৪. চতুত্থো পৰিচ্ছেদো

ৱিঞ্ঞাণক্খন্ধপকিণ্ণকনযসঙ্খেপো

১৯২. একধাদিনযোদানি, পটুৱড্ঢায যোগিনং;

ৱুচ্চতে ৱিসযগ্গাহা, সব্বমেকৱিধং মনং.

১৯৩. একাসীতি তিভূমট্ঠং, লোকিযং সুত্তৰঞ্চ তং;

সেসং লোকুত্তৰং অট্ঠ, অনুত্তৰঞ্চিতী দ্ৱিধা.

১৯৪. লোকপাকক্ৰিযাহেতূ, চেকহেতূতি সত্তহি;

তিংস নাধিপতি সাধি-পতি সেসাতিপী দ্ৱিধা.

১৯৫. ছন্দচিত্তীহৱীমংসা-স্ৱেকেন মতিমা যুতং;

ৱিনা ৱীমংসমেকেন, ঞাণহীনমনং যুতং.

১৯৬. পৰিত্তানপ্পমাণানি, মহগ্গতমনানিতি;

তিধা ছনৱ চট্ঠ চ, তিনৱা চ যথাক্কমং.

১৯৭. দ্ৱিপঞ্চ চিত্তং ৱিঞ্ঞাণং, তিস্সো হি মনোধাতুযো;

ছসত্ততি মনোঞাণ-ধাতূতি তিৱিধা পুন.

১৯৮. একাৰম্মণচিত্তানি, অনভিঞ্ঞং মহগ্গতং;

অমলং পঞ্চৱিঞ্ঞাণং, নৱপঞ্চ ভৱন্তিমে.

১৯৯. পঞ্চালম্বং মনোধাতু, সাভিঞ্ঞং কামধাতুজং;

সেসং ছাৰম্মণং তং হি, তেচত্তালীস সঙ্খ্যতো.

২০০. কামপাকদুসা চাদি-মগ্গো চাদিক্ৰিযা দুৱে;

ৰূপা সব্বেতিৰূপে ন, তেচত্তালীস হোন্তিমে.

২০১. ৱিনাৱ ৰূপেনাৰুপ্প-ৱিপাকা চতুৰো সিযুং;

দ্ৱেচত্তালীস সেসানি, ৱত্তন্তুভযথাপি চ.

২০২. চতুধাপি অহেত্ৱেকদ্ৱিহেতুকতিহেতুতো;

অট্ঠাৰস দ্ৱে বাৱীস, সত্তচত্তালিসং ভৱে.

২০৩. কামে জৱা সৱোট্ঠব্বা, অভিঞ্ঞাদ্ৱযমেৱ চ;

ৰূপিৰিযাপথৱিঞ্ঞত্তিকৰামে চতুৰট্ঠকা.

২০৪. ছব্বীসতি জৱা সেসা, কৰা ৰূপিৰিযাপথে;

দ্ৱিপঞ্চমনৱজ্জানি, কামৰূপফলানি চ.

২০৫. আদিক্ৰিযাতি চেকূন-ৱীস ৰূপকৰা ইমে;

সেসা চুদ্দস ভিন্নাৱচুতি সন্ধি ন তীণিপি.

২০৬. এককিচ্চাদিতো পঞ্চ-ৱিধা তত্থেককিচ্চকা;

দ্ৱিপঞ্চচিত্তং জৱনং, মনোধাতুট্ঠসট্ঠিমে.

২০৭. দ্ৱিকিচ্চাদীনি ৱোট্ঠব্বং, সুখতীৰং মহগ্গতে;

পাকা কামমহাপাকা, সেসা তীৰা যথাক্কমং.

২০৮. দস্সনং সৱনং দিট্ঠং, সুতং ঘাযনকাদিকং;

তযং মুতং মনোধাতুত্তযং দিট্ঠং সুতং মুতং.

২০৯. দিট্ঠং সুতং মুতং ঞাতং, সাভিঞ্ঞং সেসকামিকং;

ৱিঞ্ঞাতাৰম্মণং সেসমেৱং ছব্বিধমীৰযে.

