১-৮. ৱিৱাদসুত্তাদিৱণ্ণনা

৪১-৪৮. পঞ্চমস্স পঠমাদীনি উত্তানত্থানি. ছট্ঠে খণভঙ্গুৰতায ন নিচ্চা ন ধুৱাতি অনিচ্চা. ততো এৱ পণ্ডিতেহি ন ইচ্চা ন উপগন্তব্বাতিপি অনিচ্চা. স্ৱাযং নেসং অনিচ্চট্ঠো উদযৱযপৰিচ্ছিন্নতায ৱেদিতব্বোতি আহ ‘‘হুত্ৱা অভাৱিনো’’তি, উপ্পজ্জিত্ৱা ৱিনস্সকাতি অত্থো. সাৰৰহিতাতি নিচ্চসাৰধুৱসাৰঅত্তসাৰৱিৰহিতা. মুসাতি ৱিসংৱাদনট্ঠেন মুসা, একংসেন অসুভাদিসভাৱা তে বালানং সুভাদিভাৱেন উপট্ঠহন্তি, সুভাদিগ্গহণস্স পচ্চযভাৱেন সত্তে ৱিসংৱাদেন্তি. তেনাহ ‘‘নিচ্চসুভসুখা ৱিযা’’তিআদি. ন পস্সনসভাৱাতি খণপভঙ্গুৰতাইত্তৰপচ্চুপট্ঠানতায দিস্সমানা ৱিয হুত্ৱা অদস্সনপকতিকা. এতে হি খেত্তং ৱিয ৱত্থু ৱিয হিৰঞ্ঞসুৱণ্ণং ৱিয চ পঞ্ঞাযিত্ৱাপি কতিপাহেনেৱ সুপিনকে দিট্ঠা ৱিয ন পঞ্ঞাযন্তি. সত্তমট্ঠমানি সুৱিঞ্ঞেয্যানি.

ৱিৱাদসুত্তাদিৱণ্ণনা নিট্ঠিতা.