১২. লোহিচ্চসুত্তৱণ্ণনা

লোহিচ্চব্ৰাহ্মণৱত্থুৱণ্ণনা

৫০১. সালৱতিকাতি ইত্থিলিঙ্গৱসেন তস্স গামস্স নামং. গামণিকাভাৱেনাতি কেচি. লোহিতো নাম তস্স কুলে পুব্বপুৰিসো, তস্স ৱসেন লোহিচ্চোতি তস্স ব্ৰাহ্মণস্স গোত্ততো আগতং নামং.

৫০২. ‘‘দিট্ঠিগত’’ন্তি লদ্ধিমত্তং অধিপ্পেতন্তি আহ ‘‘ন পন উচ্ছেদসস্সতানং অঞ্ঞতৰ’’ন্তি. ন হি উচ্ছেদসস্সতগাহৱিনিমুত্তো কোচি দিট্ঠিগাহো অত্থি. ‘‘ভাসতি যেৱা’’তি তস্সা লদ্ধিযা লোকে পাকটভাৱং দস্সেতি. অত্ততো অঞ্ঞো পৰোতি যথা অনুসাসকতো অনুসাসিতব্বো পৰো, এৱং অনুসাসিতব্বতোপি অনুসাসকো পৰোতি ৱুত্তং ‘‘পৰো পৰস্সাতি পৰো যো’’তিআদি. কিং-সদ্দাপেক্খায চেত্থ ‘‘কৰিস্সতী’’তি অনাগতকালৱচনং, অনাগতেপি ৱা তেন তস্স কাতব্বং নত্থীতি দস্সনত্থং. কুসলং ধম্মন্তি অনৱজ্জধম্মং নিক্কিলেসধম্মং ৱিমোক্খধম্মন্তি অত্থো. ‘‘পৰেসং ধম্মং কথেস্সামী’’তি তেহি অত্তানং পৰিৱাৰাপেত্ৱা ৱিচৰণং কিং অত্থিযং আসযবুদ্ধস্সাপি অনুৰোধেন ৱিনা তং ন হোতীতি তস্মা অত্তনা পটিলদ্ধং…পে… ৱিহাতব্বন্তি ৱদতি. তেনাহ ‘‘এৱং সম্পদমিদং পাপকং লোভধম্মং ৱদামী’’তি.

৫০৪. সোতি লোহিচ্চো ব্ৰাহ্মণো.

৫০৮. কথাফাসুকত্থন্তি কথাসুখত্থং, সুখেন কথং কথেতুঞ্চেৱ সোতুঞ্চাতি অত্থো. অপ্পেৱ নাম সিযাতি এত্থ পীতিৱসেন আমেডিতং দট্ঠব্বং. তথা হি তং ‘‘বুদ্ধগজ্জিত’’ন্তি ৱুচ্চতি. ভগৱা হি ঈদিসেসু ঠানেসু ৱিসেসতো পীতিসোমনস্সজাতো হোতি. তেনাহ ‘‘অযং কিৰেত্থ অধিপ্পাযো’’তিআদি.

লোহিচ্চব্ৰাহ্মণানুযোগৱণ্ণনা

৫০৯. সমুদযসঞ্জাতীতি আযুপ্পাদো. অনুপুব্বো কম্পী-সদ্দো আকঙ্খনত্থো হোতীতি ‘‘ইচ্ছতীতি অত্থো’’তি ৱুত্তং. সাতিসযেন ৱা হিতেন অনুকম্পকো অনুগ্গণ্হনকো হিতানুকম্পী. সম্পজ্জতীতি আসেৱনলাভেন নিপ্পজ্জতি বলৱতী হোতি, অৱগ্গহাতি অত্থো, তেনাহ ‘‘নিযতা হোতী’’তি. নিৰযে নিব্বত্ততি মিচ্ছাদিট্ঠিকো.