২১০. সত্তধা সত্তৱিঞ্ঞাণধাতূনং তু ৱসা ভৱে;

ৱুচ্চতেদানি তস্সেৱ, অনন্তৰনযক্কমো.

২১১. পুঞ্ঞেস্ৱাদিদ্ৱযা কামে, ৰূপপুঞ্ঞমনন্তকং;

তপ্পাদকুত্তৰানন্তং, ভৱঙ্গঞ্চাদিতীৰণং.

২১২. দুতিযন্তদ্ৱযা তীৰং, ভৱঙ্গং ততিযদ্ৱযা;

তে অনন্তামলং পুঞ্ঞং, মজ্ঝত্তঞ্চ মহগ্গতং.

২১৩. সব্বৱাৰে সযঞ্চেতি, তেপঞ্ঞাস তিসত্ত চ;

তেত্তিংস চ ভৱন্তেতে, ৰূপেসু পন পুঞ্ঞতো.

২১৪. তপ্পাকা চ মতিযুত্ত-কামপাকা সযং দস;

আৰুপ্পপুঞ্ঞতো তে চ, সকো পাকো সযং পুন.

২১৫. অধোপাকা চ অন্তম্হা, ততিযঞ্চ ফলন্তিমে;

দসেকদ্ৱিতিপঞ্চাহি, মগ্গা চেকং সকং ফলং.

২১৬. লোভমূলেকহেতূহি, অন্তকামসুভা ৱিয;

সত্ত দোসদ্ৱযা কাম-ভৱঙ্গপেক্খৱা সযং.

২১৭. মহাপাকতিহেতূহি, সাৱজ্জা সব্বসন্ধিযো;

কামচ্চুতীহি সেসাহি, সাৱজ্জা কামসন্ধিযো.

২১৮. কামচ্চুতি চ ৱোট্ঠব্বং, সযঞ্চ সুখতীৰতো;

পটিচ্ছা তীৰণানি দ্ৱে, ইতৰা সকতীৰণং.

২১৯. সকং সকং পটিচ্ছং তু, ৱিঞ্ঞাণেহি দ্ৱিপঞ্চহি;

ৰূপপাকেহি সাৱজ্জা, সন্ধিযোহেতুৱজ্জিতা.

২২০. অৰূপপাকেস্ৱাদিম্হা, কামপাকা তিহেতুকা;

অন্তাৱজ্জম্পি চাৰুপ্প-পাকা চ নৱ হোন্তিমে.

২২১. দুতিযাদীহি তেযেৱ, অধোপাকং ৱিনা ৱিনা;

ফলা তিহেতুকা পাকা, সযঞ্চেতি চতুদ্দস.

২২২. দ্ৱিপঞ্চাদিক্ৰিযা হাসা, সযঞ্চাৰুপ্পৱজ্জিতা;

ঞাণযুত্তভৱঙ্গাতি, দস ৱোট্ঠব্বতো পন.

২২৩. কামে জৱা ভৱঙ্গা চ, কামৰূপে সযম্পি ৱা;

নৱপঞ্চ সহেতাদি-কিৰিযদ্ৱযতো পন.

২২৪. সযং ভৱঙ্গমতিমা, ৰূপে সাতক্ৰিযাপি চ;

তপ্পাদকন্তিমঞ্চেতি, বাৱীস ততিযা পন.

২২৫. তে চ পাকা সযঞ্চন্তে, ফলং মজ্ঝা মহগ্গতা;

ক্ৰিযাতি ৱীসতি হোন্তি, সেসদ্ৱীহি দুকেহি তু.

২২৬. ৱুত্তপাকা সযঞ্চেতি, চুদ্দসেৱং ক্ৰিযাজৱা;

তদাৰম্মণং মুঞ্চিত্ৱা, পট্ঠাননযতো নযে.

