ভিক্খুনীপাতিমোক্খপাড়ি

পুব্বকৰণং-৪

সম্মজ্জনী পদীপো চ, উদকং আসনেন চ;

উপোসথস্স এতানি, ‘‘পুব্বকৰণ’’ন্তি ৱুচ্চতি.

পুব্বকিচ্চং-৫

ছন্দ, পাৰিসুদ্ধি, উতুক্খানং, ভিক্খুনিগণনা চ ওৱাদো;

উপোসথস্স এতানি, ‘‘পুব্বকিচ্চ’’ন্তি ৱুচ্চতি.

পত্তকল্লঅঙ্গা-৪

উপোসথো, যাৱতিকা চ ভিক্খুনী কম্মপ্পত্তা;

সভাগাপত্তিযো চ ন ৱিজ্জন্তি;

ৱজ্জনীযা চ পুগ্গলা তস্মিং ন হোন্তি, ‘‘পত্তকল্ল’’ন্তি ৱুচ্চতি.

পুব্বকৰণপুব্বকিচ্চানি সমাপেত্ৱা দেসিতাপত্তিকস্স সমগ্গস্স ভিক্খুনিসঙ্ঘস্স অনুমতিযা পাতিমোক্খং উদ্দিসিতুং আৰাধনং কৰোম.

নিদানুদ্দেসো

সুণাতু মে অয্যে সঙ্ঘো, অজ্জুপোসথো পন্নৰসো, যদি সঙ্ঘস্স পত্তকল্লং, সঙ্ঘো উপোসথং কৰেয্য, পাতিমোক্খং উদ্দিসেয্য.

কিং সঙ্ঘস্স পুব্বকিচ্চং? পাৰিসুদ্ধিং অয্যাযো আৰোচেথ, পাতিমোক্খং উদ্দিসিস্সামি, তং সব্বাৱ সন্তা সাধুকং সুণোম মনসি কৰোম. যস্সা সিযা আপত্তি, সা আৱিকৰেয্য, অসন্তিযা আপত্তিযা তুণ্হী ভৱিতব্বং, তুণ্হীভাৱেন খো পনায্যাযো, ‘‘পৰিসুদ্ধা’’তি ৱেদিস্সামি. যথা খো পন পচ্চেকপুট্ঠস্সা ৱেয্যাকৰণং হোতি, এৱমেৱং এৱৰূপায পৰিসায যাৱততিযং অনুসাৱিতং হোতি. যা পন ভিক্খুনী যাৱততিযং অনুসাৱিযমানে সৰমানা সন্তিং আপত্তিং নাৱিকৰেয্য, সম্পজানমুসাৱাদস্সা হোতি. সম্পজানমুসাৱাদো খো পনায্যাযো, অন্তৰাযিকো ধম্মো ৱুত্তো ভগৱতা, তস্মা সৰমানায ভিক্খুনিযা আপন্নায ৱিসুদ্ধাপেক্খায সন্তী আপত্তি আৱিকাতব্বা, আৱিকতা হিস্সা ফাসু হোতি.

উদ্দিট্ঠং খো, অয্যাযো, নিদানং. তত্থায্যাযো পুচ্ছামি, কচ্চিত্থ পৰিসুদ্ধা, দুতিযম্পি পুচ্ছামি, কচ্চিত্থ পৰিসুদ্ধা, ততিযম্পি পুচ্ছামি, কচ্চিত্থ পৰিসুদ্ধা, পৰিসুদ্ধেত্থায্যাযো, তস্মা তুণ্হী, এৱমেতং ধাৰযামীতি.

নিদানং নিট্ঠিতং.

পাৰাজিকুদ্দেসো

তত্ৰিমে অট্ঠ পাৰাজিকা ধম্মা উদ্দেসং আগচ্ছন্তি.

মেথুনধম্মসিক্খাপদং

১. যা পন ভিক্খুনী ছন্দসো মেথুনং ধম্মং পটিসেৱেয্য, অন্তমসো তিৰচ্ছানগতেনপি, পাৰাজিকা হোতি অসংৱাসা.

অদিন্নাদানসিক্খাপদং

২. যা পন ভিক্খুনী গামা ৱা অৰঞ্ঞা ৱা অদিন্নং থেয্যসঙ্খাতং আদিযেয্য, যথাৰূপে অদিন্নাদানে ৰাজানো চোৰং গহেত্ৱা হনেয্যুং ৱা বন্ধেয্যুং ৱা পব্বাজেয্যুং ৱা চোৰাসি বালাসি মূড়্হাসি থেনাসীতি, তথাৰূপং ভিক্খুনী অদিন্নং আদিযমানা অযম্পি পাৰাজিকা হোতি অসংৱাসা.

মনুস্সৱিগ্গহসিক্খাপদং

৩. যা পন ভিক্খুনী সঞ্চিচ্চ মনুস্সৱিগ্গহং জীৱিতা ৱোৰোপেয্য, সত্থহাৰকং ৱাস্স পৰিযেসেয্য, মৰণৱণ্ণং ৱা সংৱণ্ণেয্য, মৰণায ৱা সমাদপেয্য ‘‘অম্ভো পুৰিস, কিং তুয্হিমিনা পাপকেন দুজ্জীৱিতেন, মতং তে জীৱিতা সেয্যো’’তি, ইতি চিত্তমনা চিত্তসঙ্কপ্পা অনেকপৰিযাযেন মৰণৱণ্ণং ৱা সংৱণ্ণেয্য, মৰণায ৱা সমাদপেয্য, অযম্পি পাৰাজিকা হোতি অসংৱাসা.

উত্তৰিমনুস্সধম্মসিক্খাপদং

৪. যা পন ভিক্খুনী অনভিজানং উত্তৰিমনুস্সধম্মং অত্তুপনাযিকং অলমৰিযঞাণদস্সনং সমুদাচৰেয্য ‘‘ইতি জানামি, ইতি পস্সামী’’তি, ততো অপৰেন সমযেন সমনুগ্গাহীযমানা ৱা অসমনুগ্গাহীযমানা ৱা আপন্না ৱিসুদ্ধাপেক্খা এৱং ৱদেয্য ‘‘অজানমেৱং, অয্যে, অৱচং জানামি, অপস্সং পস্সামি, তুচ্ছং মুসা ৱিলপি’’ন্তি, অঞ্ঞত্ৰ অধিমানা, অযম্পি পাৰাজিকা হোতি অসংৱাসা.

উব্ভজাণুমণ্ডলিকাসিক্খাপদং

৫. যা পন ভিক্খুনী অৱস্সুতা অৱস্সুতস্স পুৰিসপুগ্গলস্স, অধক্খকং উব্ভজাণুমণ্ডলং আমসনং ৱা পৰামসনং ৱা গহণং ৱা ছুপনং ৱা পটিপীড়নং ৱা সাদিযেয্য, অযম্পি পাৰাজিকা হোতি অসংৱাসা উব্ভজাণুমণ্ডলিকা.

