১৮. অট্ঠাৰসমো পৰিচ্ছেদো

দিট্ঠিৱিসুদ্ধিনিদ্দেসৱণ্ণনা

১১৭৫. যা সঞ্জাননমত্তংৱ, সঞ্ঞা নীলাদিতো পনাতি সা সঞ্ঞা নীলাদিৱসেন সঞ্জাননমত্তংৱ কৰোতি. লক্খণপ্পটিৱেধন্তি অনিচ্চাদিলক্খণপটিবুজ্ঝনং.

১১৭৭. তং ৱিঞ্ঞাণং উস্সক্কিত্ৱা উদ্ধং সক্কং কত্ৱা সত্তে মগ্গং পাপেতুং ন সক্কোতি.

১১৭৮-৯. সব্বেসং পন ধম্মানং সভাৱপটিৱেধনং অৱিপৰীতৱসেন পটিবুজ্ঝনং পঞ্ঞায লক্খণং.

১১৮০. সমাধি আসন্নকাৰণং এতাযাতি সমাধাসন্নকাৰণা.

১১৮১. লক্খণেনেকধাতি সব্বধম্মং পটিবুজ্ঝনলক্খণেন পঞ্ঞাৱ একধা ৱুত্তা.

১১৮৩. ভূৰিপঞ্ঞেনাতি ভূতে অত্থে অৱিপৰীতে অত্থে ৰমতীতি ভূৰি, ভূৰি পঞ্ঞা এতস্সাতি ভূৰিপঞ্ঞো, তেন.

১১৮৬-৯১. তীসু অত্থধম্মনিৰুত্তীসু চ ঞাণেসু অত্থধম্মনিৰুত্তীসু জাতেসু ঞাণেসু চ ঞাণং. যং কিঞ্চি পচ্চযুপ্পন্নং ফলং ধম্মজাতং. ভাসিতত্থোতি পাড়িযা অত্থো. এতে পঞ্চ ধম্মা অত্থসঞ্ঞিতা অত্থনামকা. ফলনিব্বত্তকো হেতূতি জননকো পচ্চযো. ভাসিতন্তি পাড়ি. ধম্মসঞ্ঞিতাতি ধম্মনামকা. সভাৱনিৰুত্তীতি অৱিপৰীতৱোহাৰো. পৰিযত্তীতি সিক্খনং. সৱনাধিগমেহি পুব্বযোগেন পুব্বে পৱত্তনায.

১১৯২. ভূমিভূতেসূতি ৱিপস্সনায ভূমিভূতেসু.

১১৯৪. জননাদিতোতি জাতিআদিতো ভীতেন পঞ্ঞা ভাৱেতব্বা.

১২০৩. একাসীতিযা চিত্তেনাতি লোকুত্তৰচিত্তৱজ্জিতেন ৱিপস্সনাভূমিভূতেন একাসীতিযা চিত্তেন.

১২০৮. সত্তসম্মোহঘাতত্থন্তি সত্তোতি সম্মোহস্স ৱিনাসিতত্থং.

১২১১. নিৰীহকন্তি ঈহৱিৰহিতং ব্যাপাৰৱিৰহিতং, দাৰুৰজ্জুসমাযোগে.

১২১৫. উভো ভিজ্জন্তি পচ্চযাতি অঞ্ঞমঞ্ঞপচ্চযকাৰণা.

১২২৫. অন্তদ্ৱযন্তি কামসুখল্লিকানুযোগঅত্তকিলমথানুযোগদ্ৱযং. ভাৱযেতি দিট্ঠিৱিসুদ্ধিং ৱড্ঢেয্য.

ইতি অভিধম্মাৱতাৰটীকায

দিট্ঠিৱিসুদ্ধিনিদ্দেসৱণ্ণনা নিট্ঠিতা.

অট্ঠাৰসমো পৰিচ্ছেদো.