৮. অট্ঠমো পৰিচ্ছেদো

পকিণ্ণকনিদ্দেসো

৪৭৫. ইদানি পন সব্বেসং, এতেসং মানসং মযা;

পাটৱত্থায ভিক্খূনং, কথীযতি পকিণ্ণকং.

৪৭৬. পন্থমক্কটকো নাম, দিসাসু পন পঞ্চসু;

তত্থ সুত্তং পসাৰেত্ৱা, জালমজ্ঝে নিপজ্জতি.

৪৭৭. পঠমায দিসাযেত্থ, সুত্তে পন পসাৰিতে;

পাণকেন পটঙ্গেন, ঘট্টিতে মক্খিকায ৱা.

৪৭৮. নিপন্নট্ঠানতো কিঞ্চি, চলিত্ৱা উণ্ণনাভি তু;

গন্ত্ৱা সুত্তানুসাৰেন, যূসং পিৱতি তস্স সা.

৪৭৯. পুনাগন্ত্ৱান তত্থেৱ, নিপজ্জতি যথাসুখং;

এৱমেৱ কৰোতেৱ, দিসাসু দুতিযাদিসু.

৪৮০. পসাদা পঞ্চ দট্ঠব্বা, সুত্তং পঞ্চদিসাস্ৱিৱ;

চিত্তং পন চ দট্ঠব্বং, মজ্ঝে মক্কটকো ৱিয.

৪৮১. পাণকাদীহি সুত্তস্স, তস্স সঙ্ঘট্টনা ৱিয;

পসাদানং তু দট্ঠব্বা, ঘট্টনাৰম্মণেন হি.

৪৮২. চলনং ৱিয তংমজ্ঝে, নিপন্নাযুণ্ণনাভিযা;

পসাদঘট্টনং তত্থ, গহেত্ৱাৰম্মণং পন.

৪৮৩. মনোধাতুক্ৰিযাচিত্তং, ভৱঙ্গাৱট্টনং মতং;

তস্সা সুত্তানুসাৰংৱ, ৱীথিচিত্তপৱত্তনং.

৪৮৪. সীসে পনস্স ৱিজ্ঝিত্ৱা, যূসপানংৱ চেতসো;

আৰম্মণেসু দট্ঠব্বং, জৱনস্স পৱত্তনং.

৪৮৫. পুনাগন্ত্ৱা যথা সুত্ত-জালমজ্ঝে নিপজ্জনং;

ৱত্থুংযেৱ চ নিস্সায, চিত্তস্স পৰিৱত্তনং.

৪৮৬. ইদং তু পন ওপম্মং, অত্থং দীপেতি কিং তু হি;

আৰম্মণেন পঠমং, পসাদে ঘট্টিতে পন.

৪৮৭. পসাদৱত্থুতো চিত্তা, ৱত্থুসন্নিস্সিতং মনো;

ততো হি পঠমংযেৱ, জাযতীতি হি দীপিতং.

৪৮৮. একেকাৰম্মণং দ্ৱীসু, দ্ৱীসু দ্ৱাৰেসু সব্বসো;

আগচ্ছতি তেনাপাথং, অযমত্থোপি দীপিতো.

৪৮৯. ৰূপং চক্খুপসাদম্হি, ঘট্টিত্ৱা তঙ্খণে পন;

মনোদ্ৱাৰে তথাপাথ-মাগচ্ছতি নিসংসযো.

৪৯০. খগো যথা হি ৰুক্খগ্গে, নিলীযন্তোৱ সাখিনো;

সাখং ঘট্টেতি তস্সীধ, ছাযা ফৰতি ভূমিযং.

৪৯১. সাখায ঘট্টনচ্ছাযা, ফৰণানি চ সব্বসো;

অপুব্বাচৰিমং এক-ক্খণস্মিংযেৱ জাযৰে.