ৱজ্জপ্পটিচ্ছাদিকাসিক্খাপদং

৬. যা পন ভিক্খুনী জানং পাৰাজিকং ধম্মং অজ্ঝাপন্নং ভিক্খুনিং নেৱত্তনা পটিচোদেয্য, ন গণস্স আৰোচেয্য, যদা চ সা ঠিতা ৱা অস্স চুতা ৱা নাসিতা ৱা অৱস্সটা ৱা, সা পচ্ছা এৱং ৱদেয্য ‘‘পুব্বেৱাহং, অয্যে, অঞ্ঞাসিং এতং ভিক্খুনিং ‘এৱৰূপা চ এৱৰূপা চ সা ভগিনী’তি, নো চ খো অত্তনা পটিচোদেস্সং, ন গণস্স আৰোচেস্স’’ন্তি, অযম্পি পাৰাজিকা হোতি অসংৱাসা ৱজ্জপ্পটিচ্ছাদিকা.

উক্খিত্তানুৱত্তিকাসিক্খাপদং

৭. যা পন ভিক্খুনী সমগ্গেন সঙ্ঘেন উক্খিত্তং ভিক্খুং ধম্মেন ৱিনযেন সত্থুসাসনেন অনাদৰং অপ্পটিকাৰং অকতসহাযং তমনুৱত্তেয্য, সা ভিক্খুনী ভিক্খুনীহি এৱমস্স ৱচনীযা ‘‘এসো খো, অয্যে, ভিক্খু সমগ্গেন সঙ্ঘেন উক্খিত্তো, ধম্মেন ৱিনযেন সত্থুসাসনেন অনাদৰো অপ্পটিকাৰো অকতসহাযো, মায্যে, এতং ভিক্খুং অনুৱত্তী’’তি, এৱঞ্চ সা ভিক্খুনী ভিক্খুনীহি ৱুচ্চমানা তথেৱ পগ্গণ্হেয্য, সা ভিক্খুনী ভিক্খুনীহি যাৱততিযং সমনুভাসিতব্বা তস্স পটিনিস্সগ্গায, যাৱততিযং চে সমনুভাসিযমানা তং পটিনিস্সজ্জেয্য, ইচ্চেতং কুসলং, নো চে পটিনিস্সজ্জেয্য, অযম্পি পাৰাজিকা হোতি অসংৱাসা উক্খিত্তানুৱত্তিকা.

অট্ঠৱত্থুকাসিক্খাপদং

৮. যা পন ভিক্খুনী অৱস্সুতা অৱস্সুতস্স পুৰিসপুগ্গলস্স হত্থগ্গহণং ৱা সাদিযেয্য, সঙ্ঘাটিকণ্ণগ্গহণং ৱা সাদিযেয্য, সন্তিট্ঠেয্য ৱা, সল্লপেয্য ৱা, সঙ্কেতং ৱা গচ্ছেয্য, পুৰিসস্স ৱা অব্ভাগমনং সাদিযেয্য, ছন্নং ৱা অনুপৱিসেয্য, কাযং ৱা তদত্থায উপসংহৰেয্য এতস্স অসদ্ধম্মস্স পটিসেৱনত্থায, অযম্পি পাৰাজিকা হোতি অসংৱাসা অট্ঠৱত্থুকা.

উদ্দিট্ঠা খো, অয্যাযো, অট্ঠ পাৰাজিকা ধম্মা. যেসং ভিক্খুনী অঞ্ঞতৰং ৱা অঞ্ঞতৰং ৱা আপজ্জিত্ৱা ন লভতি ভিক্খুনীহি সদ্ধিং সংৱাসং যথা পুৰে, তথা পচ্ছা, পাৰাজিকা হোতি অসংৱাসা. তত্থায্যাযো, পুচ্ছামি, কচ্চিত্থ পৰিসুদ্ধা, দুতিযম্পি পুচ্ছামি, কচ্চিত্থ পৰিসুদ্ধা, ততিযম্পি পুচ্ছামি, কচ্চিত্থ পৰিসুদ্ধা, পৰিসুদ্ধেত্থায্যাযো, তস্মা তুণ্হী, এৱমেতং ধাৰযামীতি.

পাৰাজিকং নিট্ঠিতং.

সঙ্ঘাদিসেসুদ্দেসো

ইমে খো পনায্যাযো সত্তৰস সঙ্ঘাদিসেসা

ধম্মা উদ্দেসং আগচ্ছন্তি.

উস্সযৱাদিকাসিক্খাপদং

১. যা পন ভিক্খুনী উস্সযৱাদিকা ৱিহৰেয্য গহপতিনা ৱা গহপতিপুত্তেন ৱা দাসেন ৱা কম্মকাৰেন ৱা অন্তমসো সমণপৰিব্বাজকেনাপি, অযম্পি ভিক্খুনী পঠমাপত্তিকং ধম্মং আপন্না নিস্সাৰণীযং সঙ্ঘাদিসেসং.

চোৰীৱুট্ঠাপিকাসিক্খাপদং

২. যা পন ভিক্খুনী জানং চোৰিং ৱজ্ঝং ৱিদিতং অনপলোকেত্ৱা ৰাজানং ৱা সঙ্ঘং ৱা গণং ৱা পূগং ৱা সেণিং ৱা, অঞ্ঞত্ৰ কপ্পা ৱুট্ঠাপেয্য, অযম্পি ভিক্খুনী পঠমাপত্তিকং ধম্মং আপন্না নিস্সাৰণীযং সঙ্ঘাদিসেসং.

একগামন্তৰগমনসিক্খাপদং

৩. যা পন ভিক্খুনী একা ৱা গামন্তৰং গচ্ছেয্য, একা ৱা নদীপাৰং গচ্ছেয্য, একা ৱা ৰত্তিং ৱিপ্পৱসেয্য, একা ৱা গণম্হা ওহিযেয্য, অযম্পি ভিক্খুনী পঠমাপত্তিকং ধম্মং আপন্না নিস্সাৰণীযং সঙ্ঘাদিসেসং.

উক্খিত্তকওসাৰণসিক্খাপদং

৪. যা পন ভিক্খুনী সমগ্গেন সঙ্ঘেন উক্খিত্তং ভিক্খুনিং ধম্মেন ৱিনযেন সত্থুসাসনেন অনপলোকেত্ৱা কাৰকসঙ্ঘং, অনঞ্ঞায গণস্স ছন্দং ওসাৰেয্য, অযম্পি ভিক্খুনী পঠমাপত্তিকং ধম্মং আপন্না নিস্সাৰণীযং সঙ্ঘাদিসেসং.

ভোজনপটিগ্গহণপঠমসিক্খাপদং

৫. যা পন ভিক্খুনী অৱস্সুতা অৱস্সুতস্স পুৰিসপুগ্গলস্স হত্থতো খাদনীযং ৱা, ভোজনীযং ৱা সহত্থা পটিগ্গহেত্ৱা খাদেয্য ৱা ভুঞ্জেয্য ৱা, অযম্পি ভিক্খুনী পঠমাপত্তিকং ধম্মং আপন্না নিস্সাৰণীযং সঙ্ঘাদিসেসং.

