১৪. চুদ্দসমো পৰিচ্ছেদো

ৰূপাৱচৰসমাধিভাৱনানিদ্দেসো

৭৮৯. ভাৱনানযমহং হিতানযং,

মানযঞ্চ সুগতং সুখানযং;

ব্যাকৰোমি পৰমং ইতো পৰং,

তং সুণাথ মধুৰত্থৱণ্ণনং.

৭৯০. উত্তৰং তু মনুস্সানং, ধম্মতো ঞাণদস্সনং;

পত্তুকামেন কাতব্বং, আদিতো সীলসোধনং.

৭৯১. সঙ্কস্সৰসমাচাৰে, দুস্সীলে সীলৱজ্জিতে;

নত্থি ঝানং কুতো মগ্গো, তস্মা সীলং ৱিসোধযে.

৭৯২. সীলং চাৰিত্তৱাৰিত্তৱসেন দুৱিধং মতং;

তং পনাচ্ছিদ্দমক্খণ্ডমকম্মাসমনিন্দিতং.

৭৯৩. কত্তব্বং অত্থকামেন, ৱিৱেকসুখমিচ্ছতা;

সীলঞ্চ নাম ভিক্খূনং, অলঙ্কাৰো অনুত্তৰো.

৭৯৪. ৰতনং সৰণং খেমং, তাণং লেণং পৰাযণং;

চিন্তামণি পণীতো চ, সীলং যানমনুত্তৰং.

৭৯৫. সীতলং সলিলং সীলং, কিলেসমলধোৱনং;

গুণানং মূলভূতঞ্চ, দোসানং বলঘাতি চ.

৭৯৬. তিদিৱাৰোহণঞ্চেতং, সোপানং পৰমুত্তমং;

মগ্গো খেমো চ নিব্বাননগৰস্স পৱেসনে.

৭৯৭. তস্মা সুপৰিসুদ্ধং তং, সীলং দুৱিধলক্খণং;

কত্তব্বং অত্থকামেন, পিযসীলেন ভিক্খুনা.

৭৯৮. কাতব্বো পন সীলস্মিং, পৰিসুদ্ধে ঠিতেনিধ;

পলিবোধস্সুপচ্ছেদো, পলিবোধা দসাহু চ.

৭৯৯. ‘‘আৱাসো চ কুলং লাভো,

গণো কম্মঞ্চ পঞ্চমং;

অদ্ধানং ঞাতি আবাধো,

গন্থো ইদ্ধীতি তে দসা’’তি.

৮০০. পলিবোধস্সুপচ্ছেদং, কত্ৱা দসৱিধস্সপি;

উপসঙ্কমিতব্বো সো, কম্মট্ঠানস্স দাযকো.

৮০১. পিযো গৰু ভাৱনীযো, ৱত্তা চ ৱচনক্খমো;

গম্ভীৰঞ্চ কথং কত্তা, নো চট্ঠানে নিযোজকো.

৮০২. এৱমাদিগুণোপেতমুপগন্ত্ৱা হিতেসিনং;

কল্যাণমিত্তং কালেন, কম্মট্ঠানস্স দাযকং.

৮০৩. কম্মট্ঠানং গহেতব্বং, ৱত্তং কত্ৱা পনস্স তু;

তেনাপি চৰিতং ঞত্ৱা, দাতব্বং তস্স ভিক্খুনো.

৮০৪. চৰিতং পনিদং ৰাগদোসমোহৱসেন চ;

সদ্ধাবুদ্ধিৱিতক্কানং, ৱসেন ছব্বিধং মতং.

৮০৫. ৱোমিস্সকনযা তেসং, চতুসট্ঠি ভৱন্তি তে;

তেহি অত্থো ন চত্থীতি, ন মযা ইধ দস্সিতা.

৮০৬. অসুভা চ দসেৱেত্থ, তথা কাযগতাসতি;

একাদস ইমে ৰাগ-চৰিতস্সানুকূলতা.

