১৩. তেৱিজ্জসুত্তৱণ্ণনা

৫১৮. উত্তৰেনাতি এত্থ এন-সদ্দো দিসাৱাচীসদ্দতো পঞ্চমীঅন্ততো অদূৰত্থো ইচ্ছিতো, তস্মা উত্তৰেন-সদ্দেন অদূৰত্থজোতনং দস্সেন্তো ‘‘অদূৰে উত্তৰপস্সে’’তি আহ. অক্খৰচিন্তকা পন এন-সদ্দযোগে অৱধিৱাচিনি পদে উপযোগৱচনং ইচ্ছন্তি. অত্থো পন সামিৱসেনেৱ ইচ্ছিতোতি ইধ সামিৱচনৱসেনেৱ ৱুত্তং.

৫১৯. কুলচাৰিত্তাদীতি আদি-সদ্দেন মন্তজ্ঝেনাভিৰূপতাদিসম্পত্তিং সঙ্গণ্হাতি. মন্তসজ্ঝাযকৰণত্থন্তি আথব্বণমন্তানং সজ্ঝাযকৰণত্থং, তেনাহ ‘‘অঞ্ঞেসং বহূনং পৱেসনং নিৱাৰেত্ৱা’’তি.

মগ্গামগ্গকথাৱণ্ণনা

৫২০. ‘‘জঙ্ঘচাৰ’’ন্তি চঙ্কমতো ইতো চিতো চ চৰণমাহ. সো হি জঙ্ঘাসু কিলমথৱিনোদনত্থো চাৰোতি তথা ৱুত্তো. তেনাহ ‘‘অনুচঙ্কমন্তানং অনুৱিচৰন্তান’’ন্তি. তেনাতি উভোসুপি অনুচঙ্কমনানুৱিচাৰণানং লব্ভনতো. সহাযা হি তে অঞ্ঞমঞ্ঞ সভাগৱুত্তিকা. ‘‘মগ্গো’’তি ইচ্ছিতট্ঠানং উজুকং মগ্গতি উপগচ্ছতি এতেনাতি মগ্গো, উজুমগ্গো. তদঞ্ঞো অমগ্গো, তস্মিং মগ্গে চ অমগ্গে চ. পটিপদন্তি ব্ৰহ্মলোকগামিমগ্গস্স পুব্বভাগপটিপদং.

নিয্যাতীতি নিয্যানীযো, সো এৱ ‘‘নিয্যানিকো’’তি ৱুত্তোতি আহ ‘‘নিয্যাযন্তো’’তি. যস্মা নিয্যাতপুগ্গলৱসেনস্স নিয্যানিকভাৱো, তস্মা ‘‘নিয্যাযন্তো’’তি পুগ্গলস্স যোনিসো পটিপজ্জনৱসেন নিয্যাযন্তো মগ্গো ‘‘নিয্যাতী’’তি ৱুত্তো. কৰোতীতি অত্তনো সন্তানে উপ্পাদেতি. উপ্পাদেন্তোযেৱ হি তত্থ পটিপজ্জতি নাম. সহ ব্যেতি ৱত্ততীতি সহব্যো, সহৱত্তনকো. তস্স ভাৱো সহব্যতাতি আহ ‘‘সহভাৱাযা’’তিআদি. সহভাৱোতি চ সলোকতা, সমীপতা ৱা ৱেদিতব্বা, তেনাহ ‘‘একট্ঠানে পাতুভাৱাযা’’তি. সকমেৱ আচৰিযৱাদন্তি অত্তনো আচৰিযেন পোক্খৰসাতিনা কথিতমেৱ আচৰিযৱাদং. থোমেত্ৱা পগ্গণ্হিত্ৱা ‘‘অযমেৱ উজুমগ্গো অযমঞ্জসাযনো’’তি পসংসিত্ৱা উক্কংসিত্ৱা. ভাৰদ্ৱাজোপি সকমেৱাতি ভাৰদ্ৱাজোপি মাণৱো অত্তনো আচৰিযেন তাৰুক্খেন কথিতমেৱ আচৰিযৱাদং থোমেত্ৱা পগ্গণ্হিত্ৱা ৱিচৰতীতি যোজনা. তেন ৱুত্তন্তি তেন যথা তথা ৱা অভিনিৱিট্ঠভাৱেন ৱুত্তং পাড়িযং.