ভোজনপটিগ্গহণদুতিযসিক্খাপদং

৬. যা পন ভিক্খুনী এৱং ৱদেয্য ‘‘কিং তে, অয্যে, এসো পুৰিসপুগ্গলো কৰিস্সতি অৱস্সুতো ৱা অনৱস্সুতো ৱা, যতো ত্ৱং অনৱস্সুতা, ইঙ্ঘ, অয্যে, যং তে এসো পুৰিসপুগ্গলো দেতি খাদনীযং ৱা ভোজনীযং ৱা, তং ত্ৱং সহত্থা পটিগ্গহেত্ৱা খাদ ৱা ভুঞ্জ ৱা’’তি, অযম্পি ভিক্খুনী পঠমাপত্তিকং ধম্মং আপন্না নিস্সাৰণীযং সঙ্ঘাদিসেসং.

সঞ্চৰিত্তসিক্খাপদং

৭. যা পন ভিক্খুনী সঞ্চৰিত্তং সমাপজ্জেয্য ইত্থিযা ৱা পুৰিসমতিং, পুৰিসস্স ৱা ইত্থিমতিং, জাযত্তনে ৱা জাৰত্তনে ৱা অন্তমসো তঙ্খণিকাযপি, অযম্পি ভিক্খুনী পঠমাপত্তিকং ধম্মং আপন্না নিস্সাৰণীযং সঙ্ঘাদিসেসং.

দুট্ঠদোসসিক্খাপদং

৮. যা পন ভিক্খুনী ভিক্খুনিং দুট্ঠা দোসা অপ্পতীতা অমূলকেন পাৰাজিকেন ধম্মেন অনুদ্ধংসেয্য ‘‘অপ্পেৱ নাম নং ইমম্হা ব্ৰহ্মচৰিযা চাৱেয্য’’ন্তি, ততো অপৰেন সমযেন সমনুগ্গাহীযমানা ৱা অস মনুগ্গাহীযমানা ৱা অমূলকঞ্চেৱ তং অধিকৰণং হোতি, ভিক্খুনী চ দোসং পতিট্ঠাতি, অযম্পি ভিক্খুনী পঠমাপত্তিকং ধম্মং আপন্না নিস্সাৰণীযং সঙ্ঘাদিসেসং.

অঞ্ঞভাগিযসিক্খাপদং

৯. যা পন ভিক্খুনী ভিক্খুনিং দুট্ঠা দোসা অপ্পতীতা অঞ্ঞভাগিযস্স অধিকৰণস্স কিঞ্চিদেসং লেসমত্তং উপাদায পাৰাজিকেন ধম্মেন অনুদ্ধংসেয্য ‘‘অপ্পেৱ নাম নং ইমম্হা ব্ৰহ্মচৰিযা চাৱেয্য’’ন্তি, ততো অপৰেন সমযেন সমনুগ্গাহীযমানা ৱা অসমনুগ্গাহীযমানা ৱা অঞ্ঞভাগিযঞ্চেৱ তং অধিকৰণং হোতি. কোচিদেসো লেসমত্তো উপাদিন্নো, ভিক্খুনী চ দোসং পতিট্ঠাতি, অযম্পি ভিক্খুনী পঠমাপত্তিকং ধম্মং আপন্না নিস্সাৰণীযং সঙ্ঘাদিসেসং.

সিক্খংপচ্চাচিক্খণসিক্খাপদং

১০. যা পন ভিক্খুনী কুপিতা অনত্তমনা এৱং ৱদেয্য ‘‘বুদ্ধং পচ্চাচিক্খামি ধম্মং পচ্চাচিক্খামি, সঙ্ঘং পচ্চাচিক্খামি, সিক্খং পচ্চাচিক্খামি, কিন্নুমাৱ সমণিযো যা সমণিযো সক্যধীতৰো, সন্তঞ্ঞাপি সমণিযো লজ্জিনিযো কুক্কুচ্চিকা সিক্খাকামা, তাসাহং সন্তিকে ব্ৰহ্মচৰিযং চৰিস্সামী’’তি. সা ভিক্খুনী ভিক্খুনীহি এৱমস্স ৱচনীযা ‘‘মায্যে কুপিতা অনত্তমনা এৱং অৱচ ‘বুদ্ধং পচ্চাচিক্খামি, ধম্মং পচ্চাচিক্খামি, সঙ্ঘং পচ্চাচিক্খামি, সিক্খং পচ্চাচিক্খামি, কিন্নুমাৱ সমণিযো যা সমণিযো সক্যধীতৰো, সন্তঞ্ঞাপি সমণিযো লজ্জিনিযো কুক্কুচ্চিকা সিক্খাকামা, তাসাহং সন্তিকে ব্ৰহ্মচৰিযং চৰিস্সামী’তি, অভিৰমায্যে, স্ৱাক্খাতো ধম্মো, চৰ ব্ৰহ্মচৰিযং সম্মা দুক্খস্স অন্তকিৰিযাযা’’তি, এৱঞ্চ সা ভিক্খুনী ভিক্খুনীহি ৱুচ্চমানা তথেৱ পগ্গণ্হেয্য, সা ভিক্খুনী ভিক্খুনীহি যাৱততিযং সমনুভাসিতব্বা তস্স পটিনিস্সগ্গায, যাৱততিযঞ্চে সমনুভাসিযমানা তং পটিনিস্সজ্জেয্য, ইচ্চেতং কুসলং, নো চে পটিনিস্সজ্জেয্য, অযম্পি ভিক্খুনী যাৱততিযকং ধম্মং আপন্না নিস্সাৰণীযং সঙ্ঘাদিসেসং.

অধিকৰণকুপিতসিক্খাপদং

১১. যা পন ভিক্খুনী কিস্মিঞ্চিদেৱ অধিকৰণে পচ্চাকতা কুপিতা অনত্তমনা এৱং ৱদেয্য ‘‘ছন্দগামিনিযো চ ভিক্খুনিযো, দোসগামিনিযো চ ভিক্খুনিযো, মোহগামিনিযো চ ভিক্খুনিযো, ভযগামিনিযো চ ভিক্খুনিযো’’তি, সা ভিক্খুনী ভিক্খুনীহি এৱমস্স ৱচনীযা ‘‘মায্যে, কিস্মিঞ্চিদেৱ অধিকৰণে পচ্চাকতা কুপিতা অনত্তমনা এৱং অৱচ ‘ছন্দগামিনিযো চ ভিক্খুনিযো, দোসগামিনিযো চ ভিক্খুনিযো, মোহগামিনিযো চ ভিক্খুনিযো, ভযগামিনিযো চ ভিক্খুনিযো’তি, অয্যা খো ছন্দাপি গচ্ছেয্য, দোসাপি গচ্ছেয্য, মোহাপি গচ্ছেয্য, ভযাপি গচ্ছেয্যা’’তি. এৱঞ্চ সা ভিক্খুনী ভিক্খুনীহি ৱুচ্চমানা তথেৱ পগ্গণ্হেয্য, সা ভিক্খুনী ভিক্খুনীহি যাৱততিযং সমনুভাসিতব্বা তস্স পটিনিস্সগ্গায, যাৱততিযঞ্চে সমনুভাসিযমানা তং পটিনিস্সজ্জেয্য, ইচ্চেতং কুসলং, নো চে পটিনিস্সজ্জেয্য, অযম্পি ভিক্খুনী যাৱততিযকং ধম্মং আপন্না নিস্সাৰণীযং সঙ্ঘাদিসেসং.

