১০. বাড়্হগিলানসুত্তং

৯০৮. একং সমযং আযস্মা অনুৰুদ্ধো সাৱত্থিযং ৱিহৰতি অন্ধৱনস্মিং আবাধিকো দুক্খিতো বাড়্হগিলানো. অথ খো সম্বহুলা ভিক্খূ যেনাযস্মা অনুৰুদ্ধো তেনুপসঙ্কমিংসু; উপসঙ্কমিত্ৱা আযস্মন্তং অনুৰুদ্ধং এতদৱোচুং –

‘‘কতমেনাযস্মতো অনুৰুদ্ধস্স ৱিহাৰেন ৱিহৰতো উপ্পন্না সাৰীৰিকা দুক্খা ৱেদনা চিত্তং ন পৰিযাদায তিট্ঠন্তী’’তি? ‘‘চতূসু খো মে, আৱুসো, সতিপট্ঠানেসু সুপ্পতিট্ঠিতচিত্তস্স ৱিহৰতো উপ্পন্না সাৰীৰিকা দুক্খা ৱেদনা চিত্তং ন পৰিযাদায তিট্ঠন্তি. কতমেসু চতূসু? ইধাহং, আৱুসো, কাযে কাযানুপস্সী ৱিহৰামি…পে… ৱেদনাসু…পে… চিত্তে…পে… ধম্মেসু ধম্মানুপস্সী ৱিহৰামি আতাপী সম্পজানো সতিমা, ৱিনেয্য লোকে অভিজ্ঝাদোমনস্সং – ইমেসু খো মে, আৱুসো, চতূসু সতিপট্ঠানেসু সুপ্পতিট্ঠিতচিত্তস্স ৱিহৰতো উপ্পন্না সাৰীৰিকা দুক্খা ৱেদনা চিত্তং ন পৰিযাদায তিট্ঠন্তী’’তি. দসমং.

ৰহোগতৱগ্গো পঠমো.

তস্সুদ্দানং –

ৰহোগতেন দ্ৱে ৱুত্তা, সুতনু কণ্ডকী তযো;

তণ্হক্খযসলড়াগাৰং, অম্বপালি চ গিলানন্তি.