১৫. পন্নৰসমো পৰিচ্ছেদো

অৰূপাৱচৰসমাধিভাৱনানিদ্দেসৱণ্ণনা

৯৮২-৩. ৰূপে খো ৱিজ্জমানস্মিন্তি ৰূপকাযে ৱিজ্জমানে দণ্ডাদানাদযো দণ্ডগ্গহণাদযো. ইতি ৰূপে ৰূপকাযে আদীনৱং দিস্ৱা.

৯৮৪. সূকৰাভিহতোৱ সাতি সূকৰং অনুবন্ধিতো সা সুনখো ৱিয.

৯৮৫. ৱসীতি যোগী.

৯৮৮-৯৯০. ফুট্ঠোকাসঞ্চ তেন তন্তি তেন চিত্তেন ফুট্ঠং তমোকাসং ‘‘অনন্তো আকাসো’’ইতি চ মনসা কৰোন্তো এৱ উগ্ঘাটেতি. ইতি ৱচনং ৱুচ্চতে, অযমঞ্ঞো নযো, ‘‘আকাসো’’ ইতি মনসা কৰোন্তো তং কসিণং ন সংৱেল্লেতি.

৯৯৮. ৰূপাৱচৰজ্ঝানমেৱ পচ্চত্থিকং ৰূপাৱচৰজ্ঝানপচ্চত্থিকং.

১০০৪. আকাসফুটৱিঞ্ঞাণেতি ফুটমেৱ ৱিঞ্ঞাণং ফুটৱিঞ্ঞাণং, তস্মিং আকাসাৰম্মণে ফুটৱিঞ্ঞাণে.

১০০৫-৬. অযং আকাসো অনন্তো ইতি এৱং তং আকাসমেৱ ফৰিত্ৱা পৱত্তং ৱিঞ্ঞাণং ৱিঞ্ঞাণঞ্চ ইতি ৱচনং ৱুচ্চতে. ৱিঞ্ঞাণং অনন্তং নাম ন হোতি, অনন্তাৰম্মণত্তা ‘‘ৱিঞ্ঞাণং অনন্ত’’ন্তি ৱুচ্চতে, তং ৱিঞ্ঞাণং মনক্কাৰৱসেন অপি অনন্তং পৰিদীপিতং.

১০১০. পঠমাৰুপ্পৱিঞ্ঞাণস্স অভাৱো তস্স এৱ পঠমাৰুপ্পস্স সুঞ্ঞতো সুঞ্ঞভাৱতো.

১০১৩. সতি তিট্ঠতি ভিয্যো বলৱা সতি তিট্ঠতি.

১০১৫. অভাৱকে নত্থিভাৱে.

১০১৭-৮. দুতিযাৰুপ্পচক্খুনাতি চক্খুনা দুতিযাৰুপ্পং ‘‘নত্থি নত্থী’’তিআদিনা আকাৰেন পৰিকম্মৱসেন মনক্কাৰে. তস্সাপগমমত্তঞ্চ তস্স পঠমাৰুপ্পস্স অপগমমত্তঞ্চ.

১০২৯. যা নাম অযং সমাপত্তি অভাৱমত্তম্পি গোচৰং কত্ৱা ঠস্সতি, অযং সমাপত্তি ৱত একন্তেন অহো সন্তাতি পদিস্সতি.

১০৩৩. যায সঞ্ঞায নেৱসঞ্ঞী, নাসঞ্ঞী চ হোতি, কেৱলং একন্তেন অথ খো সা সঞ্ঞা এদিসী ন হোতি.

১০৩৫-৭. পটুসঞ্ঞায কিচ্চস্স নেৱ কৰণতো অযং সমাপত্তি ‘‘নেৱসঞ্ঞা’’তি নিদ্দিট্ঠাতি চতুত্থআৰুপ্পতো সম্ভৱা পৱত্তা তেজোধাতু সুখোদকে দহনকিচ্চং কাতুং ন সক্কোতি যথা, সা সঙ্খাৰধম্মানং অৱসেসত্তা.

১০৪০. পাসাদতলঞ্চ সাটিকা চ.

১০৪১. যো পন ভিক্খু ইমং ৰূপাৰূপজ্ঝানসমাপত্তিৱিধানং সাৰতৰং জানাতি, সো ৰূপাৰূপজ্ঝানসমাপত্তিপুৰেক্খো সেক্খো ভৱং কামভৱং অভিভুয্য অভিভৱিত্ৱা ৰূপাৰূপং যাতি পাপুণাতি.

ইতি অভিধম্মাৱতাৰটীকায

অৰূপাৱচৰসমাধিভাৱনানিদ্দেসৱণ্ণনা নিট্ঠিতা.

পন্নৰসমো পৰিচ্ছেদো.