১-১২. সমণসঞ্ঞাসুত্তাদিৱণ্ণনা

১০১-১১২. ততিযস্স পঠমাদীনি উত্তানানি. ছট্ঠে নিজ্জৰকাৰণানীতি পজহনকাৰণানি. ইমস্মিং মগ্গো কথীযতীতি কত্ৱা ‘‘অযং হেট্ঠা…পে… পুন গহিতা’’তি ৱুত্তং. কিঞ্চাপি নিজ্জিণ্ণা মিচ্ছাদিট্ঠীতি আনেত্ৱা সম্বন্ধিতব্বং. যথা মিচ্ছাদিট্ঠি ৱিপস্সনায নিজ্জিণ্ণাপি ন সমুচ্ছিন্নাতি সমুচ্ছেদপ্পহানদস্সনত্থং পুন গহিতা, এৱং মিচ্ছাসঙ্কপ্পাদযোপি ৱিপস্সনায পহীনাপি অসমুচ্ছিন্নতায ইধ পুন গহিতাতি অযমত্থো ‘‘মিচ্ছাসঙ্কপ্পস্সা’’তিআদীসু সব্বপদেসু ৱত্তব্বোতি দস্সেতি ‘‘এৱং সব্বপদেসু যোজেতব্বো’’তি ইমিনা. এত্থ চাতি ‘‘সম্মাৱিমুত্তিপচ্চযা চ অনেকে কুসলা ধম্মা ভাৱনাপাৰিপূৰিং গচ্ছন্তী’’তি এতস্মিং পাড়িপদে. এত্থ চ সমুচ্ছেদৱসেন চ পটিপ্পস্সদ্ধিৱসেন চ পটিপক্খধম্মানং সম্মদেৱ ৱিমুচ্চনং সম্মাৱিমুত্তি. তপ্পচ্চযা চ মগ্গফলেসু অট্ঠ ইন্দ্ৰিযানি ভাৱনাপাৰিপূৰিং উপগচ্ছন্তীতি মগ্গসম্পযুত্তানিপি সদ্ধাদীনি ইন্দ্ৰিযানি উদ্ধটানি. মগ্গৱসেন হি ফলেসু ভাৱনাপাৰিপূৰী নামাতি. অভিনন্দনট্ঠেনাতি অতিৱিয সিনেহনট্ঠেন. ইদঞ্হি সোমনস্সিন্দ্ৰিযং উক্কংসগতসাতসভাৱতো সম্পযুত্তধম্মে সিনেহন্তং তেমেন্তং ৱিয পৱত্ততি. পৱত্তসন্ততিআধিপতেয্যট্ঠেনাতি ৱিপাকসন্তানস্স জীৱনে অধিপতিভাৱেন. এৱন্তিআদি ৱুত্তস্সেৱ অত্থস্স নিগমনং. সত্তমাদীনি উত্তানত্থানি.

সমণসঞ্ঞাসুত্তাদিৱণ্ণনা নিট্ঠিতা.

সমণসঞ্ঞাৱগ্গৱণ্ণনা নিট্ঠিতা.