৫-৪২. সঙ্গাৰৱসুত্তাদিৱণ্ণনা

১১৭-১৫৪. পঞ্চমে অপ্পকাতি থোকা, ন বহূ. অথাযং ইতৰা পজাতি যা পনাযং অৱসেসা পজা সক্কাযদিট্ঠিতীৰমেৱ অনুধাৱতি, অযমেৱ বহুতৰাতি অত্থো. সম্মদক্খাতেতি সম্মা অক্খাতে সুকথিতে. ধম্মেতি তৱ দেসনাধম্মে. ধম্মানুৱত্তিনোতি তং ধম্মং সুত্ৱা তদনুচ্ছৱিকং পটিপদং পূৰেত্ৱা মগ্গফলসচ্ছিকৰণেন ধম্মানুৱত্তিনো. মচ্চুনো ঠানভূতন্তি কিলেসমাৰসঙ্খাতস্স মচ্চুনো নিৱাসট্ঠানভূতং. সুদুত্তৰং তৰিত্ৱা পাৰমেস্সন্তীতি যে জনা ধম্মানুৱত্তিনো, তে এতং সুদুত্তৰং দুৰতিক্কমং মাৰধেয্যং তৰিত্ৱা অতিক্কমিত্ৱা নিব্বানপাৰং গমিস্সন্তি.

কণ্হং ধম্মং ৱিপ্পহাযাতি কাযদুচ্চৰিতাদিভেদং অকুসলং ধম্মং জহিত্ৱা. সুক্কং ভাৱেথাতি পণ্ডিতো ভিক্খু অভিনিক্খমনতো পট্ঠায যাৱ অৰহত্তমগ্গা কাযসুচৰিতাদিভেদং সুক্কং ধম্মং ভাৱেয্য. ওকা অনোকমাগম্মাতি ওকং ৱুচ্চতি আলযো, অনোকং ৱুচ্চতি অনালযো. আলযতো নিক্খমিত্ৱা অনালযসঙ্খাতং নিব্বানং পটিচ্চ আৰব্ভ.

তত্ৰাভিৰতিমিচ্ছেয্যাতি যস্মিং অনালযসঙ্খাতে ৱিৱেকে নিব্বানে ইমেহি সত্তেহি দুৰভিৰমং, তত্ৰাভিৰতিমিচ্ছেয্য. দুৱিধেপি কামেতি ৱত্থুকামকিলেসকামে. চিত্তক্লেসেহীতি পঞ্চহি নীৱৰণেহি অত্তানং পৰিযোদপেয্য ৱোদাপেয্য, পৰিসোধেয্যাতি অত্থো.

সম্বোধিযঙ্গেসূতি সম্বোজ্ঝঙ্গেসু. সম্মা চিত্তং সুভাৱিতন্তি সম্মা হেতুনা নযেন চিত্তং সুট্ঠু ভাৱিতং ৱড্ঢিতং. জুতিমন্তোতি আনুভাৱৱন্তো, অৰহত্তমগ্গঞাণজুতিযা খন্ধাদিভেদে ধম্মে জোতেত্ৱা ঠিতাতি অত্থো. তে লোকে পৰিনিব্বুতাতি তে ইমস্মিং খন্ধাদিলোকে পৰিনিব্বুতা নাম অৰহত্তপ্পত্তিতো পট্ঠায কিলেসৱট্টস্স খেপিতত্তা সউপাদিসেসেন, চৰিমচিত্তনিৰোধেন খন্ধৱট্টস্স খেপিতত্তা অনুপাদিসেসেন চাতি দ্ৱীহি পৰিনিব্বানেহি পৰিনিব্বুতা, অনুপাদানো ৱিয পদীপো অপণ্ণত্তিকভাৱং গতাতি অত্থো.

ইতো পৰং যাৱ ততিযো পণ্ণাসকো, তাৱ উত্তানত্থমেৱ.

সঙ্গাৰৱসুত্তাদিৱণ্ণনা নিট্ঠিতা.

ততিযপণ্ণাসকং নিট্ঠিতং.