৪-৫. সত্তাৱাসসুত্তাদিৱণ্ণনা

২৪-২৫. চতুত্থে সত্তা আৱসন্তি এতেসূতি সত্তাৱাসা, নানত্তসঞ্ঞিআদিভেদা সত্তনিকাযা. যস্মা তে তে সত্তনিৱাসা তপ্পৰিযাপন্নানং সত্তানং তায এৱ তপ্পৰিযাপন্নতায আধাৰো ৱিয ৱত্তব্বতং অৰহন্তি. সমুদাযাচাৰো হি অৱযৱস্স যথা ‘‘ৰুক্খে সাখা’’তি, তস্মা ‘‘সত্তানং আৱাসা, ৱসনট্ঠানানীতি অত্থো’’তি ৱুত্তং. সুদ্ধাৱাসাপি সত্তাৱাসোৱ ‘‘ন সো, ভিক্খৱে, সত্তাৱাসো সুলভৰূপো, যো মযা অনাৱুত্থপুব্বো ইমিনা দীঘেন অদ্ধুনা অঞ্ঞত্ৰ সুদ্ধাৱাসেহি দেৱেহী’’তি (দী. নি. ২.৯১) ৱচনতো. যদি এৱং তে কস্মা ইধ ন গহিতাতি তত্থ কাৰণমাহ ‘‘অসব্বকালিকত্তা’’তিআদি. ৱেহপ্ফলা পন চতুত্থেযেৱ সত্তাৱাসে ভজন্তীতি দট্ঠব্বং. পঞ্চমং উত্তানমেৱ.

সত্তাৱাসসুত্তাদিৱণ্ণনা নিট্ঠিতা.