২২৭. অথ সাতক্ৰিযা সাতং, সেসং সেসক্ৰিযাপি চ;

তদালম্বং যথাযোগং, ৱদে অট্ঠকথানযা.

২২৮. মহগ্গতা ক্ৰিযা সব্বা, সকপুঞ্ঞসমা তহিং;

অন্তা ফলন্তিমং হোতি, অযমেৱ ৱিসেসতা.

২২৯. ইমস্সানন্তৰা ধম্মা, এত্তকাতি পকাসিতা;

ইমং পনেত্তকেহীতি, ৱুচ্চতেযং নযোধুনা.

২৩০. দ্ৱীহি কামজৱা তীহি, ৰূপাৰূপা চতূহি তু;

মগ্গা ছহি ফলাদি দ্ৱে, সেসা দ্ৱে পন সত্তহি.

২৩১. একম্হা দস পঞ্চহি, পটিচ্ছা সুখতীৰণং;

কামে দোসক্ৰিযাহীন-জৱেহি গহতো সকা.

২৩২. কামে জৱা ক্ৰিযাহীনা, তদালম্বা সৱোট্ঠব্বা;

সগহঞ্চেতি তেত্তিংসচিত্তেহি পৰতীৰণা.

২৩৩. কামপুঞ্ঞসুখীতীৰকণ্হৱোট্ঠব্বতো দ্ৱযং;

মহাপাকন্তিমং হোতি, অনাৰুপ্পচুতীহি চ.

২৩৪. সত্ততিংস পনেতানি, এত্থ হিত্ৱা দুসদ্ৱযং;

এতেহি পঞ্চতিংসেহি, জাযতে দুতিযদ্ৱযং.

২৩৫. সুখতীৰাদি সত্তেতে, ক্ৰিযতো চাপি সম্ভৱা;

ঞেয্যা সেসানি চত্তাৰি, ভৱঙ্গেন চ লব্ভৰে.

২৩৬. মগ্গৱজ্জা সৱোট্ঠব্বসুখিতীৰজৱাখিলা;

চুতীতি নৱকট্ঠাহি, ততিযদ্ৱযমাদিসে.

২৩৭. এতেহি দোসৱজ্জেহি, সত্ততীহিতৰদ্ৱযং;

ৰূপপাকা ৱিনাৰুপ্পপাকাহেতুদুহেতুকে.

২৩৮. তেহেৱেকূনসট্ঠীহি, হোন্তিৰুপ্পাদিকং ৱিনা;

হাসাৱজ্জে জৱে ৰূপে, অট্ঠছক্কেহি তেহি তু.

২৩৯. সাধোপাকেহি তেহেৱ, দুতিযাদীনি অত্তনা;

অধোধোজৱহীনেহি, একেকূনেহি জাযৰে.

২৪০. সুখতীৰভৱঙ্গানি, সযঞ্চাতি তিসত্তহি;

অন্তাৱজ্জং অনাৰুপ্পভৱঙ্গেহি পনেতৰং.

২৪১. ৱুত্তানন্তৰসঙ্খাতো, নযো দানি অনেকধা;

পুগ্গলাদিপ্পভেদাপি, পৱত্তি তস্স ৱুচ্চতে.

২৪২. পুথুজ্জনস্স জাযন্তে, দিট্ঠিকঙ্খাযুতানি ৱে;

সেক্খস্সেৱামলা সত্ত, অনন্তানিতৰস্স তু.

২৪৩. অন্তামলং অনাৱজ্জক্ৰিযা চেকূনৱীসতি;

কুসলাকুসলা সেসা, হোন্তি সেক্খপুথুজ্জনে.

২৪৪. ইতৰানি পনাৱজ্জদ্ৱযং পাকা চ সাসৱা;

তিণ্ণন্নম্পি সিযুং এৱং, পঞ্চধা সত্তভেদতো.

২৪৫. কামে সোড়স ঘানাদিত্তযং দোসমহাফলা;

ৰূপাৰূপে সপাকোতি, পঞ্চৱীসতি একজা.