৪৯২. এৱমেৱ চ ৰূপস্স, পসাদস্স চ ঘট্টনং;

ভৱঙ্গচলনস্সাপি, পচ্চযত্তেন অত্থতো.

৪৯৩. তথেৱ চ মনোদ্ৱাৰে, আপাথগমনম্পি চ;

অপুব্বাচৰিমং এক-ক্খণস্মিংযেৱ হোতিতি.

৪৯৪. ততো ভৱঙ্গং ছিন্দিত্ৱা, চক্খুদ্ৱাৰে যথাক্কমং;

আৱজ্জনে সমুপ্পন্নে, দস্সনে সম্পটিচ্ছনে.

৪৯৫. সন্তীৰণে সমুপ্পন্নে, ততো ৱোট্ঠব্বনেপি চ;

কুসলং জৱনং চিত্তং, তথাকুসলমেৱ ৱা.

৪৯৬. এসো এৱ নযো সোত-দ্ৱাৰাদীসুপি ৱিঞ্ঞুনা;

অৱিসেসেন ৱিঞ্ঞেয্যো, সদ্দাদীনং তু ঘট্টনে.

৪৯৭. দোৱাৰিকোপমাদীনি, এতস্সত্থস্স দীপনে;

উদ্ধৰিত্ৱান তানেত্থ, দস্সেতব্বানি ৱিঞ্ঞুনা.

৪৯৮. অসম্ভেদেন চক্খুস্স, ৰূপাপাথগমেন চ;

আলোকনিস্সযেনাপি, সমনক্কাৰহেতুনা.

৪৯৯. পচ্চযেহি পনেতেহি, সমেতেহি চতূহিপি;

জাযতে চক্খুৱিঞ্ঞাণং, সম্পযুত্তেহি তং সহ.

৫০০. অসম্ভেদেন সোতস্স, সদ্দাপাথগমেন চ;

আকাসনিস্সযেনাপি, সমনক্কাৰহেতুনা.

৫০১. পচ্চযেহি পনেতেহি, সমেতেহি চতূহিপি;

জাযতে সোতৱিঞ্ঞাণং, সম্পযুত্তেহি তং সহ.

৫০২. অসম্ভেদেন ঘানস্স, গন্ধাপাথগমেন চ;

ৱাযোসন্নিস্সযেনাপি, সমনক্কাৰহেতুনা.

৫০৩. পচ্চযেহি পনেতেহি, সমেতেহি চতূহিপি;

জাযতে ঘানৱিঞ্ঞাণং, সম্পযুত্তেহি তং সহ.

৫০৪. অসম্ভেদেন জিৱ্হায, ৰসাপাথগমেন চ;

আপোসন্নিস্সযেনাপি, সমনক্কাৰহেতুনা.

৫০৫. পচ্চযেহি পনেতেহি, সমেতেহি চতূহিপি;

জাযতে জিৱ্হাৱিঞ্ঞাণং, সম্পযুত্তেহি তং সহ.

৫০৬. অসম্ভেদেন কাযস্স, ফোট্ঠব্বাপাথসঙ্গমা;

পথৱীনিস্সযেনাপি, সমনক্কাৰহেতুনা.

৫০৭. পচ্চযেহি পনেতেহি, সমেতেহি চতূহিপি;

জাযতে কাযৱিঞ্ঞাণং, সম্পযুত্তেহি তং সহ.

৫০৮. অসম্ভেদা মনস্সাপি, ধম্মাপাথগমেন চ;

ৱত্থুসন্নিস্সযেনাপি, সমনক্কাৰহেতুনা.

৫০৯. পচ্চযেহি পনেতেহি, সমেতেহি চতূহিপি;

মনোৱিঞ্ঞাণমেৱং তু, সম্পযুত্তেহি জাযতে.

৫১০. মনো ভৱঙ্গচিত্তন্তি, ৱেদিতব্বং ৱিভাৱিনা;

আৱজ্জনক্ৰিযাচিত্তং, সমনক্কাৰোতি সঞ্ঞিতং.

