দুকমাতিকা

হেতুগোচ্ছকং

হেতূ ধম্মা, ন হেতূ ধম্মা. সহেতুকা ধম্মা, অহেতুকা ধম্মা. হেতুসম্পযুত্তা ধম্মা, হেতুৱিপ্পযুত্তা ধম্মা. হেতূ চেৱ ধম্মা সহেতুকা চ, সহেতুকা চেৱ ধম্মা ন চ হেতূ. হেতূ চেৱ ধম্মা হেতুসম্পযুত্তা চ, হেতুসম্পযুত্তা চেৱ ধম্মা ন চ হেতূ. ন হেতূ খো পন ধম্মা সহেতুকাপি, অহেতুকাপি. হেতুগোচ্ছকং.

চূড়ন্তৰদুকং

সপ্পচ্চযা ধম্মা, অপ্পচ্চযা ধম্মা. সঙ্খতা ধম্মা, অসঙ্খতা ধম্মা. সনিদস্সনা ধম্মা, অনিদস্সনা ধম্মা. সপ্পটিঘা ধম্মা, অপ্পটিঘা ধম্মা. ৰূপিনো ধম্মা, অৰূপিনো ধম্মা. লোকিযা ধম্মা, লোকুত্তৰা ধম্মা. কেনচি ৱিঞ্ঞেয্যা ধম্মা, কেনচি ন ৱিঞ্ঞেয্যা ধম্মা. চূড়ন্তৰদুকং.

আসৱগোচ্ছকং

আসৱা ধম্মা, নো আসৱা ধম্মা. সাসৱা ধম্মা, অনাসৱা ধম্মা. আসৱসম্পযুত্তা ধম্মা, আসৱৱিপ্পযুত্তা ধম্মা. আসৱা চেৱ ধম্মা সাসৱা চ, সাসৱা চেৱ ধম্মা নো চ আসৱা. আসৱা চেৱ ধম্মা আসৱসম্পযুত্তা চ, আসৱসম্পযুত্তা চেৱ ধম্মা নো চ আসৱা. আসৱৱিপ্পযুত্তা খো পন ধম্মা সাসৱাপি, অনাসৱাপি. আসৱগোচ্ছকং.

সঞ্ঞোজনগোচ্ছকং

সঞ্ঞোজনা ধম্মা, নো সঞ্ঞোজনা ধম্মা. সঞ্ঞোজনিযা ধম্মা, অসঞ্ঞোজনিযা ধম্মা. সঞ্ঞোজনসম্পযুত্তা ধম্মা, সঞ্ঞোজনৱিপ্পযুত্তা ধম্মা. সঞ্ঞোজনা চেৱ ধম্মা সঞ্ঞোজনিযা চ, সঞ্ঞোজনিযা চেৱ ধম্মা নো চ সঞ্ঞোজনা. সঞ্ঞোজনা চেৱ ধম্মা সঞ্ঞোজনসম্পযুত্তা চ, সঞ্ঞোজনসম্পযুত্তা চেৱ ধম্মা নো চ সঞ্ঞোজনা. সঞ্ঞোজনৱিপ্পযুত্তা খো পন ধম্মা সঞ্ঞোজনিযাপি, অসঞ্ঞোজনিযাপি. সঞ্ঞোজনগোচ্ছকং.

গন্থগোচ্ছকং

গন্থা ধম্মা, নো গন্থা ধম্মা. গন্থনিযা ধম্মা, অগন্থনিযা ধম্মা. গন্থসম্পযুত্তা ধম্মা, গন্থৱিপ্পযুত্তা ধম্মা. গন্থা চেৱ ধম্মা গন্থনিযা চ, গন্থনিযা চেৱ ধম্মা নো চ গন্থা. গন্থা চেৱ ধম্মা গন্থসম্পযুত্তা চ, গন্থসম্পযুত্তা চেৱ ধম্মা নো চ গন্থা. গন্থৱিপ্পযুত্তা খো পন ধম্মা গন্থনিযাপি, অগন্থনিযাপি. গন্থগোচ্ছকং.

