১১. একাদসমো পৰিচ্ছেদো

ৱিপস্সনাৱিভাগো

১৫০৬. দ্ৱিধা সমুট্ঠানধুৰা, তিৱিধা ভূমিযো মতা;

তিৱিধাভিনিৱেসা চ, সৰীৰং তু চতুব্বিধং.

১৫০৭. তিৱিধা ভাৱনা তত্থ, সঙ্খাৰেসু যথাৰহং;

দুৱিধাকাৰমাৰব্ভ, নিজ্ঝাযতি তিলক্খণং.

১৫০৮. অট্ঠাৰসাকাৰভিন্না, দসাৱত্থা ৱিভাৱিতা;

তিধা ৱিভাগা সাধেতি, ৱিমোক্খত্তযমুত্তমং.

১৫০৯. চতুসচ্চপটিৱেধা, সত্তট্ঠাৰিযপুগ্গলা;

ক্লেসহানী যথাযোগং, চতস্সো পটিসম্ভিদা.

১৫১০. তিৱিধা চ সমাপত্তি, নিৰোধা চ তথাপৰা;

নিস্সন্দফলমিচ্চাহু, তস্সা সাসনকোৱিদা.

১৫১১. ৱিপস্সনাভাৱনায-মিতি ভাসন্তি পণ্ডিতা;

তমিদানি পৱক্খামি, যথানুক্কমতো কথং.

১৫১২. ভূমিধম্মে পৰিগ্গয্হ, ৱিচিনন্তস্স যোগিনো;

সতিযা সমথা ৱাথ, সমুট্ঠাতি ৱিপস্সনা.

১৫১৩. সভাৱপটিৱেধে চ, সদ্ধম্মপটিপত্তিযং;

পঞ্ঞাসদ্ধাদ্ৱযং তস্সা, ধুৰমাহু ধুৰন্ধৰা.

১৫১৪. তেভূমকসভাৱানং, সপ্পচ্চযপৰিগ্গহো;

ঞাতপৰিঞ্ঞা নামাযং, ভূমীতি পঠমা মতা.

১৫১৫. কলাপতো সম্মসনং, উদযব্বযদস্সনং;

পৰিঞ্ঞাতীৰণা নাম, দুতিযা ভূমি ভাসিতা.

১৫১৬. পহানপৰিঞ্ঞা ভূমি, ততিযাহু ততোপৰং;

ভঙ্গাদিঞাণমিচ্চেৱং, তিৱিধা ভূমিযো মতা.

১৫১৭. খণসন্ততিঅদ্ধান-ৱসেনেত্থ সমীৰিতা;

অনিচ্চা দুক্খানত্তাতি, তিৱিধাভিনিৱেসনা.

১৫১৮. দিট্ঠিকঙ্খাৱিতৰণা, মগ্গামগ্গপটিপ্পদা;

ৱিসুদ্ধিযো চতস্সোপি, সৰীৰন্তি নিদস্সিতা.

১৫১৯. সলক্খণৱৱত্থানং, পচ্চযাকাৰনিচ্ছযো;

কুম্মগ্গপৰিহাৰো চ, তিলক্খণৱিপস্সনা.

১৫২০. ইতি লক্খণভিন্নত্তা, লব্ভন্তেকক্খণেপি চ;

দেসিতা হেতুভূতেন, কমেনেৱং ৱিসুদ্ধিযো.

১৫২১. সীলব্বিসুদ্ধিআদীনং, তথা সাৱ পৰম্পৰা;

চিত্তব্বিসুদ্ধিআদীনমত্থাযাতি পকাসিতা.

১৫২২. দিস্সমানসভাৱানং, পস্সন্তো পচ্চযট্ঠিতি;

পৰিপন্থৱিমুত্তো হি, পটিপাদেতি ভাৱনং.

১৫২৩. তথাপি চ ৱিসেসেন, পটিপন্নস্স যোগিনো;

তত্থ তত্থ ৱিভূতত্তা, ঠানতো ভেদিতা কথং.