৫২১-২. অনিয্যানিকা ৱাতি অপ্পাটিহাৰিযাৱ অঞ্ঞমঞ্ঞস্স ৱাদে দোসং দস্সেত্ৱা অৱিপৰীতত্থদস্সনত্থং উত্তৰৰহিতা এৱ. অঞ্ঞমঞ্ঞস্স ৱাদস্স আদিতো ৱিৰুদ্ধগ্গহণং ৱিগ্গহো, স্ৱেৱ ৱিৱদনৱসেন অপৰাপৰং উপ্পন্নো ৱিৱাদোতি আহ ‘‘পুব্বুপ্পত্তিকো ৱিগ্গহো অপৰভাগে ৱিৱাদো’’তি. দুৱিধোপি এসো ৱিগ্গহো, ৱিৱাদোতি দ্ৱিধা ৱুত্তোপি ৱিৰোধো. নানাআচৰিযানং ৱাদতোতি নানাৰুচিকানং আচৰিযানং ৱাদভাৱতো. নানাৱাদো নানাৱিধো ৱাদোতি কত্ৱা.

৫২৩. একস্সাপীতি তুম্হেসু দ্ৱীসু একস্সাপি. একস্মিন্তি সকৱাদপৰৱাদেসু একস্মিম্পি. সংসযো নত্থীতি ‘‘মগ্গো নু খো, ন মগ্গো নু খো’’তি সংসযো ৱিচিকিচ্ছা নত্থি. অঞ্জসাযনভাৱে পন সংসযো. তেনাহ ‘‘এস কিৰা’’তিআদি. ভগৱা পন যদি সব্বত্থ মগ্গসঞ্ঞিনো, এৱং সতি ‘‘কিস্মিং ৱো ৱিগ্গহো’’তি পুচ্ছতি.

৫২৪. ‘‘ইচ্ছিতট্ঠানং উজুকং মগ্গতি উপগচ্ছতি এতেনাতি মগ্গো, উজুমগ্গো. তদঞ্ঞো অমগ্গো’’তি ৱুত্তো ৱাযমত্থো. সব্বে তেতি সব্বেপি তে নানাআচৰিযেহি ৱুত্তমগ্গা.

যে পাড়িযং ‘‘অদ্ধৰিযা ব্ৰাহ্মণা’’তিআদিনা ৱুত্তা. অদ্ধৰো নাম যঞ্ঞৱিসেসো, তদুপযোগিভাৱতো ‘‘অদ্ধৰিযা’’ ত্ৱেৱ ৱুচ্চন্তি যজূনি, তানি সজ্ঝাযন্তীতি অদ্ধৰিযা, যজুব্বেদিনো. যে চ তিত্তিৰিইসিনা কতে মন্তে সজ্ঝাযন্তি, তে তিত্তিৰিযা, যজুব্বেদিনো এৱ. যজুব্বেদসাখা হেসা, যদিদং তিত্তিৰং. ছন্দো ৱুচ্চতি ৱিসেসতো সামৱেদো, তং সৰেন কাযন্তীতি ছন্দোকা, সামৱেদিনো. ‘‘ছন্দোগা’’তিপি পঠন্তি, সো এৱত্থো. বহৱো ইৰযো এত্থাতি বৱ্হাৰি, ইৰুব্বেদো. তং অধীযন্তীতি বৱ্হাৰিজ্ঝা.

