৭. সমুচ্চযপৰিচ্ছেদো

১. দ্ৱাসত্ততিৱিধা ৱুত্তা, ৱত্থুধম্মা সলক্খণা.

তেসং দানি যথাযোগং, পৱক্খামি সমুচ্চযং.

২. অকুসলসঙ্গহো মিস্সকসঙ্গহো বোধিপক্খিযসঙ্গহো সব্বসঙ্গহো চেতি সমুচ্চযসঙ্গহো চতুব্বিধো ৱেদিতব্বো.

অকুসলসঙ্গহো

৩. কথং? অকুসলসঙ্গহে তাৱ চত্তাৰো আসৱা – কামাসৱো ভৱাসৱো দিট্ঠাসৱো অৱিজ্জাসৱো.

৪. চত্তাৰো ওঘা – কামোঘো ভৱোঘো দিট্ঠোঘো অৱিজ্জোঘো.

৫. চত্তাৰো যোগা – কামযোগো ভৱযোগো দিট্ঠিযোগো অৱিজ্জাযোগো.

৬. চত্তাৰো গন্থা – অভিজ্ঝাকাযগন্থো, ব্যাপাদো কাযগন্থো, সীলব্বতপৰামাসো কাযগন্থো, ইদংসচ্চাভিনিৱেসো কাযগন্থো.

৭. চত্তাৰো উপাদানা – কামুপাদানং দিট্ঠুপাদানং সীলব্বতুপাদানং অত্তৱাদুপাদানং.

৮. ছ নীৱৰণানি – কামচ্ছন্দনীৱৰণং ব্যাপাদনীৱৰণং থিনমিদ্ধনীৱৰণং উদ্ধচ্চকুক্কুচ্চনীৱৰণং ৱিচিকিচ্ছানীৱৰণং অৱিজ্জানীৱৰণং.

৯. সত্ত অনুসযা – কামৰাগানুসযো ভৱৰাগানুসযো পটিঘানুসযো মানানুসযো দিট্ঠানুসযো ৱিচিকিচ্ছানুসযো অৱিজ্জানুসযো.

১০. দস সংযোজনানি – কামৰাগসংযোজনং ৰূপৰাগসংযোজনং অৰূপৰাগসংযোজনং পটিঘসংযোজনং মানসংযোজনং দিট্ঠিসংযোজনং সীলব্বতপৰামাসসংযোজনং ৱিচিকিচ্ছাসংযোজনং উদ্ধচ্চসংযোজনং অৱিজ্জাসংযোজনং সুত্তন্তে.

১১. অপৰানিপি দস সংযোজনানি – কামৰাগসংযোজনং ভৱৰাগসংযোজনং পটিঘসংযোজনং মানসংযোজনং দিট্ঠিসংযোজনং সীলব্বতপৰামাসসংযোজনং ৱিচিকিচ্ছাসংযোজনং ইস্সাসংযোজনং মচ্ছৰিযসংযোজনং অৱিজ্জাসংযোজনং অভিধম্মে (ৱিভ. ৯৬৯).

১২. দস কিলেসা – লোভো দোসো মোহো মানো দিট্ঠি ৱিচিকিচ্ছা থিনং উদ্ধচ্চং অহিৰিকং অনোত্তপ্পং.

১৩. আসৱাদীসু পনেত্থ কামভৱনামেন তব্বত্থুকা তণ্হা অধিপ্পেতা, সীলব্বতপৰামাসো ইদংসচ্চাভিনিৱেসো অত্তৱাদুপাদো চ তথাপৱত্তং দিট্ঠিগতমেৱ পৱুচ্চতি.

১৪. আসৱোঘা চ যোগা চ,

তযো গন্থা চ ৱত্থুতো;

উপাদানা দুৱে ৱুত্তা,

অট্ঠ নীৱৰণা সিযুং.

