২. ৱিত্থাৰসুত্তৱণ্ণনা

২৩৩. দুতিযে সব্যাবজ্ঝন্তি ৱা সদুক্খং, অত্তনা উপ্পাদেতব্বেন দুক্খেন সদুক্খন্তি অত্থো, দুক্খসংৱত্তনিকন্তি ৱুত্তং হোতি. কাযসঙ্খাৰাদীসু কাযদ্ৱাৰে গহণাদিৱসেন চোপনপ্পত্তা দ্ৱাদস অকুসলচেতনা অব্যাবজ্ঝকাযসঙ্খাৰো নাম. ৱচীদ্ৱাৰে হনুসংচোপনৱসেন ৱচীভেদপ্পৱত্তিকা তাযেৱ দ্ৱাদস ৱচীসঙ্খাৰো নাম. উভযচোপনং অপ্পত্ৱা ৰহো চিন্তেন্তস্স মনোদ্ৱাৰে পৱত্তা মনোসঙ্খাৰো নাম. ইতি তীসুপি দ্ৱাৰেসু কাযদুচ্চৰিতাদিভেদা অকুসলা চেতনাৱ সঙ্খাৰাতি ৱেদিতব্বা. অভিসঙ্খৰোতীতি আযূহতি, তং পন আযূহনং পচ্চযসমৱাযসিদ্ধিতো সঙ্কড্ঢিত্ৱা পিণ্ডনং ৱিয হোতি. সদুক্খং লোকন্তি অপাযলোকমাহ. ৱিপাকফস্সাতি ফস্সসীসেন তত্থ ৱিপাকপ্পৱত্তমাহ. ৱেমানিকপেতাতি ইদং বাহুল্লতো ৱুত্তং, ইতৰেসম্পি ৱিনিপাতিকানং কালেন সুখং, কালেন দুক্খং হোতি. তস্স পহানাযাতি তস্স যথাৱুত্তস্স কম্মস্স অনুপ্পত্তিধম্মতাপাদনায. যা চেতনাতি যা অপচযগামিনিচেতনা. তেনেৱাহ ‘‘ৱিৱট্টগামিনী মগ্গচেতনা ৱেদিতব্বা’’তি.

ৱিত্থাৰসুত্তৱণ্ণনা নিট্ঠিতা.