‘‘বহূনী’’তি এত্থাযং উপমাসংসন্দনা – যথা তে নানামগ্গা একংসতো তস্স গামস্স ৱা নিগমস্স ৱা পৱেসায হোন্তি, এৱং ব্ৰাহ্মণেহি পঞ্ঞাপিযমানাপি নানামগ্গা ব্ৰহ্মলোকূপগমনায ব্ৰহ্মুনা সহব্যতায একংসেনেৱ হোন্তীতি.

৫২৭-৫২৯. ৱ-কাৰো আগমসন্ধিমত্তন্তি অনত্থকো ৱ-কাৰো, তেন ৱণ্ণাগমেন পদন্তৰসন্ধিমত্তং কতন্তি অত্থো. অন্ধপৱেণীতি অন্ধপন্তি. ‘‘পঞ্ঞাসসট্ঠি অন্ধা’’তি ইদং তস্সা অন্ধপৱেণিযা মহতো গচ্ছগুম্বস্স অনুপৰিগমনযোগ্যতাদস্সনং. এৱঞ্হি তে ‘‘সুচিৰং ৱেলং মগ্গং গচ্ছামা’’তি এৱং সঞ্ঞিনো হোন্তি. নামকংযেৱাতি অত্থাভাৱতো নামমত্তংযেৱ, তং পন ভাসিতং তেহি সাৰসঞ্ঞিতম্পি নামমত্ততায অসাৰভাৱতো নিহীনমেৱাতি আহ ‘‘লামকংযেৱা’’তি.

৫৩০. যতোতি ভুম্মত্থে নিস্সক্কৱচনং, সামঞ্ঞজোতনা চ ৱিসেসে অৱতিট্ঠতীতি আহ ‘‘যস্মিং কালে’’তি. আযাচন্তীতি পত্থেন্তি. উগ্গমনং লোকস্স বহুকাৰভাৱতো তথা থোমনাতি. অযং কিৰ ব্ৰাহ্মণানং লদ্ধি ‘‘ব্ৰাহ্মণানং আযাচনায চন্দিমসূৰিযা গন্ত্ৱা লোকে ওভাসং কৰোন্তী’’তি.

৫৩২. ইধ পন কিং ৱত্তব্বন্তি ইমস্মিং পন অপ্পচ্চক্খভূতস্স ব্ৰহ্মুনো সহব্যতায মগ্গদেসনে তেৱিজ্জানং কিং ৱত্তব্বং অত্থি, যে পচ্চক্খভূতানম্পি চন্দিমসূৰিযানং সহব্যতায মগ্গং দেসেতুং ন সক্কোন্তীতি অধিপ্পাযো. ‘‘যত্থা’’তি ‘‘ইধ পনা’’তি ৱুত্তমেৱত্থং পচ্চামসতি.

অচিৰৱতীনদীউপমাকথাৱণ্ণনা

৫৪২. সমভৰিতাতি সম্পুণ্ণা. ততো এৱ কাকপেয্যা. পাৰাতি পৰতীৰং. অপাৰন্তি ওৰিমতীৰং. এহীতি আগচ্ছ.

৫৪৪. পঞ্চসীল…পে… ৱেদিতব্বা যমনিযমাদিব্ৰাহ্মণধম্মানং তদন্তোগধভাৱতো. তব্বিপৰীতাতি পঞ্চসীলাদিৱিপৰীতা পঞ্চ ৱেৰাদযো. ‘‘পুনপী’’তি ৱত্ৱা ‘‘অপৰম্পী’’তি ৱচনং ইতৰাযপি নদি উপমায সঙ্গণ্হনত্থং.