১৫২৪. ৰূপপুব্বঙ্গমং ৱাথ, নামপুব্বঙ্গমং তথা;

অজ্ঝত্তং ৱা বহিদ্ধা ৱা, যথাপাকটধম্মতো.

১৫২৫. নামৰূপাদিভেদেন, ভূমিধম্মপৰিগ্গহো;

ৱুত্তা দিট্ঠিৱিসুদ্ধীতি, অত্তদিট্ঠিপ্পহানতো.

১৫২৬. আহচ্চ পচ্চযুপ্পন্না, তথা তব্ভাৱভাৱিনো;

পৱত্তন্তীতি সঙ্খাৰে, পস্সতো পন যোনিসো.

১৫২৭. পচ্চযগ্গাহিনী পঞ্ঞা, নামৰূপপ্পৱত্তিযা;

কঙ্খা তৰন্তি তাযাতি, কঙ্খাৱিতৰণা মতা.

১৫২৮. অনিচ্চা দুক্খানত্তাতি, পচ্চযাযত্তৱুত্তিতো;

সঙ্খিপিত্ৱা কলাপেন, সম্মসীযন্তি সঙ্খতা.

১৫২৯. উপ্পাদৱযভাৱোপি, লক্খণত্তযসাধকো;

পচ্চযাকাৰমাৰব্ভ, লক্খীযতি ৱিসেসতো.

১৫৩০. তস্মা সম্মসনঞাণং, উদযব্বযদস্সনং;

কঙ্খাৱিতৰণাযং তু, সঙ্গয্হতি ৱিসুদ্ধিযং.

১৫৩১. তত্থ সংক্লেসৱিক্খেপং, কুম্মগ্গং পৰিৱজ্জতো;

মগ্গামগ্গৱিসুদ্ধীতি, ঞাণদস্সনমীৰিতং.

১৫৩২. ততো কথেন্তি অক্লিট্ঠমুদযব্বযদস্সনং;

আদিং কত্ৱা পটিপদাঞাণদস্সনসুদ্ধিযং.

১৫৩৩. পচ্চযপচ্চযুপ্পন্নে, যথাৱত্থুৱৱত্থিতে;

পহাতুমীহমানানং, নিয্যানপটিপত্তিতো.

১৫৩৪. উপক্লেসৱিসুদ্ধো হি, পুনদেৱোদযব্বযং;

অধিট্ঠহিত্ৱা ভঙ্গাদি-ঞাণেহি পটিপজ্জতি.

১৫৩৫. তথা চাভিনৱুপ্পন্নে, ভিজ্জমানে ৱিপস্সতো;

সংৱেগকড্ঢিতং ঞাণং, ভঙ্গাদিমনুতিট্ঠতি.

১৫৩৬. ততো পুব্বে পৱত্তা হি, সংক্লেসাপাযসম্ভৱা;

পটিপত্তিৱিসুদ্ধীতি, ন সঙ্গয্হতি ভাৱনা.

১৫৩৭. সম্পাদেন্তো পনিচ্চেতা, চতস্সোপি ৱিসুদ্ধিযো;

অনিচ্চা দুক্খানত্তাতি, ভাৱেয্য তিৱিধা কথং.

১৫৩৮. পচ্চযপচ্চযুপ্পন্না, জাতানন্তৰভেদিনো;

অনিচ্চা চ পভঙ্গূ চ, পলুজ্জন্তি চৱন্তি চ.

১৫৩৯. অদ্ধুৱা চ অসাৰা চ, ৱিভৱা চ ৱিনাসিনো;

সঙ্খতা ৱিপৰিণাম-ধম্মা ইত্তৰকালিকা.

১৫৪০. খযধম্মা ৱযধম্মা, লহুকালপ্পৱত্তিনো;

তাৱকালিকধম্মা চ, পৰিত্তট্ঠিতিকা তথা.

১৫৪১. খণত্তযপৰিচ্ছিন্না, পুব্বাপৰৱিচিত্তকা;

পুৰক্খতা নিৰোধস্স, সস্সতা ন কুদাচনং.

