৩. গহপতিৱগ্গো

১-৭. পঠমউগ্গসুত্তাদিৱণ্ণনা

২১-২৭. ততিযস্স পঠমদুতিযেসু নত্থি ৱত্তব্বং. ততিযে ‘‘হত্থগো’’তি ৱত্তব্বে ‘‘হত্থকো’’তি ৱুত্তং. সো হি ৰাজপুৰিসানং হত্থতো যক্খস্স হত্থং, যক্খস্স হত্থতো ভগৱতো হত্থং, ভগৱতো হত্থতো পুন ৰাজপুৰিসানং হত্থং গতত্তা নামতো হত্থকো আড়ৱকোতি জাতো. তেনাহ ‘‘আড়ৱকযক্খস্স হত্থতো হত্থেহি সম্পটিচ্ছিতত্তা হত্থকোতি লদ্ধনামো ৰাজকুমাৰো’’তি. চতুত্থাদীনি উত্তানত্থানেৱ.

পঠমউগ্গসুত্তাদিৱণ্ণনা নিট্ঠিতা.

৮. দুতিযবলসুত্তৱণ্ণনা

২৮. অট্ঠমে খীণাসৱস্স সব্বেসং সঙ্খাৰানং অনিচ্চতা অসম্মোহৱসেন কিচ্চতো মগ্গপঞ্ঞায সুপ্পটিৱিদ্ধা, ৱিপস্সনায আৰম্মণকৰণৱসেনপীতি দস্সেন্তো আহ ‘‘সহৱিপস্সনায মগ্গপঞ্ঞাযা’’তি. ইমে কামাতি দ্ৱেপি কামে ৱদতি. কিলেসৱসেন উপ্পজ্জমানো হি পৰিড়াহো ৱত্থুকামসন্নিস্সযো ৱত্থুকামৱিসযো ৱাতি দ্ৱেপি সপৰিড়াহট্ঠেন অঙ্গাৰকাসু ৱিযাতি ‘‘অঙ্গাৰকাসূপমা’’তি ৱুত্তা. অন্তো ৱুচ্চতি লামকট্ঠেন তণ্হা, ব্যন্তং ৱিগতন্তং ভূতন্তি ব্যন্তিভূতন্তি আহ ‘‘ৱিগতন্তভূত’’ন্তি, নিত্তণ্হন্তি অত্থো.

দুতিযবলসুত্তৱণ্ণনা নিট্ঠিতা.

৯. অক্খণসুত্তৱণ্ণনা

২৯. নৱমে যস্মা মহিদ্ধিকপেতা দেৱাসুৰানং আৱাহং গচ্ছন্তি, ৱিৱাহং ন গচ্ছন্তি, তস্মা পেত্তিৱিসযেনেৱ অসুৰকাযো গহিতোতি ৱেদিতব্বো. পেতাসুৰা পন পেতা এৱাতি তেসং পেতেহি সঙ্গহো অৱুত্তসিদ্ধোৱ.

অক্খণসুত্তৱণ্ণনা নিট্ঠিতা.

১০. অনুৰুদ্ধমহাৱিতক্কসুত্তৱণ্ণনা

৩০. দসমে অপ্পিচ্ছস্সাতি ন ইচ্ছস্স. অভাৱত্থো হেত্থ অপ্পসদ্দো ‘‘অপ্পডংসমকসৱাতাতপা’’তিআদীসু (অ. নি. ১০.১১) ৱিয. পচ্চযেসু অপ্পিচ্ছো পচ্চযপ্পিচ্ছো, চীৱৰাদিপচ্চযেসু ইচ্ছাৰহিতো. অধিগমপ্পিচ্ছোতি ঝানাদিঅধিগমৱিভাৱনে ইচ্ছাৰহিতো. পৰিযত্তিঅপ্পিচ্ছোতি পৰিযত্তিযং বাহুসচ্চৱিভাৱনে ইচ্ছাৰহিতো. ধুতঙ্গপ্পিচ্ছোতি ধুতঙ্গেসু অপ্পিচ্ছো ধুতঙ্গভাৱৱিভাৱনে ইচ্ছাৰহিতো. সন্তগুণনিগুহনেনাতি অত্তনি সংৱিজ্জমানানং ঝানাদিগুণানঞ্চেৱ বাহুসচ্চগুণস্স ধুতঙ্গগুণস্স চ নিগুহনেন ছাদনেন. সম্পজ্জতীতি নিপ্ফজ্জতি সিজ্ঝতি. নো মহিচ্ছস্সাতি মহতিযা ইচ্ছায সমন্নাগতস্স নো সম্পজ্জতি অনুধম্মস্সপি অনিপ্ফজ্জনতো. পৱিৱিত্তস্সাতি পকাৰেহি ৱিৱিত্তস্স. তেনাহ ‘‘কাযচিত্তউপধিৱিৱেকেহি ৱিৱিত্তস্সা’’তি. আৰম্ভৱত্থুৱসেনাতি ভাৱনাভিযোগৱসেন একীভাৱোৱ কাযৱিৱেকোতি অধিপ্পেতো, ন গণসঙ্গণিকাভাৱমত্তন্তি দস্সেতি. কম্মন্তি যোগকম্মং.

সত্তেহি কিলেসেহি চ সঙ্গণনং সমোধানং সঙ্গণিকা, সা আৰমিতব্বট্ঠেন আৰামো এতস্সাতি সঙ্গণিকাৰামো, তস্স. তেনাহ ‘‘গণসঙ্গণিকায চেৱা’’তিআদি. আৰদ্ধৱীৰিযস্সাতি পগ্গহিতৱীৰিযস্স. তঞ্চ খো উপধিৱিৱেকে নিন্নতাৱসেন ‘‘অযং ধম্মো’’তি ৱচনতো. এস নযো ইতৰেসুপি. ৱিৱট্টনিস্সিতংযেৱ হি সমাধানং ইধাধিপ্পেতং, তথা পঞ্ঞাপি. কম্মস্স-কতপঞ্ঞায হি ঠিতো কম্মৱসেন ভৱেসু নানপ্পকাৰো অনত্থোতি জানন্তো কম্মক্খযকৰং ঞাণং অভিপত্থেতি, তদত্থঞ্চ উস্সাহং কৰোতি. মানাদযো সত্তসন্তানং সংসাৰে পপঞ্চেন্তি ৱিত্থাৰেন্তীতি পপঞ্চাতি আহ ‘‘তণ্হামানদিট্ঠিপপঞ্চৰহিতত্তা’’তিআদি. সেসমেত্থ সুৱিঞ্ঞেয্যমেৱ.

অনুৰুদ্ধমহাৱিতক্কসুত্তৱণ্ণনা নিট্ঠিতা.

গহপতিৱগ্গৱণ্ণনা নিট্ঠিতা.