৫৪৬. কামযিতব্বট্ঠেনাতি কামনীযভাৱেন. বন্ধনট্ঠেনাতি তেনেৱ কামেতব্বভাৱেন সত্তানং চিত্তস্স আবন্ধনভাৱেন. কামঞ্চাযং গুণ-সদ্দো অত্থন্তৰেসুপি দিট্ঠপ্পযোগো, তেসং পনেত্থ অসম্ভৱতো পাৰিসেসঞাযেন বন্ধনট্ঠেযেৱ যুত্তোতি দস্সেতুং ‘‘অনুজানামী’’তিআদিনা অত্থুদ্ধাৰো আৰদ্ধো, এসেৱাতি বন্ধনট্ঠো এৱ. ন হি ৰূপাদীনং কামেতব্বভাৱে ৱুচ্চমানে পটলট্ঠো যুজ্জতি তথা কামেতব্বতায অনধিপ্পেতত্তা. ৰাসট্ঠআনিসংসট্ঠেসুপি এসেৱ নযো তথাপি কামেতব্বতায অনধিপ্পেতত্তা. পাৰিসেসতো পন বন্ধনট্ঠো গহিতো. যদগ্গেন হি নেসং কামেতব্বতা, তদগ্গেন বন্ধনভাৱো চাতি.

কোট্ঠাসট্ঠোপি তেসু যুজ্জতেৱ চক্খুৱিঞ্ঞেয্যাদিকোট্ঠাসভাৱেন নেসং কামেতব্বতো. কোট্ঠাসে চ গুণ-সদ্দো দিস্সতি ‘‘দিগুণং ৱড্ঢেতব্ব’’ন্তিআদীসু, সম্পদাট্ঠোপি –

‘‘অসঙ্খ্যেয্যানি নামানি, সগুণেন মহেসিনো;

গুণেন নামমুদ্ধেয্যং, অপি নামসহস্সতো’’তি. (ধ. স. অট্ঠ. ১৩১৩; উদা. অট্ঠ. ৫৩; পটি. ম. অট্ঠ. ৭৬);

আদীসু সোপি ইধ ন যুজ্জতীতি অনুদ্ধটো.

চক্খুৱিঞ্ঞেয্যাতি চক্খুৱিঞ্ঞাণেন ৱিজানিতব্বা, তেন পন ৱিজাননং দস্সনমেৱাতি আহ ‘‘পস্সিতব্বা’’তি. ‘‘সোতৱিঞ্ঞাণেন সোতব্বা’’তি এৱমাদি এতেনুপাযেনাতি অতিদিসতি. গৱেসিতম্পি ‘‘ইট্ঠ’’ন্তি ৱুচ্চতি, তং ইধ নাধিপ্পেতন্তি আহ ‘‘পৰিযিট্ঠা ৱা হোন্তু মা ৱা’’তি. ইট্ঠাৰম্মণভূতাতি সুখাৰম্মণভূতা. কামনীযাতি কামেতব্বা. ইট্ঠভাৱেন মনং অপ্পাযন্তীতি মনাপা. পিযজাতিকাতি পিযসভাৱা.

গেধেনাতি লোভেন অভিভূতা হুত্ৱা পঞ্চকামগুণে পৰিভুঞ্জন্তীতি যোজনা. মুচ্ছাকাৰন্তি মোহনাকাৰং. অধিওসন্নাতি অধিগ্গয্হ অজ্ঝোসায অৱসন্না, তেনাহ ‘‘ওগাড়্হা’’তি. পৰিনিট্ঠানপ্পত্তাতি গিলিত্ৱা পৰিনিট্ঠাপনৱসেন পৰিনিট্ঠানং উপগতা. আদীনৱন্তি কামপৰিভোগে সম্পতি, আযতিঞ্চ দোসং অপস্সন্তা. ঘাসচ্ছাদনাদিসম্ভোগনিমিত্তসংকিলেসতো নিস্সৰন্তি অপগচ্ছন্তি এতেনাতি নিস্সৰণং, যোনিসো পচ্চৱেক্খিত্ৱা তেসং পৰিভোগপঞ্ঞা. তদভাৱতো অনিস্সৰণপঞ্ঞাতি ইমমত্থং দস্সেন্তো ‘‘ইদমেত্থা’’তিআদিমাহ.