৮০৭. চতস্সো অপ্পমঞ্ঞাযো, সৱণ্ণকসিণা ইমে;

অট্ঠেৱ চ সদা দোস-চৰিতস্সানুকূলতা.

৮০৮. তং মোহচৰিতস্সেত্থ, ৱিতক্কচৰিতস্স চ;

অনুকূলন্তি নিদ্দিট্ঠং, আনাপানং পনেককং.

৮০৯. পুৰিমানুস্সতিছক্কং, সদ্ধাচৰিতদেহিনো;

মৰণূপসমাযুত্তা, সতিমাহাৰনিস্সিতা.

৮১০. সঞ্ঞা ধাতুৱৱত্থানং, বুদ্ধিপ্পকতিজন্তুনো;

ইমে পন চ চত্তাৰো, অনুকূলাতি দীপিতা.

৮১১. চত্তাৰোপি চ আৰুপ্পা, সেসানি কসিণানি চ;

অনুকূলা ইমে সব্ব-চৰিতানন্তি ৱণ্ণিতা.

৮১২. ইদং সব্বং পনেকন্ত-ৱিপচ্চনীকভাৱতো;

অতিসপ্পাযতো ৱুত্ত-মিতি ঞেয্যং ৱিভাৱিনা.

৮১৩. কম্মট্ঠানানি সব্বানি, চত্তালীসাতি নিদ্দিসে;

কসিণানি দস চেৱ, অসুভানুস্সতী দস.

৮১৪. চতস্সো অপ্পমঞ্ঞাযো, চত্তাৰো চ অৰূপিনো;

চতুধাতুৱৱত্থানং, সঞ্ঞা চাহাৰতা ইতি.

৮১৫. কম্মট্ঠানেসু এতেসু, উপচাৰৱহা কতি;

আনাপানসতিং কায-গতং হিত্ৱা পনট্ঠপি.

৮১৬. সেসানুস্সতিযো সঞ্ঞা, ৱৱত্থানন্তি তেৰস;

উপচাৰৱহা ৱুত্তা, সেসা তে অপ্পনাৱহা.

৮১৭. অপ্পনাযাৱহেস্ৱেত্থ, কসিণানি দসাপি চ;

আনাপানসতী চেৱ, চতুক্কজ্ঝানিকা ইমে.

৮১৮. অসুভানি দস চেত্থ, তথা কাযগতাসতি;

একাদস ইমে ধম্মা, পঠমজ্ঝানিকা সিযুং.

৮১৯. আদিব্ৰহ্মৱিহাৰাতি, তিকজ্ঝানৱহা তযো;

চতুত্থাপি চ আৰুপ্পা, চতুত্থজ্ঝানিকা মতা.

৮২০. ৱসেনাৰম্মণঙ্গানং, দুৱিধো সমতিক্কমো;

গোচৰাতিক্কমাৰূপে, ৰূপে ঝানঙ্গতিক্কমো.

৮২১. দসেৱ কসিণানেত্থ, ৱড্ঢেতব্বানি হোন্তি হি;

ন চ ৱড্ঢনিযা সেসা, ভৱন্তি অসুভাদযো.

৮২২. দসেৱ কসিণানেত্থ, অসুভানি দসাপি চ;

আনাপানসতী চেৱ, তথা কাযগতাসতি.

৮২৩. পটিভাগনিমিত্তানি, হোন্তি আৰম্মণানি হি;

সেসানেৱ পটিভাগ-নিমিত্তাৰম্মণা সিযুং.

৮২৪. অসুভানি দসাহাৰ-সঞ্ঞা কাযগতাসতি;

দেৱেসু নপ্পৱত্তন্তি, দ্ৱাদসেতানি সব্বদা.

৮২৫. তানি দ্ৱাদস চেতানি, আনাপানসতীপি চ;

তেৰসেৱ পনেতানি, ব্ৰহ্মলোকে ন ৱিজ্জৰে.

