰিকম্মং ৱা, কেসচ্ছেদঞ্চ অত্তনো;

কাৰাপেতুং ৱ কাতুং ৱা, অনাপুচ্ছা ন ৱট্টতি.

১৫৩. গামং সুসানং নিস্সীমং, দিসং ৱা গন্তুমিচ্ছতো;

অত্তনো কিচ্চযং ৱাপি, অনাপুচ্ছা ন ৱট্টতি.

১৫৪. উপ্পন্নং অৰতিং দিট্ঠিং, কুক্কুচ্চং ৱা ৱিনোদযে;

কৰেয্য ৱাপি উস্সুক্কং, সঙ্ঘাযত্তেসু কম্মসু.

১৫৫. গিলানেসু উপট্ঠেয্য, ৱুট্ঠানং নেসমাগমে;

ৱত্তভেদেন সব্বত্থ, অনাদৰেন দুক্কটন্তি.