৫৪৮-৯. আৱৰন্তীতি কুসলপ্পৱত্তিং আদিতোৱ নিৱাৰেন্তি. নিৱাৰেন্তীতি নিৰৱসেসতো ৱাৰযন্তি. ওনন্ধন্তীতি ওগাহন্তা ৱিয ছাদেন্তি. পৰিযোনন্ধন্তীতি সব্বসো ছাদেন্তি. আৱৰণাদীনং ৱসেনাতি আৱৰণাদিঅত্থানং ৱসেন. তে হি আসেৱনবলৱতায পুৰিমপুৰিমেহি পচ্ছিমপচ্ছিমা দড়্হতৰতমাদিভাৱপ্পত্তা ৱুত্তা.

সংসন্দনকথাৱণ্ণনা

৫৫০. ইত্থিপৰিগ্গহে সতি পুৰিসস্স পঞ্চকামগুণপৰিগ্গহো পৰিপুণ্ণো এৱ হোতীতি ৱুত্তং ‘‘সপৰিগ্গহোতি ইত্থিপৰিগ্গহেন সপৰিগ্গহো’’তি. ‘‘ইত্থিপৰিগ্গহেন অপৰিগ্গহো’’তি চ ইদং তেৱিজ্জব্ৰাহ্মণেসু দিস্সমানপৰিগ্গহানং দুট্ঠুল্লতমপৰিগ্গহাভাৱদস্সনং. এৱংভূতানং তেৱিজ্জানং ব্ৰাহ্মণানং কা ব্ৰহ্মুনা সংসন্দনা, ব্ৰহ্মা পন সব্বেন সব্বং অপৰিগ্গহোতি. ৱেৰচিত্তেন অৱেৰো, কুতো এতস্স ৱেৰপ্পযোগোতি অধিপ্পাযো. চিত্তগেলঞ্ঞসঙ্খাতেনাতি চিত্তুপ্পাদগেলঞ্ঞসঞ্ঞিতেন, তেনস্স সব্বৰূপকাযগেলঞ্ঞভাৱো ৱুত্তো হোতি. ব্যাপজ্ঝেনাতি দুক্খেন. উদ্ধচ্চকুক্কুচ্চাদীহীতি আদি-সদ্দেন তদেকট্ঠা সংকিলেসধম্মা সঙ্গয্হন্তি. অপ্পটিপত্তিহেতুভূতায ৱিচিকিচ্ছায সতি ন কদাচি চিত্তং পুৰিসস্স ৱসে ৱত্ততি, পহীনায পন সিযা ৱসৱত্তনন্তি আহ ‘‘ৱিচিকিচ্ছায অভাৱতো চিত্তং ৱসে ৱত্তেতী’’তি. চিত্তগতিকাতি চিত্তৱসিকা, তেনাহ চিত্তস্স ৱসে ৱত্তন্তী’’তি. ন তাদিসোতি ব্ৰাহ্মণা ৱিয চিত্তৱসিকো ন হোতি, অথ খো ৱসীভূতজ্ঝানাভিঞ্ঞতায চিত্তং অত্তনো ৱসে ৱত্তেতীতি ৱসৱত্তী.