৮২৬. ঠপেত্ৱা চতুৰাৰূপে, নত্থি কিঞ্চি অৰূপিসু;

মনুস্সলোকে সব্বানি, পৱত্তন্তি ন সংসযো.

৮২৭. চতুত্থং কসিণং হিত্ৱা, কসিণা অসুভানি চ;

দিট্ঠেনেৱ গহেতব্বা, ইমে একূনৱীসতি.

৮২৮. সতিযম্পি চ কাযম্হি, দিট্ঠেন তচপঞ্চকং;

সেসমেত্থ সুতেনেৱ, গহেতব্বন্তি দীপিতং.

৮২৯. আনাপানসতী এত্থ, ফুট্ঠেন পৰিদীপিতা;

ৱাযোকসিণমেৱেত্থ, দিট্ঠফুট্ঠেন গয্হতি.

৮৩০. সুতেনেৱ গহেতব্বা, সেসা অট্ঠাৰসাপি চ;

উপেক্খা অপ্পমঞ্ঞা চ, অৰূপা চেৱ পঞ্চিমে.

৮৩১. আদিতোৱ গহেতব্বা, ন হোন্তীতি পকাসিতা;

পঞ্চতিংসাৱসেসানি, গহেতব্বানি আদিতো.

৮৩২. কম্মট্ঠানেসু হেতেসু, আকাসকসিণং ৱিনা;

কসিণা নৱ হোন্তে চ, অৰূপানং তু পচ্চযা.

৮৩৩. দসাপি কসিণা হোন্তি, অভিঞ্ঞানং তু পচ্চযা;

তযো ব্ৰহ্মৱিহাৰাপি, চতুক্কস্স ভৱন্তি তু.

৮৩৪. হেট্ঠিমং হেট্ঠিমাৰুপ্পং, উপৰূপৰিমস্স হি;

তথা চতুত্থমাৰুপ্পং, নিৰোধস্সাতি দীপিতং.

৮৩৫. সব্বানি চ পনেতানি, চত্তালীসৱিধানি তু;

ৱিপস্সনাভৱসম্পত্তি-সুখানং পচ্চযা সিযুং.

৮৩৬. কম্মট্ঠানং গহেত্ৱান, আচৰিযস্স সন্তিকে;

ৱসন্তস্স কথেতব্বং, আগতস্সাগতক্খণে.

৮৩৭. উগ্গহেত্ৱা পনঞ্ঞত্ৰ, গন্তুকামস্স ভিক্খুনো;

নাতিসঙ্খেপৱিত্থাৰং, কথেতব্বং তু তেনপি.

৮৩৮. কম্মট্ঠানং গহেত্ৱান, সম্মট্ঠানং মনোভুনো;

অট্ঠাৰসহি দোসেহি, নিচ্চং পন ৱিৱজ্জিতে.

৮৩৯. অনুৰূপে ৱিহাৰস্মিং, ৱিহাতব্বং তু গামতো;

নাতিদূৰে নচ্চাসন্নে, সিৱে পঞ্চঙ্গসংযুতে.

৮৪০. খুদ্দকো পলিবোধোপি, ছিন্দিতব্বো পনত্থি চে;

দীঘা কেসা নখা লোমা, ছিন্দিতব্বা ৱিভাৱিনা.

৮৪১. চীৱৰং ৰজিতব্বং তং, কিলিট্ঠং তু সচে সিযা;

সচে পত্তে মলং হোতি, পচিতব্বোৱ সুট্ঠু সো.

৮৪২. অচ্ছিন্নপলিবোধেন, পচ্ছা তেন চ ভিক্খুনা;

পৱিৱিত্তে পনোকাসে, ৱসন্তেন যথাসুখং.

৮৪৩. ৱজ্জেত্ৱা মত্তিকং নীলং, পীতং সেতঞ্চ লোহিতং;

সণ্হাযাৰুণৱণ্ণায, মত্তিকায মনোৰমং.