১৫৪২. জাযন্তি পৰিহানায, ন তু জাযন্তি ৱুদ্ধিযা;

জিয্যমানাৱ তিট্ঠন্তি, জিণ্ণা ভঙ্গপৰাযণা.

১৫৪৩. অহুত্ৱাযেৱুপ্পজ্জন্তি, ন কুতোচিপি আগতা;

হুত্ৱা অন্তৰধাযন্তি, ন তু কত্থচি সঞ্চিতা.

১৫৪৪. তং তং পচ্চযসামগ্গি-মত্তলাভায নিস্সিতা;

নিৰোধধম্মা জাযন্তি, জাতা ব্যন্তি ভৱন্তি তে.

১৫৪৫. যথা নদী পব্বতেয্যা, যথা দীপসিখা তথা;

সীঘসীঘং পৱত্তন্তা, উপ্পজ্জন্তি ৱযন্তি চ.

১৫৪৬. জাতা জাতা নিৰুজ্ঝন্তি, অঞ্ঞে অঞ্ঞে তু জাযৰে;

অৱীচি অনুসম্বন্ধা, ন জানন্তি ৱিসেসতো.

১৫৪৭. ইতি নানপ্পকাৰেন, ৱিপস্সন্তো ৱিচক্খণো;

অনিচ্চভাৱনং ধীৰো, পৰিপাচেতি সাধুকং.

১৫৪৮. দুক্খা চ দুক্খৱত্থূ চ, অভিণ্হপৰিপীড়িতা;

ৰোগা গণ্ডা চ সল্লা চ, অঘতো চ উপদ্দৱা.

১৫৪৯. ভযোপসগ্গাঘমূলা,

সাসৱাদীনৱীতিতা;

অলেণাসৰণাতাণা,

ৱধকা মাৰকামিসা.

১৫৫০. জাতিধম্মা জৰাব্যাধি-

সোকোপাযাসভাগিনো;

পৰিদেৱসভাৱা চ,

সংক্লেসা দুক্খভাগিনো.

১৫৫১. জেগুচ্ছা পটিকূলা চ, বীভচ্ছা চ ৱিৰূপিনো;

অজঞ্ঞা চপলা হীনা, দুগ্গন্ধা বালসেৱিতা.

১৫৫২. সোকন্তৰিকতানিচ্চং, তণ্হায কড্ঢিতা ভুসং;

কপণা দুগ্গতা দীনা, ৱিপন্না চ ৱিঘাতিনো.

১৫৫৩. অত্তলাভং গৱেসন্তি, তংতংপচ্চযনিস্সিতা;

দুক্খাধিট্ঠানমচ্চন্তং, জাতা পুন ৱিহঞ্ঞৰে.

১৫৫৪. অগ্গিকূপে নিমুগ্গাৱ, ক্লেসসন্তাপভাগিনো;

ওৱিদ্ধা ৱিয সত্তীহি, সঙ্খাৰা নিচ্চদুক্খিতা.

১৫৫৫. জাযমানা চ জিয্যন্তা, মিয্যন্তা চ খণে খণে;

পসুকা ৱিয নিচ্চম্মা, হঞ্ঞন্তি সেৰিকাতুৰা.

১৫৫৬. তিলানি তিলযন্তেৱ, উচ্ছুযন্তেৱ উচ্ছুযো;

উদযব্বযাৱস্সং তে, পীড়যন্তি অভিণ্হসো.

১৫৫৭. মনোৰমনৱাকাৰা, ৱিপল্লাসপৰিক্খতা;

ইৰিযাপথসঞ্ছন্না, নোপতিট্ঠন্তি দুক্খতো.

১৫৫৮. সঙ্খাৰেসু পনেতেসু, ৱেদনাস্সাদৰোধিনো;

সাৱ সন্দুলসম্বদ্ধা, সম্মোহপৰিৱাৰিতা.

১৫৫৯. ‘‘অদুং দুক্খমিদং দুক্খ’’-মিতি সংসাৰচাৰিনো;

দুক্খহেতুমজানন্তা, সম্ভমন্তি অৱিদ্দসু.