৫১১. ৱত্থুসন্নিস্সযেনাতি, নাযং সব্বত্থ গচ্ছতি;

ভৱং তু পঞ্চৱোকাৰং, সন্ধায কথিতো পন.

৫১২. পটিসন্ধাদিচিত্তানি, সব্বানেকূনৱীসতি;

কামে দস চ ৰূপেসু, পঞ্চ চত্তাৰিৰূপিসু.

৫১৩. কম্মং কম্মনিমিত্তঞ্চ, তথা গতিনিমিত্তকং;

ইদং হি তিৱিধং তেসং, আৰম্মণমুদীৰিতং.

৫১৪. কামাৱচৰসন্ধীনং, পৰিত্তাৰম্মণং মতং;

পচ্চুপ্পন্নমতীতং ৱা, হোতি নত্থি অনাগতং.

৫১৫. অট্ঠেৱ চ মহাপাকা, তীণি সন্তীৰণানি চ;

একাদসৱিধং চিত্তং, তদাৰম্মণসঞ্ঞিতং.

৫১৬. একাদসৱিধে চিত্তে, তদাৰম্মণসঞ্ঞিতে;

দস পুঞ্ঞৱিপাকানি, একং হোতি অপুঞ্ঞজং.

৫১৭. মহাপাকা ন জাযন্তে, ৰূপাৰূপভৱদ্ৱযে;

কামে ৰূপে ভৱে চেৱ, হোতি সন্তীৰণত্তযং.

৫১৮. তদাৰম্মণচিত্তানি, যানি ৱুত্তানি সত্থুনা;

তেসু চিত্তং পনেকম্পি, ৰূপাৰূপভৱদ্ৱযে.

৫১৯. ন তদাৰম্মণং হুত্ৱা, পৱত্ততি কদাচিপি;

কস্মা ন হোতি চে তত্থ, বীজস্সাভাৱতো পন.

৫২০. পটিসন্ধিবীজং নত্থেত্থ, কামাৱচৰসঞ্ঞিতং;

ৰূপাদিগোচৰে তস্স, ভৱেয্য জনকং তু যং.

৫২১. চক্খুৱিঞ্ঞাণকাদীনং, নত্থিতাপজ্জতীতি চে;

নিন্দ্ৰিযানং পৱত্তানু-ভাৱতো চিত্তসম্ভৱো.

৫২২. একন্তেন যথা চেতং, তদাৰম্মণমানসং;

নপ্পৱত্ততি সব্বম্পি, ৰূপাৰূপভৱদ্ৱযে.

৫২৩. অকামাৱচৰধম্মেপি, তদেতং নানুবন্ধতি;

কস্মা অজনকত্তা হি, জনকস্সাসমানতো.

৫২৪. জনকং তেন তুল্যং ৱা, কামাৱচৰসঞ্ঞিতং;

কুসলাকুসলাদিং তু, জৱনং অনুবন্ধতি.

৫২৫. কামাৱচৰধম্মাপি, যে মহগ্গতগোচৰা;

হুত্ৱা ৱত্তন্তি তে চাপি, ইদং নেৱানুবন্ধতি.

৫২৬. পৰিত্তাৰম্মণত্তা চ, একন্তেন পনস্স হি;

তথাপৰিচিতত্তা চ, নানুবন্ধতি সব্বদা.

৫২৭. কিং তেন যুত্তিৱাদেন, ৱুত্তং অট্ঠকথাসু হি;

তদাৰম্মণচিত্তানি, একাদসপি সব্বসো.

৫২৮. নামগোত্তং পনাৰব্ভ, জৱনে জৱিতেপি চ;

তদাৰম্মণং ন গণ্হন্তি, ৰূপাৰূপভৱেসু ৱা.

৫২৯. যদা পঞ্ঞত্তিমাৰব্ভ, জৱনে জৱিতেপি ৱা;

তথা ৱিপস্সনাযাপি, লক্খণাৰম্মণায চ.