৮৪৪. কত্তব্বং কসিণজ্ঝানং, পত্তুকামেন ধীমতা;

সেনাসনে ৱিৱিত্তস্মিং, বহিদ্ধা ৱাপি তাদিসে.

৮৪৫. পটিচ্ছন্নে পনট্ঠানে, পব্ভাৰে ৱা গুহন্তৰে;

সংহাৰিমং ৱা কাতব্বং, তং তত্ৰট্ঠকমেৱ ৱা.

৮৪৬. সংহাৰিমং কৰোন্তেন, দণ্ডকেসু চতূস্ৱপি;

চম্মং ৱা কটসাৰং ৱা, দুস্সপত্তম্পি ৱা তথা.

৮৪৭. বন্ধিত্ৱা তথা কাতব্বং, মত্তিকায পমাণতো;

ভূমিযং পত্থৰিত্ৱা চ, ওলোকেতব্বমেৱ তং.

৮৪৮. তত্ৰট্ঠং ভূমিযং ৱট্টং, আকোটিত্ৱান খাণুকে;

ৱল্লীহি তং ৱিনন্ধিত্ৱা, কাতব্বং কণ্ণিকং সমং.

৮৪৯. ৱিত্থাৰতো পমাণেন, ৱিদত্থিচতুৰঙ্গুলং;

ৱট্টং ৱত্ততি তং কাতুং, ৱিৱট্টং পন মিচ্ছতা.

৮৫০. ভেৰীতলসমং সাধু, কত্ৱা কসিণমণ্ডলং;

সম্মজ্জিত্ৱান তং ঠানং, ন্হত্ৱা আগম্ম পণ্ডিতো.

৮৫১. হত্থপাসপমাণস্মিং, তম্হা কসিণমণ্ডলা;

পদেসে তু সুপঞ্ঞত্তে, আসনস্মিং সুঅত্থতে.

৮৫২. উচ্চে তত্থ নিসীদিত্ৱা, ৱিদত্থিচতুৰঙ্গুলে;

উজুকাযং পণিধায, কত্ৱা পৰিমুখং সতিং.

৮৫৩. কামেস্ৱাদীনৱং দিস্ৱা, নেক্খম্মং দট্ঠু খেমতো;

পৰমং পীতিপামোজ্জং, জনেত্ৱা ৰতনত্তযে.

৮৫৪. ‘‘ভাগী অস্সমহং অদ্ধা, ইমায পটিপত্তিযা;

পৱিৱেকসুখস্সা’’তি, কত্ৱা উস্সাহমুত্তমং.

৮৫৫. আকাৰেন সমেনেৱ, উম্মীলিত্ৱান লোচনং;

নিমিত্তং গণ্হতা সাধু, ভাৱেতব্বং পুনপ্পুনং.

৮৫৬. ন ৱণ্ণো পেক্খিতব্বো সো, দট্ঠব্বং ন চ লক্খণং;

ৱণ্ণং পন অমুঞ্চিত্ৱা, উস্সদস্স ৱসেন হি.

৮৫৭. চিত্তং পণ্ণত্তিধম্মস্মিং, ঠপেত্ৱেকগ্গমানসো;

‘‘পথৱী পথৱি’’চ্চেৱং, ৱত্ৱা ভাৱেয্য পণ্ডিতো.

৮৫৮. পথৱী মেদনী ভূমি, ৱসুধা চ ৱসুন্ধৰা;

এৱং পথৱিনামেসু, একং ৱত্তুম্পি ৱট্টতি.

৮৫৯. উম্মীলিত্ৱা নিমীলিত্ৱা, আৱজ্জেয্য পুনপ্পুনং;

যাৱুগ্গহনিমিত্তং তু, নুপ্পজ্জতি চ তাৱ সো.

৮৬০. এৱং ভাৱযতো তস্স, পুন একগ্গচেতসো;

যদা পন নিমীলেত্ৱা, আৱজ্জন্তস্স যোগিনো.