পাপসমাচাৰপঠমসিক্খাপদং

১২. ভিক্খুনিযো পনেৱ সংসট্ঠা ৱিহৰন্তি পাপাচাৰা পাপসদ্দা পাপসিলোকা ভিক্খুনিসঙ্ঘস্স ৱিহেসিকা অঞ্ঞমঞ্ঞিস্সা ৱজ্জপ্পটিচ্ছাদিকা, তা ভিক্খুনিযো ভিক্খুনীহি এৱমস্সু ৱচনীযা ‘‘ভগিনিযো খো সংসট্ঠা ৱিহৰন্তি পাপাচাৰা পাপসদ্দা পাপসিলোকা ভিক্খুনিসঙ্ঘস্স ৱিহেসিকা অঞ্ঞমঞ্ঞিস্সা ৱজ্জপ্পটিচ্ছাদিকা, ৱিৱিচ্চথায্যে, ৱিৱেকঞ্ঞেৱ ভগিনীনং সঙ্ঘো ৱণ্ণেতী’’তি, এৱঞ্চ তা ভিক্খুনিযো ভিক্খুনীহি ৱুচ্চমানা তথেৱ পগ্গণ্হেয্যুং, তা ভিক্খুনিযো ভিক্খুনীহি যাৱততিযং সমনুভাসিতব্বা তস্স পটিনিস্সগ্গায, যাৱততিযঞ্চে সমনুভাসিযমানা তং পটিনিস্সজ্জেয্যুং, ইচ্চেতং কুসলং, নো চে পটিনিস্সজ্জেয্যুং, ইমাপি ভিক্খুনিযো যাৱততিযকং ধম্মং আপন্না নিস্সাৰণীযং সঙ্ঘাদিসেসং.

পাপসমাচাৰদুতিযসিক্খাপদং

১৩. যা পন ভিক্খুনী এৱং ৱদেয্য ‘‘সংসট্ঠাৱ, অয্যে, তুম্হে ৱিহৰথ, মা তুম্হে নানা ৱিহৰিত্থ, সন্তি সঙ্ঘে অঞ্ঞাপি ভিক্খুনিযো এৱাচাৰা এৱংসদ্দা এৱংসিলোকা ভিক্খুনিসঙ্ঘস্স ৱিহেসিকা অঞ্ঞমঞ্ঞিস্সা ৱজ্জপ্পটিচ্ছাদিকা, তা সঙ্ঘো ন কিঞ্চি আহ তুম্হঞ্ঞেৱ সঙ্ঘো উঞ্ঞায পৰিভৱেন অক্খন্তিযা ৱেভস্সিযা দুব্বল্যা এৱমাহ – ‘ভগিনিযো খো সংসট্ঠা ৱিহৰন্তি পাপাচাৰা পাপসদ্দা পাপসিলোকা ভিক্খুনিসঙ্ঘস্স ৱিহেসিকা অঞ্ঞমঞ্ঞিস্সা ৱজ্জপ্পটিচ্ছাদিকা, ৱিৱিচ্চথায্যে, ৱিৱেকঞ্ঞেৱ ভগিনীনং সঙ্ঘো ৱণ্ণেতী’’’তি, সা ভিক্খুনী ভিক্খুনীহি এৱমস্স ৱচনীযা ‘‘মায্যে, এৱং অৱচ, সংসট্ঠাৱ অয্যে তুম্হে ৱিহৰথ, মা তুম্হে নানা ৱিহৰিত্থ, সন্তি সঙ্ঘে অঞ্ঞাপি ভিক্খুনিযো এৱাচাৰা এৱংসদ্দা এৱংসিলোকা ভিক্খুনিসঙ্ঘস্স ৱিহেসিকা অঞ্ঞমঞ্ঞিস্সা ৱজ্জপ্পটিচ্ছাদিকা, তা সঙ্ঘো ন কিঞ্চি আহ, তুম্হঞ্ঞেৱ সঙ্ঘো উঞ্ঞায পৰিভৱেন অক্খন্তিযা ৱেভস্সিযা দুব্বল্যা এৱমাহ – ‘ভগিনিযো খো সংসট্ঠা ৱিহৰন্তি পাপাচাৰা পাপসদ্দা পাপসিলোকা ভিক্খুনিসঙ্ঘস্স ৱিহেসিকা অঞ্ঞমঞ্ঞিস্সা ৱজ্জপ্পটিচ্ছাদিকা, ৱিৱিচ্চথায্যে, ৱিৱেকঞ্ঞেৱ ভগিনীনং সঙ্ঘো ৱণ্ণেতী’’’তি, এৱঞ্চ সা ভিক্খুনী ভিক্খুনীহি ৱুচ্চমানা তথেৱ পগ্গণ্হেয্য, সা ভিক্খুনী ভিক্খুনীহি যাৱততিযং সমনুভাসিতব্বা তস্স পটিনিস্সগ্গায, যাৱততিযঞ্চে সমনুভাসিযমানা তং পটিনিস্সজ্জেয্য, ইচ্চেতং কুসলং, নো চে পটিনিস্সজ্জেয্য, অযম্পি ভিক্খুনী যাৱততিযকং ধম্মং আপন্না নিস্সাৰণীযং সঙ্ঘাদিসেসং.

সঙ্ঘভেদকসিক্খাপদং

১৪. যা পন ভিক্খুনী সমগ্গস্স সঙ্ঘস্স ভেদায পৰক্কমেয্য, ভেদনসংৱত্তনিকং ৱা অধিকৰণং সমাদায পগ্গয্হ তিট্ঠেয্য, সা ভিক্খুনী ভিক্খুনীহি এৱমস্স ৱচনীযা ‘‘মায্যা, সমগ্গস্স সঙ্ঘস্স ভেদায পৰক্কমি, ভেদনসংৱত্তনিকং ৱা অধিকৰণং সমাদায পগ্গয্হ অট্ঠাসি, সমেতায্যা, সঙ্ঘেন, সমগ্গো হি সঙ্ঘো সম্মোদমানো অৱিৱদমানো একুদ্দেসো ফাসু ৱিহৰতী’’তি. এৱঞ্চ সা ভিক্খুনী ভিক্খুনীহি ৱুচ্চমানা তথেৱ পগ্গণ্হেয্য, সা ভিক্খুনী ভিক্খুনীহি যাৱততিযং সমনুভাসিতব্বা তস্স পটিনিস্সগ্গায, যাৱততিযঞ্চে সমনুভাসিযমানা তং পটিনিস্সজ্জেয্য, ইচ্চেতং কুসলং. নো চে পটিনিস্সজ্জেয্য, অযম্পি ভিক্খুনী যাৱততিযকং ধম্মং আপন্না নিস্সাৰণীযং সঙ্ঘাদিসেসং.

