২১. একৱীসতিমো পৰিচ্ছেদো

পটিপদাঞাণদস্সনৱিসুদ্ধিনিদ্দেসো

১২৯৮. অট্ঠঞাণৱসেনেৱ, সিখাপক্কা ৱিপস্সনা;

নৱমং পটিপদাঞাণ-দস্সনন্তি পৱুচ্চতি.

১২৯৯. অট্ঠ ঞাণানি নামেত্থ, ৱেদিতব্বানি ৱিঞ্ঞুনা;

উপক্লেসৱিনিমুত্তং, ঞাণং সুৱিসদং পন.

১৩০০. উদযব্বযে চ ভঙ্গে চ, ভযে আদীনৱে তথা;

নিব্বিদাপস্সনাঞাণং, ঞাণং মুচ্চিতুকম্যতা.

১৩০১. পটিসঙ্খা চ সঙ্খাৰে, উপেক্খাঞাণমট্ঠমং;

ইমানি অট্ঠ ঞাণানি, নৱমং সচ্চানুলোমকং.

১৩০২. সচ্চানুলোমঞাণন্তি, অনুলোমং পৱুচ্চতি;

তং সম্পাদেতুকামেন, যোগাৱচৰভিক্খুনা.

১৩০৩. উদযব্বযঞাণং তং, আদিং কত্ৱা পনট্ঠসু;

এতেসু পন ঞাণেসু, যোগো কৰণিযো পন.

১৩০৪. যথানুক্কমতো তস্স, তেসু ঞাণেসু অট্ঠসু;

অনিচ্চাদিৱসেনেৱ, যোগং কত্ৱা ঠিতস্স হি.

১৩০৫. অনিচ্চং দুক্খমনত্তাতি, সঙ্খাৰে অনুপস্সতো;

অট্ঠন্নং পন ঞাণানং, ৱসেন পন যোগিনো.

১৩০৬. ৱিপস্সনা সিখাপত্তা, হোতি ৱুট্ঠানগামিনী;

সচ্চানুলোমঞাণন্তি, অযমেৱ পৱুচ্চতি.

১৩০৭. সঙ্খাৰুপেক্খাঞাণং তং, আসেৱন্তস্স যোগিনো;

ইদানি তস্স মগ্গো চ, সমুপ্পজ্জিস্সতীতি হি.

১৩০৮. সঙ্খাৰুপেক্খা সঙ্খাৰে, অনিচ্চা দুক্খাতি ৱা তথা;

সম্মসিত্ৱা ভৱঙ্গং তু, পুন ৱোতৰতেৱ সা.

১৩০৯. ভৱঙ্গানন্তৰং সঙ্খাৰু-পেক্খাগতনযেন তু;

অনিচ্চাদিৱসেনেৱ, সঙ্খাৰে পন গোচৰং.

১৩১০. কুৰুমানং মনোদ্ৱাৰে, জাযতাৱজ্জনং ততো;

ভৱঙ্গাৱট্টনং কত্ৱা, জাতস্সানন্তৰং পন.

১৩১১. সঙ্খাৰে গোচৰং কত্ৱা, পঠমং জৱনমানসং;

উপ্পজ্জতীতি তং চিত্তং, পৰিকম্মন্তি ৱুচ্চতি.

১৩১২. তদনন্তৰমেৱঞ্ঞং, সঙ্খাৰাৰম্মণং পুন;

দুতিযং জৱনং হোতি, উপচাৰন্তি তং মতং.

১৩১৩. তদনন্তৰং তং হোতি, তথা সঙ্খাৰগোচৰং;

ততিযং জৱনচিত্তং, অনুলোমন্তি সঞ্ঞিতং.

১৩১৪. পুৰিমানং পনট্ঠন্নং, ঞাণানং অনুলোমতো;

বোধিপক্খিযধম্মানং, উদ্ধঞ্চ অনুলোমতো.

১৩১৫. তেনেৱ তং হি সচ্চানুলোমঞাণং পৱুচ্চতি;

ইদং হি পন সচ্চানু-লোমঞাণং মহেসিনা.

১৩১৬. ‘‘ৱুট্ঠানগামিনীযা হি, পৰিযোসান’’ন্তি ভাসিতং;

ঞেয্যং সব্বপকাৰেন, পৰিযোসানন্তি গোত্ৰভু.

১৩১৭. ইতিনেকেহি নামেহি, কিত্তিতাযা মহেসিনা;

ৱুট্ঠানগামিনী সন্তা, পৰিসুদ্ধা ৱিপস্সনা.

১৩১৮. ৱুট্ঠাতুকামো সংসাৰদুক্খপঙ্কা মহব্ভযা;

কৰেয্য সততং তত্থ, যোগং পণ্ডিতজাতিকো.

ইতি অভিধম্মাৱতাৰে পটিপদাঞাণদস্সনৱিসুদ্ধিনিদ্দেসো নাম

একৱীসতিমো পৰিচ্ছেদো.