৫১০-১১. দুতিযং উপপত্তিন্তি ‘‘ননু ৰাজা পসেনদী কোসলো’’তিআদিনা দুতিযং উপপত্তিং সাধনযুত্তিং. কাৰণঞ্হি ভগৱা উপমামুখেন দস্সেতি. যে চিমেতি যে চ ইমে কুলপুত্তা দিব্বা গব্ভা পৰিপাচেন্তীতি যোজনা. অসক্কুণন্তা উপনিস্সযসম্পত্তিযা, ঞাণপৰিপাকস্স ৱা অভাৱেন. যে পন ‘‘পৰিপচ্চন্তী’’তি পঠন্তি, তেসং ‘‘দিব্বে গব্ভে’’তি ৱচনৱিপল্লাসেন পযোজনং নত্থি. অত্থো চ দুতিযৱিকপ্পে ৱুত্তনযেন ৱেদিতব্বো. অহিতানুকম্পিতা চ তংসমঙ্গিসত্তৱসেন. দিৱি ভৱাতি দিব্বা. গব্ভেন্তি পৰিপচ্চনৱসেন সন্তানং পবন্ধেন্তীতি গব্ভা. ‘‘ছন্নং দেৱলোকান’’ন্তি নিদস্সনৱচনমেতং. ব্ৰহ্মলোকস্সাপি হি দিব্বগব্ভভাৱো লব্ভতেৱ দিব্বৱিহাৰহেতুকত্তা. এৱঞ্চ কত্ৱা ‘‘ভাৱনং ভাৱযমানা’’তি ইদম্পি ৱচনং সমত্থিতং হোতি. ভৱন্তি এত্থ যথাৰুচি সুখসমপ্পিতাতি ভৱা, ৱিমানানি. দেৱভাৱাৱহত্তা দিব্বা. ৱুত্তনযেনেৱ গব্ভা. দানাদযো দেৱলোকসংৱত্তনিযপুঞ্ঞৱিসেসা.দিব্বা ভৱাতি দেৱলোকপৰিযাপন্না উপপত্তিভৱা. তদাৱহো হি কম্মভৱো পুব্বে গহিতো.

তযোচোদনাৰহৱণ্ণনা

৫১৩. অনিযমিতেনেৱাতি অনিযমেনেৱ ‘‘ত্ৱং এৱংদিট্ঠিকো এৱং সত্তানং অনত্থস্স কাৰকো’’তি এৱং অনুদ্দেসিকেনেৱ. মানন্তি ‘‘অহমেতং জানামি, অহমেতং পস্সামী’’তি এৱং পণ্ডিতমানং. ভিন্দিত্ৱাতি ৱিধমেত্ৱা, জহাপেত্ৱাতি অত্থো. তযো সত্থাৰেতি অসম্পাদিতঅত্তহিতো অনোৱাদকৰসাৱকো, অসম্পাদিতঅত্তহিতো ওৱাদকৰসাৱকো, সম্পাদিতঅত্তহিতো অনোৱাদকৰসাৱকোতি ইমে তযো সত্থাৰে. চতুত্থো পন সম্মাসম্বুদ্ধো ন চোদনাৰহো হোতীতি ‘‘তেন পুচ্ছিতে এৱ কথেস্সামী’’তি চোদনাৰহে তযো সত্থাৰে পঠমং দস্সেসি, পচ্ছা চতুত্থংসত্থাৰং. কামঞ্চেত্থ চতুত্থো সত্থা একো অদুতিযো অনঞ্ঞসাধাৰণো, তথাপি সো যেসং উত্তৰিমনুস্সধম্মানং ৱসেন ‘‘ধম্মমযো কাযো’’তি ৱুচ্চতি, তেসং সমুদাযভূতোপি তে গুণাৱযৱে সত্থুট্ঠানিযে কত্ৱা দস্সেন্তো ভগৱা ‘‘অযম্পি খো, লোহিচ্চ, সত্থা’’তি অভাসি.