৫৫২. ব্ৰহ্মলোকমগ্গেতি ব্ৰহ্মলোকগামিমগ্গে পটিপজ্জিতব্বে, পঞ্ঞপেতব্বে ৱা, তং পঞ্ঞপেন্তাতি অধিপ্পাযো. উপগন্ত্ৱাতি অমগ্গমেৱ ‘‘মগ্গো’’তি মিচ্ছাপটিপজ্জনেন উপগন্ত্ৱা, পটিজানিত্ৱা ৱা. পঙ্কং ওতিণ্ণা ৱিযাতি মত্থকে একঙ্গুলং ৱা উপড্ঢঙ্গুলং ৱা সুক্খতায ‘‘সমতল’’ন্তি সঞ্ঞায অনেকপোৰিসং মহাপঙ্কং ওতিণ্ণা ৱিয. অনুপ্পৱিসন্তীতি অপাযমগ্গং ব্ৰহ্মলোকমগ্গসঞ্ঞায ওগাহযন্তি. ততো এৱ সংসীদিত্ৱা ৱিসাদং পাপুণন্তি. এৱন্তি ‘‘সমতল’’ন্তিআদিনা ৱুত্তনযেন. সংসীদিত্ৱাতি নিম্মুজ্জিত্ৱা. সুক্খতৰণং মঞ্ঞে তৰন্তীতি সুক্খনদিতৰণং তৰন্তি মঞ্ঞে. তস্মাতি যস্মা তেৱিজ্জা অমগ্গমেৱ ‘‘মগ্গো’’তি উপগন্ত্ৱা সংসীদন্তি, তস্মা. যথা তেতি যথা তে ‘‘সমতল’’ন্তি সঞ্ঞায পঙ্কং ওতিণ্ণা. ইধেৱ চাতি ইমস্মিঞ্চ অত্তভাৱে. সুখং ৱা সাতং ৱা ন লভন্তীতি ঝানসুখং ৱা ৱিপস্সনাসাতং ৱা ন লভন্তি, কুতো মগ্গসুখং ৱা নিব্বানসাতং ৱাতি অধিপ্পাযো. মগ্গদীপকন্তি মগ্গদীপকাভিমতং. ‘‘ইৰিণ’’ন্তি অৰঞ্ঞানিযা ইদং অধিৱচনন্তি আহ ‘‘অগামকং মহাৰঞ্ঞ’’ন্তি. মিগৰুৰুআদীনম্পি অনুপভোগৰুক্খেহি. পৰিৱত্তিতুম্পি ন সক্কা হোন্তি মহাকণ্টকতায. ঞাতীনং ব্যসনং ৱিনাসো ঞাতিব্যসনং. এৱং ভোগসীলব্যসনানি ৱেদিতব্বানি. ৰোগো এৱ ব্যসতি ৱিবাধতীতি ৰোগব্যসনং. এৱং দিট্ঠিব্যসনম্পি দট্ঠব্বং.

৫৫৪. জাতসংৱড্ঢোতি জাতো হুত্ৱা সংৱড্ঢিতো. ন সব্বসো পচ্চক্খা হোন্তি পৰিচযাভাৱতো. চিৰনিক্খন্তোতি নিক্খন্তো হুত্ৱা চিৰকালো. দন্ধাযিতত্তন্তি ৱিস্সজ্জনে মন্দত্তং সণিকৱুত্তি, তং পন সংসযৱসেন চিৰাযনং নাম হোতীতি আহ ‘‘কঙ্খাৱসেন চিৰাযিতত্ত’’ন্তি. ৱিত্থাযিতত্তন্তি সাৰজ্জিতত্তং. অট্ঠকথাযং পন ৱিত্থাযিতত্তং নাম ছম্ভিতত্তন্তি অধিপ্পাযেন ‘‘থদ্ধভাৱগ্গহণ’’ন্তি ৱুত্তং.

৫৫৫. উ-ইতি উপসগ্গযোগে লুম্প-সদ্দো উদ্ধৰণত্থো হোতীতি ‘‘উল্লুম্পতূ’’তি পদস্স উদ্ধৰতূতি অত্থমাহ. উপসগ্গৱসেন হি ধাতু-সদ্দা অত্থৱিসেসৱুত্তিনো হোন্তি যথা ‘‘উদ্ধৰতূ’’তি.

ব্ৰহ্মলোকমগ্গদেসনাৱণ্ণনা

৫৫৬. যস্স অতিসযেন বলং অত্থি, সো ‘‘বলৱা’’তি ৱুত্তোতি আহ ‘‘বলসম্পন্নো’’তি. সঙ্খং ধমযতীতি সঙ্খধমকো, তং ধমযিত্ৱা ততো সদ্দপৱত্তকো. অপ্পনাৱ ৱট্টতি পটিপক্খতো সম্মদেৱ চেতসো ৱিমুত্তিভাৱতো.