ভেদানুৱত্তকসিক্খাপদং

১৫. তস্সাযেৱ খো পন ভিক্খুনিযা ভিক্খুনিযো হোন্তি অনুৱত্তিকা ৱগ্গৱাদিকা একা ৱা দ্ৱে ৱা তিস্সো ৱা, তা এৱং ৱদেয্যুং ‘‘মায্যাযো, এতং ভিক্খুনিং কিঞ্চি অৱচুত্থ ধম্মৱাদিনী চেসা ভিক্খুনী, ৱিনযৱাদিনী চেসা ভিক্খুনী, অম্হাকঞ্চেসা ভিক্খুনী ছন্দঞ্চ ৰুচিঞ্চ আদায ৱোহৰতি, জানাতি, নো ভাসতি, অম্হাকম্পেতং খমতী’’তি, তা ভিক্খুনিযো ভিক্খুনীহি এৱমস্সু ৱচনীযা ‘‘মায্যাযো, এৱং অৱচুত্থ, ন চেসা ভিক্খুনী ধম্মৱাদিনী, ন চেসা ভিক্খুনী ৱিনযৱাদিনী, মায্যানম্পি সঙ্ঘভেদো ৰুচ্চিত্থ, সমেতায্যানং সঙ্ঘেন, সমগ্গো হি সঙ্ঘো সম্মোদমানো অৱিৱদমানো একুদ্দেসো ফাসু ৱিহৰতী’’তি, এৱঞ্চ তা ভিক্খুনিযো ভিক্খুনীহি ৱুচ্চমানা তথেৱ পগ্গণ্হেয্যুং, তা ভিক্খুনিযো ভিক্খুনীহি যাৱততিযং সমনুভাসিতব্বা তস্স পটিনিস্সগ্গায, যাৱততিযঞ্চে সমনুভাসিযমানা তং পটিনিস্সজ্জেয্যুং. ইচ্চেতং কুসলং. নো চে পটিনিস্সজ্জেয্যুং, ইমাপি ভিক্খুনিযো যাৱততিযকং ধম্মং আপন্না নিস্সাৰণীযং সঙ্ঘাদিসেসং.

দুব্বচসিক্খাপদং

১৬. ভিক্খুনী পনেৱ দুব্বচজাতিকা হোতি উদ্দেসপৰিযাপন্নেসু সিক্খাপদেসু ভিক্খুনীহি সহধম্মিকং ৱুচ্চমানা অত্তানং অৱচনীযং কৰোতি ‘‘মা মং অয্যাযো কিঞ্চি অৱচুত্থ কল্যাণং ৱা পাপকং ৱা, অহম্পায্যাযো, ন কিঞ্চি ৱক্খামি কল্যাণং ৱা পাপকং ৱা, ৱিৰমথায্যাযো, মম ৱচনাযা’’তি, সা ভিক্খুনী ভিক্খুনীহি এৱমস্স ৱচনীযা ‘‘মায্যা, অত্তানং অৱচনীযং অকাসি, ৱচনীযমেৱ, অয্যা, অত্তানং কৰোতু, অয্যাপি ভিক্খুনিযো ৱদতু সহধম্মেন, ভিক্খুনিযোপি অয্যং ৱক্খন্তি সহধম্মেন, এৱং সংৱদ্ধা হি তস্স ভগৱতো পৰিসা যদিদং অঞ্ঞমঞ্ঞৱচনেন অঞ্ঞমঞ্ঞৱুট্ঠাপনেনা’’তি. এৱঞ্চ সা ভিক্খুনী ভিক্খুনীহি ৱুচ্চমানা তথেৱ পগ্গণ্হেয্য, সা ভিক্খুনী ভিক্খুনীহি যাৱততিযং সমনুভাসিতব্বা তস্স পটিনিস্সগ্গায, যাৱততিযঞ্চে সমনুভাসিযমানা তং পটিনিস্সজ্জেয্য, ইচ্চেতং কুসলং. নো চে পটিনিস্সজ্জেয্য, অযম্পি ভিক্খুনী যাৱততিযকং ধম্মং আপন্না নিস্সাৰণীযং সঙ্ঘাদিসেসং.

কুলদূসকসিক্খাপদং

১৭. ভিক্খুনী পনেৱ অঞ্ঞতৰং গামং ৱা নিগমং ৱা উপনিস্সায ৱিহৰতি কুলদূসিকা পাপসমাচাৰা, তস্সা খো পাপকা সমাচাৰা দিস্সন্তি চেৱ সুয্যন্তি চ, কুলানি চ তায দুট্ঠানি দিস্সন্তি চেৱ সুয্যন্তি চ, সা ভিক্খুনী ভিক্খুনীহি এৱমস্স ৱচনীযা ‘‘অয্যা, খো কুলদূসিকা পাপসমাচাৰা, অয্যায খো পাপকা সমাচাৰা দিস্সন্তি চেৱ সুয্যন্তি চ, কুলানি চায্যায, দুট্ঠানি দিস্সন্তি চেৱ সুয্যন্তি চ, পক্কমতায্যা ইমম্হা আৱাসা, অলং তে ইধ ৱাসেনা’’তি. এৱঞ্চ সা ভিক্খুনী ভিক্খুনীহি ৱুচ্চমানা তা ভিক্খুনিযো এৱং ৱদেয্য ‘‘ছন্দগামিনিযো চ ভিক্খুনিযো, দোসগামিনিযো চ ভিক্খুনিযো, মোহগামিনিযো চ ভিক্খুনিযো, ভযগামিনিযো চ ভিক্খুনিযো, তাদিসিকায আপত্তিযা একচ্চং পব্বাজেন্তি একচ্চং ন পব্বাজেন্তী’’তি, সা ভিক্খুনী ভিক্খুনীহি এৱমস্স ৱচনীযা ‘‘মায্যা, এৱং অৱচ, ন চ ভিক্খুনিযো ছন্দগামিনিযো, ন চ ভিক্খুনিযো দোসগামিনিযো, ন চ ভিক্খুনিযো মোহগামিনিযো, ন চ ভিক্খুনিযো ভযগামিনিযো, অয্যা খো কুলদূসিকা পাপসমাচাৰা, অয্যায খো পাপকা সমাচাৰা দিস্সন্তি চেৱ সুয্যন্তি চ, কুলানি চায্যায দুট্ঠানি দিস্সন্তি চেৱ সুয্যন্তি চ, পক্কমতায্যা, ইমম্হা আৱাসা অলং তে ইধ ৱাসেনা’’তি. এৱঞ্চ সা ভিক্খুনী ভিক্খুনীহি ৱুচ্চমানা তথেৱ পগ্গণ্হেয্য, সা ভিক্খুনী ভিক্খুনীহি যাৱততিযং সমনুভাসিতব্বা তস্স পটিনিস্সগ্গায, যাৱততিযঞ্চে সমনুভাসিযমানা তং পটিনিস্সজ্জেয্য, ইচ্চেতং কুসলং. নো চে পটিনিস্সজ্জেয্য, অযম্পি ভিক্খুনী যাৱততিযকং ধম্মং আপন্না নিস্সাৰণীযং সঙ্ঘাদিসেসং.