ওঘগোচ্ছকং

ওঘা ধম্মা, নো ওঘা ধম্মা. ওঘনিযা ধম্মা, অনোঘনিযা ধম্মা. ওঘসম্পযুত্তা ধম্মা, ওঘৱিপ্পযুত্তা ধম্মা. ওঘা চেৱ ধম্মা ওঘনিযা চ, ওঘনিযা চেৱ ধম্মা নো চ ওঘা. ওঘা চেৱ ধম্মা ওঘসম্পযুত্তা চ, ওঘসম্পযুত্তা চেৱ ধম্মা নো চ ওঘা. ওঘৱিপ্পযুত্তা খো পন ধম্মা ওঘনিযাপি, অনোঘনিযাপি. ওঘগোচ্ছকং.

যোগগোচ্ছকং

যোগা ধম্মা, নো যোগা ধম্মা. যোগনিযা ধম্মা, অযোগনিযা ধম্মা. যোগসম্পযুত্তা ধম্মা, যোগৱিপ্পযুত্তা ধম্মা. যোগা চেৱ ধম্মা যোগনিযা চ, যোগনিযা চেৱ ধম্মা নো চ যোগা. যোগা চেৱ ধম্মা যোগসম্পযুত্তা চ, যোগসম্পযুত্তা চেৱ ধম্মা নো চ যোগা. যোগৱিপ্পযুত্তা খো পন ধম্মা যোগনিযাপি, অযোগনিযাপি. যোগগোচ্ছকং.

নীৱৰণগোচ্ছকং

নীৱৰণা ধম্মা, নো নীৱৰণা ধম্মা. নীৱৰণিযা ধম্মা, অনীৱৰণিযা ধম্মা. নীৱৰণসম্পযুত্তা ধম্মা, নীৱৰণৱিপ্পযুত্তা ধম্মা. নীৱৰণা চেৱ ধম্মা নীৱৰণিযা চ, নীৱৰণিযা চেৱ ধম্মা নো চ নীৱৰণা. নীৱৰণা চেৱ ধম্মা নীৱৰণসম্পযুত্তা চ, নীৱৰণসম্পযুত্তা চেৱ ধম্মা নো চ নীৱৰণা. নীৱৰণৱিপ্পযুত্তা খো পন ধম্মা নীৱৰণিযাপি, অনীৱৰণিযাপি. নীৱৰণগোচ্ছকং.

পৰামাসগোচ্ছকং

পৰামাসা ধম্মা, নো পৰামাসা ধম্মা. পৰামট্ঠা ধম্মা, অপৰামট্ঠা ধম্মা. পৰামাসসম্পযুত্তা ধম্মা, পৰামাসৱিপ্পযুত্তা ধম্মা. পৰামাসা চেৱ ধম্মা পৰামট্ঠা চ, পৰামট্ঠাচেৱ ধম্মা নো চ পৰামাসা. পৰামাসৱিপ্পযুত্তা খো পন ধম্মা পৰামট্ঠাপি, অপৰামট্ঠাপি. পৰামাসগোচ্ছকং.

মহন্তৰদুকং

সাৰম্মণা ধম্মা, অনাৰম্মণা ধম্মা. চিত্তা ধম্মা, নো চিত্তা ধম্মা. চেতসিকা ধম্মা, অচেতসিকা ধম্মা. চিত্তসম্পযুত্তা ধম্মা, চিত্তৱিপ্পযুত্তা ধম্মা. চিত্তসংসট্ঠা ধম্মা, চিত্তৱিসংসট্ঠা ধম্মা. চিত্তসমুট্ঠানা ধম্মা, নো চিত্তসমুট্ঠানা ধম্মা. চিত্তসহভুনো ধম্মা, নো চিত্তসহভুনো ধম্মা. চিত্তানুপৰিৱত্তিনো ধম্মা, নো চিত্তানুপৰিৱত্তিনো ধম্মা. চিত্তসংসট্ঠসমুট্ঠানা ধম্মা, নো চিত্তসংসট্ঠসমুট্ঠানা ধম্মা. চিত্তসংসট্ঠসমুট্ঠানসহভুনো ধম্মা, নো চিত্তসংসট্ঠসমুট্ঠানসহভুনো ধম্মা. চিত্তসংসট্ঠসমুট্ঠানানুপৰিৱত্তিনো ধম্মা, নো চিত্তসংসট্ঠসমুট্ঠানানুপৰিৱত্তিনো ধম্মা. অজ্ঝত্তিকা ধম্মা, বাহিৰা ধম্মা. উপাদা ধম্মা, নো উপাদা ধম্মা. উপাদিণ্ণা ধম্মা, অনুপাদিণ্ণা ধম্মা. মহন্তৰদুকং.