ছড়েৱানুসযা হোন্তি, নৱ সংযোজনা মতা;

কিলেসা দস ৱুত্তোযং, নৱধা পাপসঙ্গহো.

মিস্সকসঙ্গহো

১৫. মিস্সকসঙ্গহে ছ হেতূ – লোভো দোসো মোহো অলোভো অদোসো অমোহো.

১৬. সত্ত ঝানঙ্গানি – ৱিতক্কো ৱিচাৰো পীতি একগ্গতা সোমনস্সং দোমনস্সং উপেক্খা.

১৭. দ্ৱাদস মগ্গঙ্গানি – সম্মাদিট্ঠি সম্মাসঙ্কপ্পো সম্মাৱাচা সম্মাকম্মন্তো সম্মাআজীৱো সম্মাৱাযামো সম্মাসতি সম্মাসমাধি মিচ্ছাদিট্ঠি মিচ্ছাসঙ্কপ্পো মিচ্ছাৱাযামো মিচ্ছাসমাধি.

১৮. বাৱীসতিন্দ্ৰিযানি – চক্খুন্দ্ৰিযং সোতিন্দ্ৰিযং ঘানিন্দ্ৰিযং জিৱ্হিন্দ্ৰিযং কাযিন্দ্ৰিযং ইত্থিন্দ্ৰিযং পুৰিসিন্দ্ৰিযং জীৱিতিন্দ্ৰিযং মনিন্দ্ৰিযং সুখিন্দ্ৰিযং দুক্খিন্দ্ৰিযং সোমনস্সিন্দ্ৰিযং দোমনস্সিন্দ্ৰিযং উপেক্খিন্দ্ৰিযং সদ্ধিন্দ্ৰিযং ৱীৰিযিন্দ্ৰিযং সতিন্দ্ৰিযং সমাধিন্দ্ৰিযং পঞ্ঞিন্দ্ৰিযং অনঞ্ঞাতঞ্ঞস্সামীতিন্দ্ৰিযং অঞ্ঞিন্দ্ৰিযং অঞ্ঞাতাৱিন্দ্ৰিযং.

১৯. নৱ বলানি – সদ্ধাবলং ৱীৰিযবলং সতিবলং সমাধিবলং পঞ্ঞাবলং হিৰিবলং ওত্তপ্পবলং অহিৰিকবলং অনোত্তপ্পবলং.

২০. চত্তাৰো অধিপতী – ছন্দাধিপতি ৱীৰিযাধিপতি চিত্তাধিপতি ৱীমংসাধিপতি.

২১. চত্তাৰো আহাৰা – কবড়ীকাৰো আহাৰো, ফস্সো দুতিযো, মনোসঞ্চেতনা ততিযা, ৱিঞ্ঞাণং চতুত্থং.

২২. ইন্দ্ৰিযেসু পনেত্থ সোতাপত্তিমগ্গঞাণং অনঞ্ঞাতঞ্ঞস্সামীতিন্দ্ৰিযং.

২৩. অৰহত্তফলঞাণং অঞ্ঞাতাৱিন্দ্ৰিযং.

২৪. মজ্ঝে ছ ঞাণানি অঞ্ঞিন্দ্ৰিযানীতি পৱুচ্চন্তি.

২৫. জীৱিতিন্দ্ৰিযঞ্চ ৰূপাৰূপৱসেন দুৱিধং হোতি.

২৬. পঞ্চৱিঞ্ঞাণেসু ঝানঙ্গানি, অৱীৰিযেসু বলানি, অহেতুকেসু মগ্গঙ্গানি ন লব্ভন্তি.

২৭. তথা ৱিচিকিচ্ছাচিত্তে একগ্গতা মগ্গিন্দ্ৰিযবলভাৱং ন গচ্ছতি.

২৮. দ্ৱিহেতুকতিহেতুকজৱনেস্ৱেৱ যথাসম্ভৱং অধিপতি একোৱ লব্ভতীতি.