পমাণকতং কম্মং নাম কামাৱচৰং পমাণকৰানং সংকিলেসধম্মানং অৱিক্খম্ভনতো. তথা হি তং ব্ৰহ্মৱিহাৰপুব্বভাগভূতং পমাণং অতিক্কমিত্ৱা ওদিস্সকঅনোদিস্সকদিসাফৰণৱসেন ৱড্ঢেতুং ন সক্কা. ৱুত্তৱিপৰিযাযতো পন অপ্পমাণকতং কম্মং নাম ৰূপাৰূপাৱচৰং, তেনাহ ‘‘তঞ্হী’’তিআদি. তত্থ অৰূপাৱচৰে ওদিস্সকানোদিস্সকৱসেন ফৰণং ন লব্ভতি, তথা দিসাফৰণং.

কেচি পন তং আগমনৱসেন লব্ভতীতি ৱদন্তি, তদযুত্তং. ন হি ব্ৰহ্মৱিহাৰনিস্সন্দো আৰুপ্পং, অথ খো কসিণনিস্সন্দো, তস্মা যং সুৱিভাৱিতং ৱসীভাৱং পাপিতং আৰুপ্পং, তং ‘‘অপ্পমাণকত’’ন্তি ৱুত্তন্তি দট্ঠব্বং. যং ৱা সাতিসযং ব্ৰহ্মৱিহাৰভাৱনায অভিসঙ্খতেন সন্তানেন নিব্বত্তিতং, যঞ্চ ব্ৰহ্মৱিহাৰসমাপত্তিতো ৱুট্ঠায সমাপন্নং অৰূপাৱচৰজ্ঝানং, তং ইমিনা পৰিযাযেন ফৰণপ্পমাণৱসেন অপ্পমাণকতন্তি ৱত্তুং ৱট্টতীতি অপৰে. ৱীমংসিত্ৱা গহেতব্বং.

ৰূপাৱচৰাৰূপাৱচৰকম্মেতি ৰূপাৱচৰকম্মে, অৰূপাৱচৰকম্মে চ সতি. ন ওহীযতি ন তিট্ঠতীতি কতূপচিতম্পি কামাৱচৰকম্মং যথাধিগতে মহগ্গতজ্ঝানে অপৰিহীনে তং অভিভৱিত্ৱা পটিবাহিত্ৱা সযং ওহীযকং হুত্ৱা পটিসন্ধিং দাতুং সমত্থভাৱে ন তিট্ঠতি. লগ্গিতুন্তি আৱৰিতুং নিসেধেতুং. ঠাতুন্তি পটিবলো হুত্ৱা ঠাতুং. ফৰিত্ৱাতি পটিপ্ফৰিত্ৱা. পৰিযাদিযিত্ৱাতি তস্স সামত্থিযং খেপেত্ৱা. কম্মস্স পৰিযাদিযনং নাম তস্স ৱিপাকুপ্পাদনং নিসেধেত্ৱা অত্তনো ৱিপাকুপ্পাদনন্তি আহ ‘‘তস্স ৱিপাকং পটিবাহিত্ৱা’’তিআদি. এৱং মেত্তাদিৱিহাৰীতি এৱং ৱুত্তানং মেত্তাদীনং ব্ৰহ্মৱিহাৰানং ৱসেন মেত্তাদিৱিহাৰী.

৫৫৯. অগ্গঞ্ঞসুত্তে…পে… অলত্থুন্তি অগ্গঞ্ঞসুত্তে আগতনযেন উপসম্পদঞ্চেৱ অৰহত্তঞ্চ অলত্থুং পটিলভিংসু. সেসং সুৱিঞ্ঞেয্যমেৱ.

তেৱিজ্জসুত্তৱণ্ণনায লীনত্থপ্পকাসনা.