উপাদানগোচ্ছকং

উপাদানা ধম্মা, নো উপাদানা ধম্মা. উপাদানিযা ধম্মা, অনুপাদানিযা ধম্মা. উপাদানসম্পযুত্তা ধম্মা, উপাদানৱিপ্পযুত্তা ধম্মা. উপাদানা চেৱ ধম্মা উপাদানিযা চ, উপাদানিযা চেৱ ধম্মা নো চ উপাদানা. উপাদানা চেৱ ধম্মা উপাদানসম্পযুত্তা চ, উপাদানসম্পযুত্তা চেৱ ধম্মা নো চ উপাদানা. উপাদানৱিপ্পযুত্তা খো পন ধম্মা উপাদানিযাপি, অনুপাদানিযাপি. উপাদানগোচ্ছকং.

কিলেসগোচ্ছকং

কিলেসা ধম্মা, নো কিলেসা ধম্মা. সংকিলেসিকা ধম্মা, অসংকিলেসিকা ধম্মা. সংকিলিট্ঠা ধম্মা, অসংকিলিট্ঠা ধম্মা. কিলেসসম্পযুত্তা ধম্মা, কিলেসৱিপ্পযুত্তা ধম্মা. কিলেসা চেৱ ধম্মা সংকিলেসিকা চ, সংকিলেসিকা চেৱ ধম্মা নো চ কিলেসা. কিলেসা চেৱ ধম্মা সংকিলিট্ঠা চ, সংকিলিট্ঠা চেৱ ধম্মা নো চ কিলেসা. কিলেসা চেৱ ধম্মা কিলেসসম্পযুত্তা চ, কিলেসসম্পযুত্তা চেৱ ধম্মা নো চ কিলেসা. কিলেসৱিপ্পযুত্তা খো পন ধম্মা সংকিলেসিকাপি, অসংকিলেসিকাপি. কিলেসগোচ্ছকং.

পিট্ঠিদুকং

দস্সনেন পহাতব্বা ধম্মা, ন দস্সনেন পহাতব্বা ধম্মা. ভাৱনায পহাতব্বা ধম্মা, ন ভাৱনায পহাতব্বা ধম্মা. দস্সনেন পহাতব্বহেতুকা ধম্মা, ন দস্সনেন পহাতব্বহেতুকা ধম্মা. ভাৱনায পহাতব্বহেতুকা ধম্মা, ন ভাৱনায পহাতব্বহেতুকা ধম্মা. সৱিতক্কা ধম্মা, অৱিতক্কা ধম্মা. সৱিচাৰা ধম্মা, অৱিচাৰা ধম্মা. সপ্পীতিকা ধম্মা, অপ্পীতিকা ধম্মা. পীতিসহগতা ধম্মা, ন পীতিসহগতা ধম্মা. সুখসহগতা ধম্মা, ন সুখসহগতা ধম্মা. উপেক্খাসহগতা ধম্মা, ন উপেক্খাসহগতা ধম্মা. কামাৱচৰা ধম্মা, ন কামাৱচৰা ধম্মা. ৰূপাৱচৰা ধম্মা, ন ৰূপাৱচৰা ধম্মা. অৰূপাৱচৰা ধম্মা, ন অৰূপাৱচৰা ধম্মা. পৰিযাপন্না ধম্মা, অপৰিযাপন্না ধম্মা. নিয্যানিকা ধম্মা, অনিয্যানিকা ধম্মা. নিযতা ধম্মা, অনিযতা ধম্মা. সউত্তৰা ধম্মা, অনুত্তৰা ধম্মা. সৰণা ধম্মা, অৰণা ধম্মা. পিট্ঠিদুকং.