উদ্দিট্ঠা খো অয্যাযো সত্তৰস সঙ্ঘাদিসেসা ধম্মা নৱ পঠমাপত্তিকা, অট্ঠ যাৱততিযকা,

যেসং ভিক্খুনী অঞ্ঞতৰং ৱা অঞ্ঞতৰং ৱা আপজ্জতি, তায ভিক্খুনিযা উভতোসঙ্ঘে পক্খমানত্তং চৰিতব্বং. চিণ্ণমানত্তা ভিক্খুনী যত্থ সিযা ৱীসতিগণো ভিক্খুনিসঙ্ঘো, তত্থ সা ভিক্খুনী অব্ভেতব্বা. একাযপি চে ঊনো ৱীসতিগণো ভিক্খুনিসঙ্ঘো তং ভিক্খুনিং অব্ভেয্য, সা চ ভিক্খুনী অনব্ভিতা, তা চ ভিক্খুনিযো গাৰয্হা, অযং তত্থ সামীচি. তত্থায্যাযো পুচ্ছামি, কচ্চিত্থ পৰিসুদ্ধা, দুতিযম্পি, পুচ্ছামি, কচ্চিত্থ পৰিসুদ্ধা, ততিযম্পি পুচ্ছামি, কচ্চিত্থ পৰিসুদ্ধা, পৰিসুদ্ধেত্থায্যাযো, তস্মা তুণ্হী, এৱমেতং ধাৰযামীতি.

সঙ্ঘাদিসেসো নিট্ঠিতো.

নিস্সগ্গিয পাচিত্তিযা

ইমে খো পনায্যাযো তিংস নিস্সগ্গিযা পাচিত্তিযা

ধম্মা উদ্দেসং আগচ্ছন্তি.

পত্তসন্নিচযসিক্খাপদং

১. যা পন ভিক্খুনী পত্তসন্নিচযং কৰেয্য, নিস্সগ্গিযং পাচিত্তিযং.

অকালচীৱৰভাজনসিক্খাপদং

২. যা পন ভিক্খুনী অকালচীৱৰং ‘‘কালচীৱৰ’’ন্তি অধিট্ঠহিত্ৱা ভাজাপেয্য, নিস্সগ্গিযং পাচিত্তিযং.

চীৱৰপৰিৱত্তনসিক্খাপদং

৩. যা পন ভিক্খুনী ভিক্খুনিযা সদ্ধিং চীৱৰং পৰিৱত্তেত্ৱা সা পচ্ছা এৱং ৱদেয্য ‘‘হন্দায্যে, তুয্হং চীৱৰং, আহৰ মেতং চীৱৰং, যং তুয্হং তুয্হমেৱেতং, যং ময্হং ময্হমেৱেতং, আহৰ মেতং চীৱৰং, সকং পচ্চাহৰা’’তি অচ্ছিন্দেয্য ৱা অচ্ছিন্দাপেয্য ৱা, নিস্সগ্গিযং পাচিত্তিযং.

অঞ্ঞৱিঞ্ঞাপনসিক্খাপদং

৪. যা পন ভিক্খুনী অঞ্ঞং ৱিঞ্ঞাপেত্ৱা অঞ্ঞং ৱিঞ্ঞাপেয্য, নিস্সগ্গিযং পাচিত্তিযং.

অঞ্ঞচেতাপন সিক্খাপদং

৫. যা পন ভিক্খুনী অঞ্ঞং চেতাপেত্ৱা অঞ্ঞং চেতাপেয্য, নিস্সগ্গিযং পাচিত্তিযং.

পঠমসঙ্ঘিকচেতাপনসিক্খাপদং

৬. যা পন ভিক্খুনী অঞ্ঞদত্থিকেন পৰিক্খাৰেন অঞ্ঞুদ্দিসিকেন সঙ্ঘিকেন অঞ্ঞং চেতাপেয্য, নিস্সগ্গিযং পাচিত্তিযং.

দুতিযসঙ্ঘিকচেতাপনসিক্খাপদং

৭. যা পন ভিক্খুনী অঞ্ঞদত্থিকেন পৰিক্খাৰেন অঞ্ঞুদ্দিসিকেন সঙ্ঘিকেন সঞ্ঞাচিকেন অঞ্ঞং চেতাপেয্য, নিস্সগ্গিযং পাচিত্তিযং.

পঠমগণিকচেতাপনসিক্খাপদং

৮. যা পন ভিক্খুনী অঞ্ঞদত্থিকেন পৰিক্খাৰেন অঞ্ঞুদ্দিসিকেন মহাজনিকেন অঞ্ঞং চেতাপেয্য, নিস্সগ্গিযং পাচিত্তিযং.

দুতিযগণিকচেতাপনসিক্খাপদং

৯. যা পন ভিক্খুনী অঞ্ঞদত্থিকেন পৰিক্খাৰেন অঞ্ঞুদ্দিসিকেন মহাজনিকেন সঞ্ঞাচিকেন অঞ্ঞং চেতাপেয্য, নিস্সগ্গিযং পাচিত্তিযং.

পুগ্গলিকচেতাপনসিক্খাপদং

১০. যা পন ভিক্খুনী অঞ্ঞদত্থিকেন পৰিক্খাৰেন অঞ্ঞুদ্দিসিকেন পুগ্গলিকেন সঞ্ঞাচিকেন অঞ্ঞং চেতাপেয্য, নিস্সগ্গিযং পাচিত্তিযং.

পত্তৱগ্গো পঠমো.

গৰুপাৱুৰণসিক্খাপদং

১১. গৰুপাৱুৰণং পন ভিক্খুনিযা চেতাপেন্তিযা চতুক্কংসপৰমং চেতাপেতব্বং. ততো চে উত্তৰি চেতাপেয্য, নিস্সগ্গিযং পাচিত্তিযং.

লহুপাৱুৰণসিক্খাপদং

১২. লহুপাৱুৰণং পন ভিক্খুনিযা চেতাপেন্তিযা অড্ঢতেয্যকংসপৰমং চেতাপেতব্বং. ততো চে উত্তৰি চেতাপেয্য, নিস্সগ্গিযং পাচিত্তিযং.

কথিনসিক্খাপদং

১৩. নিট্ঠিতচীৱৰস্মিং ভিক্খুনিযা উব্ভতস্মিং কথিনে দসাহপৰমং অতিৰেকচীৱৰং ধাৰেতব্বং. তং অতিক্কামেন্তিযা, নিস্সগ্গিযং পাচিত্তিযং.

উদোসিতসিক্খাপদং

১৪. নিট্ঠিতচীৱৰস্মিং ভিক্খুনিযা উব্ভতস্মিং কথিনে একৰত্তম্পি চে ভিক্খুনী তিচীৱৰেন ৱিপ্পৱসেয্য, অঞ্ঞত্ৰ ভিক্খুনিসম্মুতিযা নিস্সগ্গিযং পাচিত্তিযং.