অঞ্ঞাতি য-কাৰলোপেন নিদ্দেসো ‘‘সযং অভিঞ্ঞা’’তি আদীসু (দী. নি. ১.২৮, ৩৭, ৫২; ম. নি. ১.২৮৪; ২.৩৪১; অ. নি. ২.৫; ১০.১১; মহাৱ. ১১; ধ. প. ৩৫৩; কথা. ৪০৫) ৱিয. অঞ্ঞাযাতি চ তদত্থিযে সম্পদানৱচনন্তি আহ ‘‘আজাননত্থাযা’’তি. সাৱকত্তং পটিজানিত্ৱা ঠিতত্তা একদেসেনস্স সাসনং কৰোন্তীতি আহ ‘‘নিৰন্তৰং তস্স সাসনং অকত্ৱা’’তি. উক্কমিত্ৱা ৱত্তন্তীতি যথিচ্ছিতং কৰোন্তীতি অত্থো. পটিক্কমন্তিযাতি অনভিৰতিযা অগাৰৱেন অপগচ্ছন্তিযা, তেনাহ ‘‘অনিচ্ছন্তিযা’’তিআদি. একাযাতি একায ইত্থিযা. একো ইচ্ছেয্যাতি একো পুৰিসো তায অনিচ্ছন্তিযা সম্পযোগং কামেয্য. ওসক্কনাদিমুখেন ইত্থিপুৰিসসম্বন্ধনিদস্সনং গেহসিতঅপেক্খাৱসেন তস্স সত্থুনো সাৱকেসু পটিপত্তীতি দস্সেতি. অতিৱিয ৱিৰত্তভাৱতো দট্ঠুম্পি অনিচ্ছমানং. লোভেনাতি পৰিৱাৰৱসেন উপ্পজ্জনকলাভসক্কাৰলোভেন. তত্থ সম্পাদেহীতি তস্মিং পটিপত্তিধম্মে পতিট্ঠিতং কত্ৱা সম্পাদেহি. উজুং কৰোহি কাযৱঙ্কাদিৱিগমেন.

৫১৫. এৱং চোদনং অৰহতীতি এৱং ৱুত্তনযেন সাৱকেসু অপ্পোস্সুক্কভাৱাপাদনে নিযোজনৱসেন চোদনং অৰহতি, ন পঠমো ৱিয ‘‘এৱৰূপো তৱ লোভধম্মো’’তিআদিনা, ন চ দুতিযো ৱিয ‘‘অত্তানমেৱ তাৱ তত্থ সম্পাদেহী’’তিআদিনা. কস্মা? সম্পাদিতঅত্তহিততায ততিযস্স.

নচোদনাৰহসত্থুৱণ্ণনা

৫১৬. ‘‘ন চোদনাৰহো’’তি এত্থ যস্মা চোদনাৰহতা নাম সত্থুৱিপ্পটিপত্তিযা ৱা সাৱকৱিপ্পটিপত্তিযা ৱা উভযৱিপ্পটিপত্তিযা ৱা, তযিদং সব্বম্পি ইমস্মিং সত্থৰি নত্থি, তস্মা ন চোদনাৰহোতি ইমমত্থং দস্সেতুং ‘‘অযঞ্হী’’তিআদি ৱুত্তং.

৫১৭. মযা গহিতায দিট্ঠিযাতি সব্বসো অনৱজ্জে সম্মাপটিপন্নে পৰেসং সম্মদেৱ সম্মাপটিপত্তিং দেস্সেন্তে সত্থৰি অভূতদোসাৰোপনৱসেন মিচ্ছাগহিতায নিৰযগামিনিযা পাপদিট্ঠিযা. নৰকপপাতন্তি নৰকসঙ্খাতং মহাপপাতং. পপতন্তি তত্থাতি হি পপাতো. সগ্গমগ্গথলেতি সগ্গগামিমগ্গভূতে পুঞ্ঞধম্মথলে. সেসং সুৱিঞ্ঞেয্যমেৱ.

লোহিচ্চসুত্তৱণ্ণনায লীনত্থপ্পকাসনা.