১৩. সমণকপ্পনিদ্দেসো

সমণকপ্পাতি –

১২৫. ভূতগামসমাৰম্ভে, পাচিত্তি কতকপ্পিযং;

নখেন ৱাগ্গিসত্থেহি, ভৱে সমণকপ্পিযং.

১২৬. স মূলখন্ধবীজগ্গ-ফড়ুবীজপ্পভাৱিতো;

আৰম্ভে দুক্কটং বীজং, ভূতগামৱিযোজিতং.

১২৭. নিব্বট্টবীজং নোবীজ-মকতঞ্চাপি কপ্পতি;

কটাহবদ্ধবীজানি, বহিদ্ধা ৱাপি কাৰযে.

১২৮. একাবদ্ধেসু বীজেসু, ভাজনে ৱাপি ভূমিযং;

কতে চ কপ্পিযেকস্মিং, সব্বেস্ৱেৱ কতং ভৱে.

১২৯. নিক্খিত্তে কপ্পিযং কত্ৱা, মূলপণ্ণানি জাযৰুং;

কপ্পিযং পুন কাৰেয্য, ভূতগামো হি সো তদা.

১৩০. সপণ্ণো ৱা অপণ্ণো ৱা, সেৱালোদকসম্ভৱো;

চেতিযাদীসু সেৱালো, নিব্বট্টদ্ৱত্তিপত্তকো;

ভূতগামোৱ বীজম্পি, মূলপণ্ণে ৱিনিগ্গতে.

১৩১. ঘটাদিপিট্ঠে সেৱালো, মকুড়ং অহিছত্তকং;

দুক্কটস্সেৱ ৱত্থূনি, ফুল্লমব্যৱহাৰিকং.

১৩২. লাখানিয্যাসছত্তানি, অল্লৰুক্খে ৱিকোপিয;

গণ্হতো তত্থ পাচিত্তি, ছিন্দতো ৱাপি অক্খৰং.

১৩৩. পীড়েতুং নাড়িকেৰাদিং, দাৰুমক্কটকাদিনা;

ছিন্দিতুং গণ্ঠিকং কাতুং, তিণাদিং ন চ কপ্পতি.

১৩৪. ভূতগামং ৱ বীজং ৱা, ছিন্দ ভিন্দোচিনাহি ৱা;

ফালেহি ৱিজ্ঝ পচ ৱা, নিযমেত্ৱা ন ভাসযে.

১৩৫. ইমং কৰোহি কপ্পিযং, ইমং গণ্হেদমাহৰ;

ইমং দেহি ইমং সোধেহেৱং ৱট্টতি ভাসিতুন্তি.