২৯. ছ হেতূ পঞ্চ ঝানঙ্গা, মগ্গঙ্গা নৱ ৱত্থুতো.

সোড়সিন্দ্ৰিযধম্মা চ, বলধম্মা নৱেৰিতা.

চত্তাৰোধিপতি ৱুত্তা, তথাহাৰাতি সত্তধা;

কুসলাদিসমাকিণ্ণো, ৱুত্তোমিস্সকসঙ্গহো.

বোধিপক্খিযসঙ্গহো

৩০. বোধিপক্খিযসঙ্গহে চত্তাৰো সতিপট্ঠানা কাযানুপস্সনাসতিপট্ঠানং ৱেদনানুপস্সনাসতিপট্ঠানং চিত্তানুপস্সনাসতিপট্ঠানং ধম্মানুপস্সনাসতিপট্ঠানং.

৩১. চত্তাৰো সম্মপ্পধানা উপ্পন্নানং পাপকানং পহানায ৱাযামো, অনুপ্পন্নানং পাপকানং অনুপ্পাদায ৱাযামো, অনুপ্পন্নানং কুসলানং উপ্পাদায ৱাযামো, উপ্পন্নানং কুসলানং ভিয্যোভাৱায ৱাযামো.

৩২. চত্তাৰো ইদ্ধিপাদা – ছন্দিদ্ধিপাদো ৱীৰিযিদ্ধিপাদো চিত্তিদ্ধিপাদো ৱীমংসিদ্ধিপাদো.

৩৩. পঞ্চিন্দ্ৰিযানি – সদ্ধিন্দ্ৰিযং ৱীৰিযিন্দ্ৰিযং সতিন্দ্ৰিযং সমাধিন্দ্ৰিযং পঞ্ঞিন্দ্ৰিযং.

৩৪. পঞ্চ বলানি – সদ্ধাবলং ৱীৰিযবলং সতিবলং সমাধিবলং পঞ্ঞাবলং.

৩৫. সত্ত বোজ্ঝঙ্গা – সতিসম্বোজ্ঝঙ্গো ধম্মৱিচযসম্বোজ্ঝঙ্গো ৱীৰিযসম্বোজ্ঝঙ্গো পীতিসম্বোজ্ঝঙ্গো পস্সদ্ধিসম্বোজ্ঝঙ্গো সমাধিসম্বোজ্ঝঙ্গো উপেক্খাসম্বোজ্ঝঙ্গো.

৩৬. অট্ঠ মগ্গঙ্গানি – সম্মাদিট্ঠি সম্মাসঙ্কপ্পো সম্মাৱাচা সম্মাকম্মন্তো সম্মাআজীৱো সম্মাৱাযামো সম্মাসতি সম্মাসমাধি.

৩৭. এত্থ পন চত্তাৰো সতিপট্ঠানাতি সম্মাসতি একাৱ পৱুচ্চতি.

৩৮. তথা চত্তাৰো সম্মপ্পধানাতি চ সম্মাৱাযামো.

৩৯. ছন্দো চিত্তমুপেক্খা চ, সদ্ধাপস্সদ্ধিপীতিযো.

সম্মাদিট্ঠি চ সঙ্কপ্পো, ৱাযামো ৱিৰতিত্তযং.

সম্মাসতি সমাধীতি, চুদ্দসেতে সভাৱতো;

সত্ততিংসপ্পভেদেন, সত্তধা তত্থ সঙ্গহো.

৪০. সঙ্কপ্পপস্সদ্ধি চ পীতুপেক্খা,

ছন্দো চ চিত্তং ৱিৰতিত্তযঞ্চ;

নৱেকঠানা ৱিৰিযং নৱট্ঠ,

সতী সমাধী চতু পঞ্চ পঞ্ঞা;

সদ্ধা দুঠানুত্তমসত্ততিংস-

ধম্মানমেসো পৱৰো ৱিভাগো.

