৬. নকুলপিতুসুত্তৱণ্ণনা

১৬. ছট্ঠে ৱিসভাগৱেদনুপ্পত্তিযা ককচেনেৱ চতুইৰিযাপথং ছিন্দন্তো আবাধযতীতি আবাধো, সো যস্স অত্থীতি আবাধিকো. তংসমুট্ঠানদুক্খেন দুক্খিতো. অধিমত্তগিলানোতি ধাতুসঙ্খযেন পৰিক্খীণসৰীৰো.

সপ্পটিভযকন্তাৰসদিসা সোড়সৱত্থুকা অট্ঠৱত্থুকা চ ৱিচিকিচ্ছা তিণ্ণা ইমাযাতি তিণ্ণৱিচিকিচ্ছা. ৱিগতা সমুচ্ছিন্না পৱত্তিআদীসু ‘‘এৱং নু খো ন নু খো’’তি এৱং পৱত্তিকা কথংকথা অস্সাতি ৱিগতকথংকথা. সাৰজ্জকৰানং পাপধম্মানং পহীনত্তা ৰাগৱিক্খেপেসু সীলাদিগুণেসু চ তিট্ঠকত্তা ৱেসাৰজ্জং, ৱিসাৰদভাৱং ৱেয্যত্তিযং পত্তাতি ৱেসাৰজ্জপ্পত্তা. অত্তনা এৱ পচ্চক্খতো দিট্ঠত্তা ন পৰং পচ্চেতি, নস্স পৰো পচ্চেতব্বো অত্থীতি অপৰপ্পচ্চযা.

গিলানা ৱুট্ঠিতোতি গিলানভাৱতো ৱুট্ঠায ঠিতো. ভাৱপ্পধানো হি অযং নিদ্দেসো. গিলানো হুত্ৱা ৱুট্ঠিতোতি ইদং পন অত্থমত্তনিদস্সনং.

নকুলপিতুসুত্তৱণ্ণনা নিট্ঠিতা.