অকালচীৱৰসিক্খাপদং

১৫. নিট্ঠিতচীৱৰস্মিং ভিক্খুনিযা উব্ভতস্মিং কথিনে ভিক্খুনিযা পনেৱ অকালচীৱৰং উপ্পজ্জেয্য, আকঙ্খমানায ভিক্খুনিযা পটিগ্গহেতব্বং, পটিগ্গহেত্ৱা খিপ্পমেৱ কাৰেতব্বং, নো চস্স পাৰিপূৰি, মাসপৰমং তায ভিক্খুনিযা তং চীৱৰং নিক্খিপিতব্বং ঊনস্স পাৰিপূৰিযা সতিযা পচ্চাসায. ততো চে উত্তৰি নিক্খিপেয্য সতিযাপি পচ্চাসায, নিস্সগ্গিযং পাচিত্তিযং.

অঞ্ঞাতকৱিঞ্ঞত্তিসিক্খাপদং

১৬. যা পন ভিক্খুনী অঞ্ঞাতকং গহপতিং ৱা গহপতানিং ৱা চীৱৰং ৱিঞ্ঞাপেয্য অঞ্ঞত্ৰ সমযা, নিস্সগ্গিযং পাচিত্তিযং. তত্থাযং সমযো অচ্ছিন্নচীৱৰা ৱা হোতি ভিক্খুনী, নট্ঠচীৱৰা ৱা, অযং তত্থ সমযো.

ততুত্তৰিসিক্খাপদং

১৭. তঞ্চে অঞ্ঞাতকো গহপতি ৱা গহপতানী ৱা বহূহি চীৱৰেহি অভিহট্ঠুং পৱাৰেয্য, সন্তৰুত্তৰপৰমং তায ভিক্খুনিযা ততো চীৱৰং সাদিতব্বং. ততো চে উত্তৰি সাদিযেয্য, নিস্সগ্গিযং পাচিত্তিযং.

পঠমউপক্খটসিক্খাপদং

১৮. ভিক্খুনিং পনেৱ উদ্দিস্স অঞ্ঞাতকস্স গহপতিস্স ৱা গহপতানিযা ৱা চীৱৰচেতাপন্নং উপক্খটং হোতি ‘‘ইমিনা চীৱৰচেতাপন্নেন চীৱৰং চেতাপেত্ৱা ইত্থন্নামং ভিক্খুনিং চীৱৰেন অচ্ছাদেস্সামী’’তি. তত্ৰ চেসা ভিক্খুনী পুব্বে অপ্পৱাৰিতা উপসঙ্কমিত্ৱা চীৱৰে ৱিকপ্পং আপজ্জেয্য ‘‘সাধু ৱত, মং আযস্মা ইমিনা চীৱৰচেতাপন্নেন এৱৰূপং ৱা এৱৰূপং ৱা চীৱৰং চেতাপেত্ৱা অচ্ছাদেহী’’তি কল্যাণকম্যতং উপাদায, নিস্সগ্গিযং পাচিত্তিযং.

দুতিযউপক্খটসিক্খাপদং

১৯. ভিক্খুনিং পনেৱ উদ্দিস্স উভিন্নং অঞ্ঞাতকানং গহপতীনং ৱা গহপতানীনং ৱা পচ্চেকচীৱৰচেতাপন্নানি উপক্খটানি হোন্তি ‘‘ইমেহি মযং পচ্চেকচীৱৰচেতাপন্নেহি পচ্চেকচীৱৰানি চেতাপেত্ৱা ইত্থন্নামং ভিক্খুনিং চীৱৰেহি অচ্ছাদেস্সামা’’তি. তত্ৰ চেসা ভিক্খূনী পুব্বে অপ্পৱাৰিতা উপসঙ্কমিত্ৱা চীৱৰে ৱিকপ্পং আপজ্জেয্য ‘‘সাধু ৱত মং আযস্মন্তো ইমেহি পচ্চেকচীৱৰচেতাপন্নেহি এৱৰূপং ৱা এৱৰূপং ৱা চীৱৰং চেতাপেত্ৱা অচ্ছাদেথ উভোৱ সন্তা একেনা’’তি কল্যাণকম্যতং উপাদায, নিস্সগ্গিযং পাচিত্তিযং.

ৰাজসিক্খাপদং

২০. ভিক্খুনিং পনেৱ উদ্দিস্স ৰাজা ৱা ৰাজভোগ্গো ৱা ব্ৰাহ্মণো ৱা গহপতিকো ৱা দূতেন চীৱৰচেতাপন্নং পহিণেয্য ‘‘ইমিনা চীৱৰচেতাপন্নেন চীৱৰং চেতাপেত্ৱা ইত্থন্নামং ভিক্খুনিং চীৱৰেন অচ্ছাদেহী’’তি. সো চে দূতো তং ভিক্খুনিং উপসঙ্কমিত্ৱা এৱং ৱদেয্য ‘‘ইদং খো, অয্যে, অয্যং উদ্দিস্স চীৱৰচেতাপন্নং আভতং, পটিগ্গণ্হাতায্যা চীৱৰচেতাপন্ন’’ন্তি. তায ভিক্খুনিযা সো দূতো এৱমস্স ৱচনীযো ‘‘ন খো মযং, আৱুসো, চীৱৰচেতাপন্নং পটিগ্গণ্হাম, চীৱৰঞ্চ খো মযং পটিগ্গণ্হাম কালেন কপ্পিয’’ন্তি. সো চে দূতো তং ভিক্খুনিং এৱং ৱদেয্য ‘‘অত্থি পনায্যায, কোচি ৱেয্যাৱচ্চকৰো’’তি, চীৱৰত্থিকায, ভিক্খৱে, ভিক্খুনিযা ৱেয্যাৱচ্চকৰো নিদ্দিসিতব্বো আৰামিকো ৱা উপাসকো ৱা ‘‘এসো খো, আৱুসো, ভিক্খুনীনং ৱেয্যাৱচ্চকৰো’’তি. সো চে দূতো তং ৱেয্যাৱচ্চকৰং সঞ্ঞাপেত্ৱা তং ভিক্খুনিং উপসঙ্কমিত্ৱা এৱং ৱদেয্য ‘‘যং খো, অয্যে, অয্যা ৱেয্যাৱচ্চকৰং নিদ্দিসি, সঞ্ঞত্তো সো মযা, উপসঙ্কমতায্যা কালেন, চীৱৰেন তং অচ্ছাদেস্সতী’’তি. চীৱৰত্থিকায, ভিক্খৱে, ভিক্খুনিযা ৱেয্যাৱচ্চকৰো উপসঙ্কমিত্ৱা দ্ৱত্তিক্খত্তুং চোদেতব্বো সাৰেতব্বো ‘‘অত্থো মে, আৱুসো, চীৱৰেনা’’তি, দ্ৱত্তিক্খত্তুং চোদযমানা সাৰযমানা তং চীৱৰং অভিনিপ্ফাদেয্য, ইচ্চেতং কুসলং, নো চে অভিনিপ্ফাদেয্য, চতুক্খত্তুং পঞ্চক্খত্তুং ছক্খত্তুপৰমং তুণ্হীভূতায উদ্দিস্স ঠাতব্বং, চতুক্খত্তুং পঞ্চক্খত্তুং ছক্খত্তুপৰমং তুণ্হীভূতা উদ্দিস্স তিট্ঠমানা তং চীৱৰং অভিনিপ্ফাদেয্য, ইচ্চেতং কুসলং. ততো চে উত্তৰি ৱাযমমানা তং চীৱৰং অভিনিপ্ফাদেয্য, নিস্সগ্গিযং পাচিত্তিযং. নো চে অভিনিপ্ফাদেয্য, যতস্সা চীৱৰচেতাপন্নং আভতং, তত্থ সামং ৱা গন্তব্বং, দূতো ৱা পাহেতব্বো ‘‘যং খো তুম্হে আযস্মন্তো ভিক্খুনিং উদ্দিস্স চীৱৰচেতাপন্নং পহিণিত্থ, ন তং তস্সা ভিক্খুনিযা কিঞ্চি অত্থং অনুভোতি, যুঞ্জন্তাযস্মন্তো সকং, মা ৱো সকং ৱিনস্সা’’তি, অযং তত্থ সামীচি.

