(৬) ১. পুগ্গলৱগ্গৱণ্ণনা

৫৩. দুতিযপণ্ণাসকস্স পঠমে হিতগ্গহণেন মেত্তা ৱুত্তা হোতি, ন কৰুণা, অনুকম্পাগহণেন পন কৰুণাতি চক্কৱত্তিনা সদ্ধিং গহিতত্তা ‘‘লোকানুকম্পাযা’’তি ন ৱুত্তং. নিপ্পৰিযাযতো লোকানুকম্পা নাম সম্মাসম্বুদ্ধাধীনাতি. দ্ৱেতি মনুস্সদেৱসম্পত্তিৱসেন দ্ৱে সম্পত্তিযো. তা দ্ৱে, নিব্বানসম্পত্তি চাতি তিস্সো.

৫৪. দুতিযে বহুসো লোকে ন চিণ্ণা ন পৱত্তা মনুস্সাতি আচিণ্ণমনুস্সা. কদাচিদেৱ হি নেসং লোকে নিব্বত্তি অভূতপুব্বা ভূতাতি অব্ভুতমনুস্সা.

৫৫. ততিযে দসসু চক্কৱাড়সহস্সেসু অনুতাপং কৰোতি তস্স একবুদ্ধখেত্তভাৱতো.

৫৬. চতুত্থে থূপস্স যুত্তাতি ধাতুযো পক্খিপিত্ৱা থূপকৰণস্স যুত্তা.

৫৭. পঞ্চমে অত্তনো আনুভাৱেনাতি সযম্ভুঞাণেন. বুদ্ধাতি বুদ্ধৱন্তো.

৫৮. ছট্ঠে পহীনত্তা ন ভাযতীতি অত্তসিনেহাভাৱতো ন ভাযতি. সক্কাযদিট্ঠিগ্গহণঞ্চেত্থ নিদস্সনমত্তং, অত্তসিনেহস্স পটিঘস্স তদেকট্ঠসম্মোহস্স চ ৱসেন ভাযনং হোতীতি তেসম্পি পহীনত্তা ন ভাযতি, অঞ্ঞথা সোতাপন্নাদীনং অভযেন ভৱিতব্বং সিযা. সক্কাযদিট্ঠিযা বলৱত্তাতি এত্থ অহংকাৰসম্মোহনতাদীনম্পি বলৱত্তাতি ৱত্তব্বং.

৫৯. সত্তমে অস্সাজানীযোতি লিখন্তি, উসভাজানীযোতি পন পাঠোতি.

৬১. নৱমে তত্থাতি অন্তৰাপণে. একোতি দ্ৱীসু কিন্নৰেসু একো. অম্বিলিকাফলঞ্চ অদ্দসাতি আনেত্ৱা সম্বন্ধো. অম্বিলিকাফলন্তি তিন্তিণীফলন্তি ৱদন্তি, চতুৰম্বিলন্তি অপৰে. দ্ৱে অত্থেতি পাড়িযং ৱুত্তে দ্ৱে অত্থে.

৬২. দসমে যথাআৰদ্ধে কিচ্চে ৱত্তমানে অন্তৰা এৱ পটিগমনং পটিৱানং, নত্থি এতস্স পটিৱানন্তি অপ্পটিৱানো. তত্থ অসংকোচপ্পত্তো. তেনাহ ‘‘অনুক্কণ্ঠিতো’’তিআদি.

৬৩. একাদসমে সন্নিৱাসন্তি সহৱাসং. যথা অসপ্পুৰিসা সহ ৱসন্তা অঞ্ঞমঞ্ঞং অগাৰৱেন অনাদৰিযং কৰোন্তি, তপ্পটিক্খেপেন সপ্পুৰিসানং সগাৰৱপ্পটিপত্তিদস্সনপৰমিদং সুত্তং দট্ঠব্বং.

৬৪. দ্ৱাদসমে দ্ৱীসুপি পক্খেসূতি ৱিৱাদাপন্নানং ভিক্খূনং দ্ৱীসুপি পক্খেসু. সংসৰমানাতি পৱত্তমানা. দিট্ঠিপড়াসোতি দিট্ঠিসন্নিস্সযো পড়াসো যুগগ্গাহো. আঘাতেন্তোতি আহনন্তো বাধেন্তো. অনভিৰাধনৱসেনাতি যস্স উপ্পজ্জতি, তস্স তদঞ্ঞেসঞ্চ অত্থস্স অনভিৰাধনৱসেন. সব্বম্পেতন্তি ৱচীসংসাৰোতি সব্বম্পেতং. অত্তনো চিত্তে পৰিসায চ চিত্তেতি আনেত্ৱা সম্বন্ধো.

পুগ্গলৱগ্গৱণ্ণনা নিট্ঠিতা.