সেখিযকণ্ডং

সেখিযেসু সতিপি ৱীতিক্কমে অনাদৰিযাপেক্খস্সেৱ আপত্তীতি দস্সনত্থং কাৰকো ন ৱুত্তো. অযঞ্হি ৱিনযধম্মতা, যদিদং সাপেক্খে কাৰকনিদ্দেসো, সো ৱুত্তনিযমে ৱিধি, ভুম্মকৰণঞ্চ. অট্ঠঙ্গুলাধিকম্পি ওতাৰেত্ৱা নিৱাসেতুং ৱট্টতি. ততো পৰং ওতাৰেন্তস্স দুক্কটন্তি মহাঅট্ঠকথাযং ৱুত্তং. আৰামে ৱাতি বুদ্ধুপট্ঠানাদিকালে. পাৰুপিতব্বন্তি উত্তৰাসঙ্গকিচ্চৱসেন ৱুত্তং.

ঠত্ৱাতি এত্থ গচ্ছন্তোপি পৰিস্সযাভাৱং ওলোকেতুং লভতিযেৱাতি (ৱজিৰ. টী. পাচিত্তিয ৫৮২) লিখিতং. যথা ৱাসূপগতস্স অন্তৰঘৰে কাযং ৱিৱৰিত্ৱা নিসীদিতুং ৱট্টতি, তথা তস্স সন্তিকে গন্তুকামস্সপি কাযবন্ধনং অবন্ধিত্ৱা সঙ্ঘাটিং অপাৰুপিত্ৱা গামপ্পৱেসনমনাৰোচেত্ৱা যথাকামং গন্তুং ৱট্টতি. তস্মা অদ্ধানমগ্গগমনকালে একো ভিক্খু গামপ্পৱেসনৱত্তং পূৰেত্ৱা গামং পৱিসিত্ৱা একং আৱসথং পুৰতোৱ ঠিতং পত্ৱা পৰিক্খাৰং ঠপেত্ৱা ৱাসূপগতো চে হোতি, ইতৰেহি তস্স সন্তিকং যথাসুখং গন্তুং ৱট্টতি. কো পন ৱাদো চতূহপঞ্চাহং ৱাসমধিট্ঠায ৱসিতভিক্খূনং সন্তিকং গন্তুঞ্চ ৱাসূপগতানং সন্তিকং গন্তুঞ্চ ৱট্টতীতি. বুদ্ধপূজম্পি যথাসুখং গন্তুং ৱট্টতি. ৱুত্তম্পি চেতং অট্ঠকথাযং ‘‘অনাপত্তি কাৰণং পটিচ্চ তহং তহং ওলোকেতী’’তি. তত্থ কাৰণং নাম আমিসপূজাতি ৱেদিতব্বাতি লিখিতং.

ছব্বীসতিসাৰুপ্পৱণ্ণনা নিট্ঠিতা.

যস্মা ‘‘সমতিত্তিকো পিণ্ডপাতো পটিগ্গহেতব্বো’’তি (পাচি. ৬০২-৬০৩) ৱচনং পিণ্ডপাতো সমপুণ্ণো পটিগ্গহেতব্বোতি দীপেতি, তস্মা অত্তনো হত্থগতে পত্তে পিণ্ডপাতো দিয্যমানো থূপীকতোপি চে হোতি, ৱট্টতীতি দীপিতো হোতি. সূপোদনৱিঞ্ঞত্তিযং মুখে পক্খিপিত্ৱা ৱিপ্পটিসাৰে উপ্পন্নে পুন উগ্গিৰিতুকামস্সাপি সহসা চে পৱিসতি, এত্থ অসঞ্চিচ্চ ভুঞ্জতি নাম. ৱিঞ্ঞত্তিকতঞ্চ অকতঞ্চ একস্মিং ঠানে ঠিতং সহসা অনুপধাৰেত্ৱা গহেত্ৱা ভুঞ্জতি, অস্সতিযা ভুঞ্জতি নাম.

সযং যানগতো হুত্ৱা, যথা যানগতস্স চে;

অলং ৱত্থুং তথা নালং, সছত্তো ছত্তপাণিনো.

‘‘সূপোদনৱিঞ্ঞত্তিসিক্খাপদং থেয্যসত্থসমুট্ঠানং, কিৰিযং, সঞ্ঞাৱিমোক্খং, সচিত্তকং, লোকৱজ্জং, কাযকম্মং, ৱচীকম্মং, অকুসলচিত্তং, দুক্খৱেদন’’ন্তি পাঠো.

সেখিযৱণ্ণনা নিট্ঠিতা.

ভিক্খুপাতিমোক্খৱণ্ণনা নিট্ঠিতা.

নমো তস্স ভগৱতো অৰহতো সম্মাসম্বুদ্ধস্স