চীৱৰৱগ্গো দুতিযো.

ৰূপিযসিক্খাপদং

২১. যা পন ভিক্খুনী জাতৰূপৰজতং উগ্গণ্হেয্য ৱা উগ্গণ্হাপেয্য ৱা উপনিক্খিত্তং ৱা সাদিযেয্য, নিস্সগ্গিযং পাচিত্তিযং.

ৰূপিযসংৱোহাৰসিক্খাপদং

২২. যা পন ভিক্খুনী নানপ্পকাৰকং ৰূপিযসংৱোহাৰং সমাপজ্জেয্য, নিস্সগ্গিযং পাচিত্তিযং.

কযৱিক্কযসিক্খাপদং

২৩. যা পন ভিক্খুনী নানপ্পকাৰকং কযৱিক্কযং সমাপজ্জেয্য, নিস্সগ্গিযং পাচিত্তিযং.

ঊনপঞ্চবন্ধনসিক্খাপদং

২৪. যা পন ভিক্খুনী ঊনপঞ্চবন্ধনেন পত্তেন অঞ্ঞং নৱং পত্তং চেতাপেয্য, নিস্সগ্গিযং পাচিত্তিযং. তায ভিক্খুনিযা সো পত্তো ভিক্খুনিপৰিসায নিস্সজ্জিতব্বো, যো চ তস্সা ভিক্খুনিপৰিসায পত্তপৰিযন্তো, সো তস্সা ভিক্খুনিযা পদাতব্বো ‘‘অযং তে ভিক্খুনি পত্তো যাৱভেদনায ধাৰেতব্বো’’তি, অযং তত্থ সামীচি.

ভেসজ্জসিক্খাপদং

২৫. যানি খো পন তানি গিলানানং ভিক্খুনীনং পটিসাযনীযানি ভেসজ্জানি, সেয্যথিদং – সপ্পি নৱনীতং তেলং মধু ফাণিতং, তানি পটিগ্গহেত্ৱা সত্তাহপৰমং সন্নিধিকাৰকং পৰিভুঞ্জিতব্বানি. তং অতিক্কামেন্তিযা, নিস্সগ্গিযং পাচিত্তিযং.

চীৱৰঅচ্ছিন্দনসিক্খাপদং

২৬. যা পন ভিক্খুনী ভিক্খুনিযা সামং চীৱৰং দত্ৱা কুপিতা অনত্তমনা অচ্ছিন্দেয্য ৱা অচ্ছিন্দাপেয্য ৱা, নিস্সগ্গিযং পাচিত্তিযং.

সুত্তৱিঞ্ঞত্তিসিক্খাপদং

২৭. যা পন ভিক্খুনী সামং সুত্তং ৱিঞ্ঞাপেত্ৱা তন্তৱাযেহি চীৱৰং ৱাযাপেয্য, নিস্সগ্গিযং পাচিত্তিযং.

মহাপেসকাৰসিক্খাপদং

২৮. ভিক্খুনিং পনেৱ উদ্দিস্স অঞ্ঞাতকো গহপতি ৱা গহপতানী ৱা তন্তৱাযেহি চীৱৰং ৱাযাপেয্য, তত্ৰ চেসা ভিক্খুনী পুব্বে অপ্পৱাৰিতা তন্তৱাযে উপসঙ্কমিত্ৱা চীৱৰে ৱিকপ্পং আপজ্জেয্য ‘‘ইদং খো আৱুসো চীৱৰং মং উদ্দিস্স ৱিয্যতি, আযতঞ্চ কৰোথ, ৱিত্থতঞ্চ অপ্পিতঞ্চ সুৱীতঞ্চ সুপ্পৱাযিতঞ্চ সুৱিলেখিতঞ্চ সুৱিতচ্ছিতঞ্চ কৰোথ, অপ্পেৱ নাম মযম্পি আযস্মন্তানং কিঞ্চিমত্তং অনুপদজ্জেয্যামা’’তি, এৱঞ্চ সা ভিক্খুনী ৱত্ৱা কিঞ্চিমত্তং অনুপদজ্জেয্য অন্তমসো পিণ্ডপাতমত্তম্পি, নিস্সগ্গিযং পাচিত্তিযং.

অচ্চেকচীৱৰসিক্খাপদং

২৯. দসাহানাগতং কত্তিকতেমাসিকপুণ্ণমং ভিক্খুনিযা পনেৱ অচ্চেকচীৱৰং উপ্পজ্জেয্য, অচ্চেকং মঞ্ঞমানায ভিক্খুনিযা পটিগ্গহেতব্বং, পটিগ্গহেত্ৱা যাৱ চীৱৰকালসমযং নিক্খিপিতব্বং. ততো চে উত্তৰি নিক্খিপেয্য, নিস্সগ্গিযং পাচিত্তিযং.

পৰিণতসিক্খাপদং

৩০. যা পন ভিক্খুনী জানং সঙ্ঘিকং লাভং পৰিণতং অত্তনো পৰিণামেয্য, নিস্সগ্গিযং পাচিত্তিযং.

পত্তৱগ্গো ততিযো.

উদ্দিট্ঠা খো, অয্যাযো, তিংস নিস্সগ্গিযা পাচিত্তিযা ধম্মা. তত্থায্যাযো, পুচ্ছামি, কচ্চিত্থ পৰিসুদ্ধা, দুতিযম্পি পুচ্ছামি, কচ্চিত্থ পৰিসুদ্ধা, ততিযম্পি পুচ্ছামি, কচ্চিত্থ পৰিসুদ্ধা, পৰিসুদ্ধেত্থায্যাযো, তস্মা তুণ্হী, এৱমেতং ধাৰযামীতি.

নিস্সগ্গিযপাচিত্তিযা নিট্ঠিতা.

সুদ্ধপাচিত্তিযা

ইমে খো পনায্যাযো, ছসট্ঠিসতা পাচিত্তিযা

ধম্মা উদ্দেসং আগচ্ছন্তি.

লসুণসিক্খাপদং

১. যা পন ভিক্খুনী লসুণং খাদেয্য পাচিত্তিযং.