(২১) ১. সপ্পুৰিসৱগ্গো

১-১০. সিক্খাপদসুত্তাদিৱণ্ণনা

২০১-২১০. পঞ্চমস্স পঠমে অসপ্পুৰিসোতি লামকপুৰিসো. পাণং অতিপাতেতীতি পাণাতিপাতী. অদিন্নং আদিযতীতি অদিন্নাদাযী. কামেসু মিচ্ছা চৰতীতি কামেসুমিচ্ছাচাৰী. মুসা ৱদতীতি মুসাৱাদী. সুৰামেৰযমজ্জপমাদে তিট্ঠতীতি সুৰামেৰযমজ্জপমাদট্ঠাযী. পাণাতিপাতে সমাদপেতীতি যথা পাণং অতিপাতেতি, তথা নং তত্থ গহণং গণ্হাপেতি. সেসেসুপি এসেৱ নযো. অযং ৱুচ্চতীতি অযং এৱৰূপো পুগ্গলো যস্মা সযংকতেন চ দুস্সীল্যেন সমন্নাগতো, যঞ্চ সমাদপিতেন কতং, ততো উপড্ঢস্স দাযাদো, তস্মা ‘‘অসপ্পুৰিসেন অসপ্পুৰিসতৰো’’তি ৱুচ্চতি. সপ্পুৰিসোতি উত্তমপুৰিসো. সপ্পুৰিসেন সপ্পুৰিসতৰোতি অত্তনা চ কতেন সুসীল্যেন সমন্নাগতত্তা যঞ্চ সমাদপিতো কৰোতি, ততো উপড্ঢস্স দাযাদত্তা উত্তমপুৰিসেন উত্তমপুৰিসতৰো. এত্থ চ পৰেন কতং দুস্সীল্যং সুসীল্যং ৱা আণত্তিযা অত্তনা চ ৱচিপ্পযোগেন কতন্তি আণাপনৱসেন পসুতপাপস্স পুঞ্ঞস্স ৱা দাযাদো ‘‘ততো উপড্ঢস্স দাযাদো’’তি ৱুত্তো. দুতিযাদীনি উত্তানত্থানেৱ.

সিক্খাপদসুত্তাদিৱণ্ণনা নিট্ঠিতা.

সপ্পুৰিসৱগ্গৱণ্ণনা নিট্ঠিতা.

২১১-২২০. দুতিযো পৰিসাৱগ্গো উত্তানত্থোযেৱ.