২. সঙ্ঘাদিসেসনিদ্দেসো

গৰুকা নৱাতি –

১৯. মোচেতুকামতা সুক্ক-স্সুপক্কম্ম ৱিমোচযং;

অঞ্ঞত্ৰ সুপিনন্তেন, সমণো গৰুকং ফুসে.

২০. ইত্থিসঞ্ঞী মনুস্সিত্থিং, কাযসংসগ্গৰাগৱা;

সম্ফুসন্তো উপক্কম্ম, সমণো গৰুকং ফুসে.

২১. তথা সুণন্তিং ৱিঞ্ঞুঞ্চ, মগ্গং ৱাৰব্ভ মেথুনং;

দুট্ঠুল্লৱাচাৰাগেন, ওভাসেত্ৱা গৰুং ফুসে.

২২. ৱত্ৱাত্তকামুপট্ঠান-ৱণ্ণং মেথুনৰাগিনো;

ৱাচা মেথুনযুত্তেন, গৰুং মেথুনযাচনে.

২৩. পটিগ্গহেত্ৱা সন্দেসং, ইত্থিযা পুৰিসস্স ৱা;

ৱীমংসিত্ৱা হৰং পচ্চা, সমণো গৰুকং ফুসে.

২৪. সংযাচিতপৰিক্খাৰং, কত্ৱাদেসিতৱত্থুকং;

কুটিং পমাণাতিক্কন্তং, অত্তুদ্দেসং গৰুং ফুসে.

২৫. মহল্লকং ৱিহাৰং ৱা, কত্ৱাদেসিতৱত্থুকং;

অত্তনো ৱসনত্থায, সমণো গৰুকং ফুসে.

২৬. অমূলকেন চোদেন্তো, চোদাপেন্তোৱ ৱত্থুনা;

অন্তিমেন চ চাৱেতুং, সুণমানং গৰুং ফুসে.

২৭. অঞ্ঞস্স কিৰিযং দিস্ৱা, তেন লেসেন চোদযং;

ৱত্থুনা অন্তিমেনাঞ্ঞং, চাৱেতুং গৰুকং ফুসে.

২৮. ছাদেতি জানমাপন্নং, পৰিৱসেয্য তাৱতা;

চৰেয্য সঙ্ঘে মানত্তং, পৰিৱুত্থো ছ ৰত্তিযো.

চিণ্ণমানত্তমব্ভেয্য, তং সঙ্ঘো ৱীসতীগণো.

২৯. আপত্তিনুক্খিত্তমনন্তৰায

পহুত্ততাযো তথসঞ্ঞিতা চ;

ছাদেতুকামো অথ ছাদনাতি,

ছন্না দসঙ্গেহ্যৰুণুগ্গমম্হীতি.