৯. নন্দসুত্তৱণ্ণনা

৯. নৱমে দুৱিধা কুলপুত্তা জাতিকুলপুত্তা আচাৰকুলপুত্তা চ. তত্থ ‘‘তেন খো পন সমযেন ৰট্ঠপালো কুলপুত্তো তস্মিংযেৱ থুল্লকোট্ঠিকে অগ্গকুলিকস্স পুত্তো’’তি (ম. নি. ২.২৯৪) এৱং আগতা উচ্চাকুলপুত্তা জাতিকুলপুত্তা. ‘‘সদ্ধাযেতে কুলপুত্তা অগাৰস্মা অনগাৰিযং পব্বজিতা’’তি (ম. নি. ৩.৭৮) এৱং আগতা পন যত্থ কত্থচি কুলে পসুতাপি আচাৰকুলপুত্তা নাম. ইধ পন উচ্চাকুলপ্পসুততং সন্ধায ‘‘কুলপুত্তোতি, ভিক্খৱে, নন্দং সম্মা ৱদমানো ৱদেয্যা’’তি ভগৱতা ৱুত্তন্তি আহ ‘‘জাতিকুলপুত্তো’’তি. উভোহিপি পন কাৰণেহি তস্স কুলপুত্তভাৱোযেৱ. সেসমেত্থ উত্তানমেৱ.

নন্দসুত্তৱণ্ণনা নিট্ঠিতা.