১৫৬০. সুখাকাৰমপস্সন্তা, দুক্খভাৰনিপীড়িতা;

পত্থেন্তি দুক্খমেৱঞ্ঞং, বালা ব্যসনভাগিনো.

১৫৬১. চৱন্তা উপপজ্জন্তা, ৰুক্খসাখংৱ মক্কটো;

দুক্খমেকং ৱিমুচ্চন্তি, ততো গণ্হন্তি চাপৰং.

১৫৬২. তে দীঘৰত্তং সোচন্তি, তণ্হাসল্লসমপ্পিতা;

দিট্ঠিপাসসমুপেতা, মানত্থম্ভানুসাযিনো.

১৫৬৩. তমাকাৰং পনিচ্চেৱং, ৱিপস্সন্তো ৱিসাৰদো;

দুক্খানুপস্সনং নাম, পৰিপাচেতি ভাৱনং.

১৫৬৪. ধম্মট্ঠিতিনিযামা হি, খন্ধাযতনধাতুযো;

অনত্তাসস্সতন্তা চ, ঈহাভোগৱিৱজ্জিতা.

১৫৬৫. পযোজনমধিট্ঠায, ন তু ব্যাপাৰযন্তি চ;

পচ্চযপচ্চযুপ্পন্না, জনেতুং ৱাথ জাযিতুং.

১৫৬৬. তথাপি হেতুসামগ্গি-সম্ভৱে সম্ভৱন্তি তে;

তব্ভাৱভাৱিভাৱেন, অঞ্ঞমঞ্ঞপৱত্তিতা.

১৫৬৭. অজাযিতুং ন সক্কোন্তি, সতি পচ্চযসম্ভৱে;

পচ্চযানমলাভে তু, ন জাযন্তি কুদাচনং.

১৫৬৮. ন কিঞ্চেত্থ অপেক্খিত্ৱা, সমগ্গা হোন্তি পচ্চযা;

ন জনেতুং ন সক্কোন্তি, সমগ্গা চ কুদাচনং.

১৫৬৯. যথাপচ্চযলাভেন, পৱত্তন্তি যথা তথা;

ৰক্খিতা ৱা ৱিধাতা ৱা, নত্থি অস্সামিকা তথা.

১৫৭০. ‘‘অহং মম’’ন্তি গণ্হন্তা, পৰিণামেন্তি অঞ্ঞথা;

ৱিস্সসন্তা হৰন্তেতে, পৰাভূতা পলম্ভিনো.

১৫৭১. ৰিত্তা তুচ্ছা চ সুঞ্ঞা চ, ৱিৱিত্তা সাৰৱজ্জিতা;

সলক্খণপৰিচ্ছিন্না, ধম্মা নত্থেত্থ পুগ্গলো.

১৫৭২. জাযমানা চ জিয্যন্তা, মিয্যমানা চ সঙ্খতা;

ৱিৱসা পৰিৱত্তন্তি, ৱসো তেসং ন কত্থচি.

১৫৭৩. ন তেসু কস্সচিস্সেৰং, ন তেসঞ্চত্থি কত্থচি;

ন চত্তনীতি সঙ্খাৰা, আধিপচ্চৱিৱজ্জিতা.

১৫৭৪. কদলীপত্তৱট্টীৱ, অঞ্ঞমঞ্ঞপতিট্ঠিতা;

সহজাতগ্ঘনীভূতা, নোপট্ঠন্তি অনত্ততো.

১৫৭৫. অৰূপনিস্সিতং ৰূপং, অৰূপং ৰূপনিস্সিতং;

জচ্চন্ধপীঠসপ্পীৱ, অঞ্ঞমঞ্ঞৱৱত্থিতং.

১৫৭৬. যন্তসুত্তেন যন্তংৱ, কাযযন্তং পৱত্ততি;

নামাৱকড্ঢিতং তত্থ, নত্থি অত্তা সযংৱসী.

১৫৭৭. চেতোৱিপ্ফাৰনিপ্ফন্না, ৱাযোধাতুসমুট্ঠিতা;

ইৰিযাপথৱিঞ্ঞত্তিৱিকাৰা পালকা মতা.