১. কোধপেয্যালং

১৮১. ইতো পৰেসু কোধৱগ্গাদীসু উপনন্ধনলক্খণোতি কুজ্ঝনৱসেন ‘‘অক্কোচ্ছি মং অৱধি ম’’ন্তিআদিনা (ধ. প. ৩, ৪) চিত্তপৰিযোনন্ধনলক্খণো. পুব্বকালিকং কোধং উপনয্হতি বন্ধতি, কুজ্ঝনাকাৰং পবন্ধতি ঘটেতি. আঘাতৱত্থুনা চিত্তং বন্ধন্তী ৱিয হোতীতি অপৰকালো কোধো উপনাহো. সুট্ঠু কতং কাৰণং উপকাৰো সুকতকাৰণং, তস্স পুব্বকাৰিতালক্খণস্স গুণস্স মক্খনং উদকপুঞ্ছনিযা ৱিয সৰীৰানুগতস্স উদকস্স পুঞ্ছনং ৱিনাসনং লক্খণমেতস্সাতি সুকতকৰণমক্খনলক্খণো. তথা হি সো পৰেসং গুণানং মক্খনট্ঠেন মক্খোতি ৱুচ্চতি. বহুস্সুতেপি পুগ্গলে অজ্ঝোত্থৰিংসু, ‘‘ঈদিসস্স চ বহুস্সুতস্স অনিযতা গহিতা, তৱ চ মম চ কো ৱিসেসো’’তিআদিনা নযেন উপ্পজ্জমানো যুগগ্গাহী পলাসোতি আহ ‘‘যুগগ্গাহলক্খণো পলাসো’’তি. তত্থ যুগগ্গাহো নাম সমধুৰগ্গাহো, অসমম্পি অত্তনা সমং কত্ৱা গণ্হনং. পলাসতীতি পলাসো, পৰেসং গুণে ডংসিত্ৱা দন্তেহি ৱিয ছিন্দিত্ৱা অত্তনো গুণেহি সমে কৰোতীতি অত্থো.

উসূযনলক্খণাতি পৰেসং সক্কাৰাদীনি খিয্যনলক্খণা. মচ্ছেৰস্স ভাৱো মচ্ছৰিযং. তঞ্চ আৱাসমচ্ছৰিযাদিৱসেন পঞ্চৱিধন্তি আহ ‘‘পঞ্চমচ্ছেৰভাৱো মচ্ছৰিয’’ন্তি. মচ্ছৰাযনলক্খণন্তি অত্তনো সম্পত্তিযা পৰেহি সাধাৰণভাৱে অসহনলক্খণং. কতপ্পটিচ্ছাদনলক্খণাতি কতপাপপ্পটিচ্ছাদনলক্খণা. কেৰাটিকভাৱেন উপ্পজ্জমানং সাঠেয্যন্তি আহ ‘‘কেৰাটিকলক্খণং সাঠেয্য’’ন্তি. অঞ্ঞথা অত্তনো পৱেদনপুগ্গলো কেৰাটিকো নেকতিকৱাণিজোতি ৱদন্তি. কেৰাটিকো হি পুগ্গলো আনন্দমচ্ছো ৱিয হোতি.

১৮৭. যথাভতং নিক্খিত্তো এৱং নিৰযেতি যথা আভতং কঞ্চি আহৰিত্ৱা ঠপিতো, এৱং অত্তনো কম্মুনা নিক্খিত্তো নিৰযে ঠপিতোযেৱাতি অত্থো.