৪১. সব্বে লোকুত্তৰে হোন্তি, ন ৱা সঙ্কপ্পপীতিযো.

লোকিযেপি যথাযোগং, ছব্বিসুদ্ধিপৱত্তিযং.

সব্বসঙ্গহো

৪২. সব্বসঙ্গহে পঞ্চক্খন্ধা – ৰূপক্খন্ধো ৱেদনাক্খন্ধো সঞ্ঞাক্খন্ধো সঙ্খাৰক্খন্ধো ৱিঞ্ঞাণক্খন্ধো.

৪৩. পঞ্চুপাদানক্খন্ধা – ৰূপুপাদানক্খন্ধো ৱেদনুপাদানক্খন্ধো সঞ্ঞুপাদানক্খন্ধো সঙ্খাৰুপাদানক্খন্ধো ৱিঞ্ঞাণুপাদানক্খন্ধো.

৪৪. দ্ৱাদসাযতনানি – চক্খাযতনং সোতাযতনং ঘানাযতনং জিৱ্হাযতনং কাযাযতনং মনাযতনং ৰূপাযতনং সদ্দাযতনং গন্ধাযতনং ৰসাযতনং ফোট্ঠব্বাযতনং ধম্মাযতনং.

৪৫. অট্ঠাৰস ধাতুযো – চক্খুধাতু সোতধাতু ঘানধাতু জিৱ্হাধাতু কাযধাতু ৰূপধাতু সদ্দধাতু গন্ধধাতু ৰসধাতু ফোট্ঠব্বধাতু চক্খুৱিঞ্ঞাণধাতু সোতৱিঞ্ঞাণধাতু ঘানৱিঞ্ঞাণধাতু জিৱ্হাৱিঞ্ঞাণধাতু কাযৱিঞ্ঞাণধাতু মনোধাতু ধম্মধাতু মনোৱিঞ্ঞাণধাতু.

৪৬. চত্তাৰি অৰিযসচ্চানি – দুক্খং অৰিযসচ্চং, দুক্খসমুদযো অৰিযসচ্চং, দুক্খনিৰোধো অৰিযসচ্চং, দুক্খনিৰোধগামিনী পটিপদা অৰিযসচ্চং.

৪৭. এত্থ পন চেতসিকসুখুমৰূপনিব্বানৱসেন একূনসত্ততি ধম্মা ধম্মাযতনধম্মধাতূতি সঙ্খং গচ্ছন্তি.

৪৮. মনাযতনমেৱ সত্তৱিঞ্ঞাণধাতুৱসেন ভিজ্জতি.

৪৯. ৰূপঞ্চ ৱেদনা সঞ্ঞা, সেসচেতসিকা তথা.

ৱিঞ্ঞাণমিতি পঞ্চেতে, পঞ্চক্খন্ধাতি ভাসিতা.

৫০. পঞ্চুপাদানক্খন্ধাতি, তথা তেভূমকা মতা.

ভেদাভাৱেন নিব্বানং, খন্ধসঙ্গহনিস্সটং.

৫১. দ্ৱাৰাৰম্মণভেদেন, ভৱন্তাযতনানি চ.

দ্ৱাৰালম্বতদুপ্পন্ন-পৰিযাযেন ধাতুযো.

৫২. দুক্খং তেভূমকং ৱট্টং, তণ্হা সমুদযো ভৱে.

নিৰোধো নাম নিব্বানং, মগ্গো লোকুত্তৰো মতো.

৫৩. মগ্গযুত্তা ফলা চেৱ, চতুসচ্চৱিনিস্সটা.

ইতি পঞ্চপ্পভেদেন, পৱুত্তো সব্বসঙ্গহো.

ইতি অভিধম্মত্থসঙ্গহে সমুচ্চযসঙ্গহৱিভাগো নাম

সত্তমো পৰিচ্ছেদো.