২৪৬. কামপাকা চ সেসাদিমগ্গো আদিক্ৰিযা দুৱে;

ৰূপে জৱাতি বাৱীস, দ্ৱিজা সেসা তিধাতুজা.

২৪৭. ৱিত্থাৰোপি চ ভূমীসু, ঞেয্যো কামসুভাসুভং;

হাসৱজ্জমহেতুঞ্চ, অপাযে সত্ততিংসিমে.

২৪৮. হিত্ৱা মহগ্গতে পাকে, অসীতি সেসকামিসু;

চক্খুসোতমনোধাতু, তীৰণং ৱোট্ঠব্বম্পি চ.

২৪৯. দোসহীনজৱা সো সো, পাকো ৰূপে অনাৰিযে;

পঞ্চসট্ঠি ছসট্ঠী তু, পৰিত্তাভাদীসু তীসু.

২৫০. আদিপঞ্চামলা কঙ্খাদিট্ঠিযুত্তে ৱিনা তহিং;

তেযেৱ পঞ্চপঞ্ঞাস, জাযৰে সুদ্ধভূমিসু.

২৫১. আদিমগ্গদুসাহাসৰূপহীনজৱা সকো;

পাকো ৱোট্ঠব্বনঞ্চাতি, তিতালীসং সিযুং নভে.

২৫২. অধোধোমনৱজ্জা তে,

পাকো চেৱ সকো সকো;

দুতিযাদীসু জাযন্তে,

দ্ৱে দ্ৱে ঊনা ততো ততো.

২৫৩. অৰূপেস্ৱেকমেকস্মিং, ৰূপেস্ৱাদিত্তিকেপি চ;

তিকে চ ততিযে একং, দ্ৱে হোন্তি দুতিযত্তিকে.

২৫৪. অন্তিমং ৰূপপাকং তু, ছসু ৱেহপ্ফলাদিসু;

কামসুগতিযংযেৱ, মহাপাকা পৱত্তৰে.

২৫৫. ঘাযনাদিত্তযং কামে, পটিঘদ্ৱযমেৱ চ;

সত্তৰসেসু পঠমং, অমলং মানৱাদিসু.

২৫৬. অৰিযাপাযৱজ্জেসু, চতুৰোদিপ্ফলাদিকা;

অপাযাৰুপ্পৱজ্জেসু, হাসৰূপসুভক্ৰিযং.

২৫৭. অপাযুদ্ধত্তযং হিত্ৱা, হোতাকাসসুভক্ৰিযং;

তথাপাযুদ্ধদ্ৱে হিত্ৱা, ৱিঞ্ঞাণকুসলক্ৰিযং.

২৫৮. ভৱগ্গাপাযৱজ্জেসু, আকিঞ্চঞ্ঞসুভক্ৰিযং;

দিট্ঠিকঙ্খাযুতা সুদ্ধে, ৱিনা সব্বাসু ভূমিসু.

২৫৯. অমলানি চ তীণন্তে,

ভৱগ্গে চ সুভক্ৰিযা;

মহাক্ৰিযা চ হোন্তেতে,

তেৰসেৱানপাযিসু.

২৬০. অনাৰুপ্পে মনোধাতু, দস্সনং সৱতীৰণং;

কামে অনিট্ঠসংযোগে, ব্ৰহ্মানং পাপজং ফলং.

২৬১. ৱোট্ঠব্বং কামপুঞ্ঞঞ্চ, দিট্ঠিহীনং সউদ্ধৱং;

চুদ্দসেতানি চিত্তানি, জাযৰে তিংসভূমিসু.

২৬২. ইন্দ্ৰিযানি দুৱে অন্তদ্ৱযৱজ্জেস্ৱহেতুসু;

তীণি কঙ্খেতৰাহেতুপাপে চত্তাৰি তেৰস.

২৬৩. ছ ঞাণহীনে তব্বন্তসাসৱে সত্ত নিম্মলে;

চত্তালীসে পনট্ঠেৱং, ঞেয্যমিন্দ্ৰিযভেদতো.