৫৩০. তদাৰম্মণা ন লব্ভন্তি, মিচ্ছত্তনিযতেসুপি;

ন লোকুত্তৰধম্মেপি, আৰব্ভ জৱনে গতে.

৫৩১. তথা মহগ্গতে ধম্মে, আৰব্ভ জৱনে পন;

পটিসম্ভিদাঞাণানি, আৰব্ভ জৱিতেপি চ.

৫৩২. মনোদ্ৱাৰেপি সব্বেসং, জৱনানমনন্তৰং;

তদাৰম্মণচিত্তানি, ভৱন্তি অনুপুব্বতো.

৫৩৩. ন ৱিজ্জতি মনোদ্ৱাৰে, ঘট্টনাৰম্মণস্স হি;

কথং ভৱঙ্গতো হোতি, ৱুট্ঠানং পন চেতসো.

৫৩৪. মনোদ্ৱাৰেপি আপাথ-মাগচ্ছন্তেৱ গোচৰা;

ঘট্টনায ৱিনা তস্মা, চিত্তানং হোতি সম্ভৱো.

৫৩৫. দ্ৱাদসাপুঞ্ঞচিত্তানং, ৱিপাকা সত্তসত্ততি;

ভৱন্তি চতুৰাসীতি, পাপপাকা পৱত্তিযং.

৫৩৬. একাদসৱিধানং তু, হিত্ৱা উদ্ধচ্চমানসং;

একাদসৱিধা চেৱ, ভৱন্তি পটিসন্ধিযো.

৫৩৭. ক্ৰিযচিত্তেসু সব্বেসু, জৱনং ন চ হোতি যং;

তং ৱে কৰণমত্তত্তা, ৱাতপুপ্ফসমং মতং.

৫৩৮. জৱনত্তং তু সম্পত্তং, কিচ্চসাধনতো পন;

ছিন্নমূলস্স ৰুক্খস্স, পুপ্ফংৱ অফলং সিযা.

৫৩৯. পটিচ্চ পন এতস্মা, ফলমেতীতি পচ্চযো;

যো ধম্মো যস্স ধম্মস্স, ঠিতিযুপ্পত্তিযাপি ৱা.

৫৪০. উপকাৰো হি সো তস্স, পচ্চযোতি পৱুচ্চতি;

সম্ভৱোপভৱো হেতু, কাৰণং পচ্চযো মতো.

৫৪১. লোভাদি পন যো ধম্মো, মূলট্ঠেনুপকাৰকো;

হেতূতি পন সো ধম্মো, ৱিঞ্ঞাতব্বো ৱিভাৱিনা.

৫৪২. লোভো দোসো চ মোহো চ,

তথালোভাদযো তযো;

ছড়েৱ হেতুযো হোন্তি,

জাতিতো নৱধা সিযুং.

৫৪৩. ধম্মানং কুসলাদীনং, কুসলাদিত্তসাধকো;

মূলট্ঠোতি ৱদন্তেৱং, একে আচৰিযা পন.

৫৪৪. এৱং সন্তে তু হেতূনং, তংসমুট্ঠানৰূপিসু;

হেতুপচ্চযতা নেৱ, সম্পজ্জতি কদাচিপি.

৫৪৫. ন হি তে পন ৰূপানং, সাধেন্তি কুসলাদিকং;

ন তেসং পন ৰূপানং, পচ্চযা ন চ হোন্তি তে.

৫৪৬. তস্মা হি কুসলাদীনং, কুসলাদিত্তসাধকো;

মূলট্ঠোতি ন গন্তব্বো, ৱিঞ্ঞুনা সমযঞ্ঞুনা.

৫৪৭. সুপ্পতিট্ঠিতভাৱস্স, সাধনেনুপকাৰকো;

মূলট্ঠোতি চ হেতূনং, ৱিঞ্ঞাতব্বো ৱিভাৱিনা.