১. পাৰাজিকনিদ্দেসো

পাৰাজিকা চ চত্তাৰোতি –

১. মগ্গত্তযে অনিক্খিত্তসিক্খো সন্থতসন্থতে;

অল্লোকাসে নিমিত্তং সং, তিলমত্তম্পি সন্থতং.

২. অসন্থতমুপাদিণ্ণং, পৱেসন্তো চুতোথ ৱা;

পৱেসনট্ঠিতুদ্ধাৰপৱিট্ঠক্খণসাদকো.

৩. আদিযেয্য হৰেয্যাৱহৰেয্য ইৰিযাপথং;

কোপেয্য ঠানা চাৱেয্য, সঙ্কেতং ৱীতিনামযে.

৪. অদিন্নং থেয্যচিত্তেন, ভৱে পাৰাজিকোথ ৱা;

থেয্যাবলকুসচ্ছন্নপৰিকপ্পাৱহাৰকো;

ভণ্ডকালগ্ঘদেসেহি, পৰিভোগেত্থ নিচ্ছযো.

৫. মনুস্সৱিগ্গহং চিচ্চ, জীৱিতা ৱা ৱিযোজযে;

সত্থহাৰকং ৱাস্স মৰণচেতনো উপনিক্খিপে.

৬. গাহেয্য মৰণূপাযং, ৱদেয্য মৰণে গুণং;

চুতো পযোগা সাহত্থিনিস্সগ্গাণত্তিথাৱৰা.

৭. ইদ্ধিৱিজ্জামযা কালৱত্থাৱুধিৰিযাপথা;

ক্ৰিযাৱিসেসো ওকাসো, ছ আণত্তিনিযামকা.

৮. ঝানাদিভেদ নোসন্তমত্তনত্তুপনাযিকং;

কত্ৱা কোট্ঠাসমেকেকং, পচ্চুপ্পন্নভৱস্সিতং.

৯. অঞ্ঞাপদেসৰহিতং, দীপেন্তোনধিমানিকো;

কাযেন ৱাচা ৱিঞ্ঞত্তি-পথে ঞাতে চুতো ভৱে.

১০. পাৰাজিকেতে চত্তাৰো, অসংৱাসা যথা পুৰে;

অভব্বা ভিক্খুভাৱায, সীসচ্ছিন্নোৱ জীৱিতুং.

১১. পৰিযাযো চ আণত্তি, ততিযে দুতিযে পন;

আণত্তিযেৱ সেসেসু, দ্ৱযমেতং ন লব্ভতি.

১২. সেৱেতুকামতাচিত্তং, মগ্গে মগ্গপ্পৱেসনং;

ইমং মেথুনধম্মস্স, আহু অঙ্গদ্ৱযং বুধা.

১৩. মনুস্সসং তথাসঞ্ঞী, থেয্যচিত্তঞ্চ ৱত্থুনো;

গৰুতা অৱহাৰো চ, অদিন্নাদানহেতুযো.

১৪. পাণো মানুস্সকো পাণ-সঞ্ঞিতা ঘাতচেতনা;

পযোগো তেন মৰণং, পঞ্চেতে ৱধহেতুযো.

১৫. অসন্ততা অত্তনি পাপমিচ্ছতা-

যাৰোচনা তস্স মনুস্সজাতিতা;

নাঞ্ঞাপদেসো চ তদেৱ জাননং,

পঞ্চেত্থ অঙ্গানি অসন্তদীপনে.

১৬. অসাধাৰণা চত্তাৰো, ভিক্খুনীনমভব্বকা;

একাদস চ ৱিব্ভন্তা, ভিক্খুনী মুদুপিট্ঠিকো.

১৭. লম্বী মুখেন গণ্হন্তো, অঙ্গজাতং পৰস্স চ;

তত্থেৱাভিনিসীদন্তো, চত্তাৰো অনুলোমিকা.

১৮. মগ্গে মগ্গপ্পৱেসনা, মেথুনস্স ইধাগতা;

চত্তাৰোতি চতুব্বীস, সমোধানা পৰাজিকাতি.