অভিধম্মদুকমাতিকা.

সুত্তন্তিকদুকমাতিকা

ৱিজ্জাভাগিনো ধম্মা, অৱিজ্জাভাগিনো ধম্মা. ৱিজ্জূপমা ধম্মা, ৱজিৰূপমা ধম্মা. বালা ধম্মা, পণ্ডিতা ধম্মা. কণ্হা ধম্মা, সুক্কা ধম্মা. তপনীযা ধম্মা, অতপনীযা ধম্মা. অধিৱচনা ধম্মা, অধিৱচনপথা ধম্মা. নিৰুত্তি ধম্মা, নিৰুত্তিপথা ধম্মা. পঞ্ঞত্তি ধম্মা, পঞ্ঞত্তিপথা ধম্মা. নামঞ্চ, ৰূপঞ্চ. অৱিজ্জা চ, ভৱতণ্হা চ. ভৱদিট্ঠি চ, ৱিভৱদিট্ঠি চ. সস্সতদিট্ঠি চ, উচ্ছেদদিট্ঠি চ. অন্তৱা দিট্ঠি চ, অনন্তৱা দিট্ঠি চ. পুব্বন্তানুদিট্ঠি চ, অপৰন্তানুদিট্ঠি চ. অহিৰিকঞ্চ, অনোত্তপ্পঞ্চ. হিৰী চ, ওত্তপ্পঞ্চ. দোৱচস্সতা চ, পাপমিত্ততা চ. সোৱচস্সতা চ, কল্যাণমিত্ততা চ. আপত্তিকুসলতা চ, আপত্তিৱুট্ঠানকুসলতা চ. সমাপত্তিকুসলতা চ, সমাপত্তিৱুট্ঠানকুসলতা চ. ধাতুকুসলতা চ, মনসিকাৰকুসলতা চ. আযতনকুসলতা চ, পটিচ্চসমুপ্পাদকুসলতা চ. ঠানকুসলতা চ, অট্ঠানকুসলতা চ. অজ্জৱো চ, মদ্দৱো চ. খন্তি চ, সোৰচ্চঞ্চ. সাখল্যঞ্চ, পটিসন্থাৰো চ. ইন্দ্ৰিযেসু অগুত্তদ্ৱাৰতা চ, ভোজনে অমত্তঞ্ঞুতা চ. ইন্দ্ৰিযেসু গুত্তদ্ৱাৰতা চ, ভোজনে মত্তঞ্ঞুতা চ. মুট্ঠস্সচ্চঞ্চ, অসম্পজঞ্ঞঞ্চ. সতি চ, সম্পজঞ্ঞঞ্চ. পটিসঙ্খানবলঞ্চ, ভাৱনাবলঞ্চ. সমথো চ, ৱিপস্সনা চ. সমথনিমিত্তঞ্চ, পগ্গাহনিমিত্তঞ্চ. পগ্গাহো চ, অৱিক্খেপো চ. সীলৱিপত্তি চ, দিট্ঠিৱিপত্তি চ. সীলসম্পদা চ, দিট্ঠিসম্পদা চ. সীলৱিসুদ্ধি চ, দিট্ঠিৱিসুদ্ধি চ. দিট্ঠিৱিসুদ্ধি খো পন, যথাদিট্ঠিস্স চ পধানং. সংৱেগো চ সংৱেজনিযেসু ঠানেসু, সংৱিগ্গস্স চ যোনিসো পধানং. অসন্তুট্ঠিতা চ কুসলেসু ধম্মেসু, অপ্পটিৱানিতা চ পধানস্মিং. ৱিজ্জা চ, ৱিমুত্তি চ. খযে ঞাণং, অনুপ্পাদে ঞাণন্তি.

সুত্তন্তিকদুকমাতিকা.

ধম্মসঙ্গণীমাতিকা নিট্ঠিতা.