৫-১০. মিগসালাসুত্তাদিৱণ্ণনা

৭৫-৮০. পঞ্চমে ইমস্স হি পুগ্গলস্স সীলৱিৰহিতস্স পঞ্ঞা সীলং পৰিধোৱতীতি অখণ্ডাদিভাৱাপাদনেন সীলং আদিমজ্ঝপৰিযোসানেসু পঞ্ঞায সুৱিসোধিতং কৰোতি. যস্স হি অব্ভন্তৰে সীলসংৱৰো নত্থি, উগ্ঘটিতঞ্ঞুতায পন চাতুপ্পদিকগাথাপৰিযোসানে পঞ্ঞায সীলং ধোৱিত্ৱা সহ পটিসম্ভিদাহি অৰহত্তং পাপুণাতি, অযং পঞ্ঞায সীলং ধোৱতি নাম সেয্যথাপি সন্ততিমহামত্তো.

সীলৱা পন পঞ্ঞং ধোৱতি. যস্স (দী. নি. অট্ঠ. ১.৩১৭) হি পুথুজ্জনস্স সীলং সট্ঠিঅসীতিৱস্সানি অখণ্ডং হোতি, সো মৰণকালেপি সব্বকিলেসে ঘাতেত্ৱা সীলেন পঞ্ঞং ধোৱিত্ৱা অৰহত্তং গণ্হাতি কন্দৰসালপৰিৱেণে মহাসট্ঠিৱস্সত্থেৰো ৱিয. থেৰে কিৰ মৰণমঞ্চে নিপজ্জিত্ৱা বলৱৱেদনায নিত্থুনন্তে তিস্সমহাৰাজা ‘‘থেৰং পস্সিস্সামী’’তি গন্ত্ৱা পৰিৱেণদ্ৱাৰে ঠিতো তং সদ্দং সুত্ৱা পুচ্ছি ‘‘কস্স সদ্দো অয’’ন্তি. থেৰস্স নিত্থুননসদ্দোতি. ‘‘পব্বজ্জায সট্ঠিৱস্সেন ৱেদনাপৰিগ্গহমত্তম্পি ন কতং, ইদানি ন তং ৱন্দিস্সামী’’তি নিৱত্তিত্ৱা মহাবোধিং ৱন্দিতুং গতো. ততো উপট্ঠাকদহৰো থেৰং আহ ‘‘কিং নো, ভন্তে, লজ্জাপেথ, সদ্ধোপি ৰাজা ৱিপ্পটিসাৰী হুত্ৱা ‘ন ৱন্দিস্সামী’তি গতো’’তি. কস্মা, আৱুসোতি? তুম্হাকং নিত্থুননসদ্দং সুত্ৱাতি. ‘‘তেন হি মে ওকাসং কৰোথা’’তি ৱত্ৱা ৱেদনং ৱিক্খম্ভেত্ৱা অৰহত্তং পত্ৱা দহৰস্স সঞ্ঞং অদাসি ‘‘গচ্ছাৱুসো, ইদানি ৰাজানং অম্হে ৱন্দাপেহী’’তি. দহৰো গন্ত্ৱা ‘‘ইদানি কিৰ থেৰং ৱন্দথা’’তি আহ. ৰাজা সুসুমাৰপতিতেন থেৰং ৱন্দন্তো ‘‘নাহং অয্যস্স অৰহত্তং ৱন্দামি, পুথুজ্জনভূমিযং পন ঠত্ৱা ৰক্খিতসীলমেৱ ৱন্দামী’’তি আহ. এৱং সীলেন পঞ্ঞং ধোৱতি নাম. সেসং ৱুত্তমেৱ. ছট্ঠাদীসু নত্থি ৱত্তব্বং.

মিগসালাসুত্তাদিৱণ্ণনা নিট্ঠিতা.

আকঙ্খৱগ্গৱণ্ণনা নিট্ঠিতা.