৯. ঞাণসুত্তং

৮২১. ‘‘‘অযং ছন্দসমাধিপ্পধানসঙ্খাৰসমন্নাগতো ইদ্ধিপাদো’তি মে ভিক্খৱে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৱিজ্জা উদপাদি, আলোকো উদপাদি. ‘সো খো পনাযং ছন্দসমাধিপ্পধানসঙ্খাৰসমন্নাগতো ইদ্ধিপাদো ভাৱেতব্বো’তি মে, ভিক্খৱে…পে… ‘ভাৱিতো’তি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৱিজ্জা উদপাদি, আলোকো উদপাদি.

‘‘‘অযং ৱীৰিযসমাধিপ্পধানসঙ্খাৰসমন্নাগতো ইদ্ধিপাদো’তি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৱিজ্জা উদপাদি, আলোকো উদপাদি. ‘সো খো পনাযং ৱীৰিযসমাধিপ্পধানসঙ্খাৰসমন্নাগতো ইদ্ধিপাদো ভাৱেতব্বো’তি মে, ভিক্খৱে…পে… ‘ভাৱিতো’তি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৱিজ্জা উদপাদি, আলোকো উদপাদি.

‘‘‘অযং চিত্তসমাধিপ্পধানসঙ্খাৰসমন্নাগতো ইদ্ধিপাদো’তি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৱিজ্জা উদপাদি, আলোকো উদপাদি. ‘সো খো পনাযং চিত্তসমাধিপ্পধানসঙ্খাৰসমন্নাগতো ইদ্ধিপাদো ভাৱেতব্বো’তি মে, ভিক্খৱে…পে… ‘ভাৱিতো’তি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৱিজ্জা উদপাদি, আলোকো উদপাদি.

‘‘‘অযং ৱীমংসাসমাধিপ্পধানসঙ্খাৰসমন্নাগতো ইদ্ধিপাদো’তি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৱিজ্জা উদপাদি, আলোকো উদপাদি. ‘সো খো পনাযং ৱীমংসাসমাধিপ্পধানসঙ্খাৰসমন্নাগতো ইদ্ধিপাদো ভাৱেতব্বো’তি মে, ভিক্খৱে…পে… ‘ভাৱিতো’তি মে, ভিক্খৱে, পুব্বে অননুস্সুতেসু ধম্মেসু চক্খুং উদপাদি, ঞাণং উদপাদি, পঞ্ঞা উদপাদি, ৱিজ্জা উদপাদি, আলোকো উদপাদী’’তি. নৱমং.