৭. বোধিপক্খিযৱগ্গো

১. সংযোজনসুত্তং

৫৩১. সাৱত্থিনিদানং. ‘‘পঞ্চিমানি, ভিক্খৱে, ইন্দ্ৰিযানি ভাৱিতানি বহুলীকতানি সংযোজনপ্পহানায [সংযোজনানং পহানায (স্যা. ক.)] সংৱত্তন্তি. কতমানি পঞ্চ? সদ্ধিন্দ্ৰিযং…পে… পঞ্ঞিন্দ্ৰিযং – ইমানি খো, ভিক্খৱে, পঞ্চিন্দ্ৰিযানি ভাৱিতানি বহুলীকতানি সংযোজনপ্পহানায সংৱত্তন্তী’’তি. পঠমং.

২. অনুসযসুত্তং

৫৩২. ‘‘পঞ্চিমানি, ভিক্খৱে, ইন্দ্ৰিযানি ভাৱিতানি বহুলীকতানি অনুসযসমুগ্ঘাতায সংৱত্তন্তি. কতমানি পঞ্চ? সদ্ধিন্দ্ৰিযং…পে… পঞ্ঞিন্দ্ৰিযং – ইমানি খো, ভিক্খৱে, পঞ্চিন্দ্ৰিযানি ভাৱিতানি বহুলীকতানি অনুসযসমুগ্ঘাতায সংৱত্তন্তী’’তি. দুতিযং.

৩. পৰিঞ্ঞাসুত্তং

৫৩৩. ‘‘পঞ্চিমানি, ভিক্খৱে, ইন্দ্ৰিযানি ভাৱিতানি বহুলীকতানি অদ্ধানপৰিঞ্ঞায সংৱত্তন্তি. কতমানি পঞ্চ? সদ্ধিন্দ্ৰিযং…পে… পঞ্ঞিন্দ্ৰিযং – ইমানি খো, ভিক্খৱে, পঞ্চিন্দ্ৰিযানি ভাৱিতানি বহুলীকতানি অদ্ধানপৰিঞ্ঞায সংৱত্তন্তী’’তি. ততিযং.

৪. আসৱক্খযসুত্তং

৫৩৪. ‘‘পঞ্চিমানি, ভিক্খৱে, ইন্দ্ৰিযানি ভাৱিতানি বহুলীকতানি আসৱানং খযায সংৱত্তন্তি. কতমানি পঞ্চ? সদ্ধিন্দ্ৰিযং…পে… পঞ্ঞিন্দ্ৰিযং – ইমানি খো, ভিক্খৱে, পঞ্চিন্দ্ৰিযানি ভাৱিতানি বহুলীকতানি আসৱানং খযায সংৱত্তন্তী’’তি.

‘‘পঞ্চিমানি, ভিক্খৱে, ইন্দ্ৰিযানি ভাৱিতানি বহুলীকতানি সংযোজনপ্পহানায সংৱত্তন্তি, অনুসযসমুগ্ঘাতায সংৱত্তন্তি, অদ্ধানপৰিঞ্ঞায সংৱত্তন্তি, আসৱানং খযায সংৱত্তন্তি. কতমানি পঞ্চ? সদ্ধিন্দ্ৰিযং…পে… পঞ্ঞিন্দ্ৰিযং – ইমানি খো, ভিক্খৱে, পঞ্চিন্দ্ৰিযানি ভাৱিতানি বহুলীকতানি সংযোজনপ্পহানায সংৱত্তন্তি, অনুসযসমুগ্ঘাতায সংৱত্তন্তি, অদ্ধানপৰিঞ্ঞায সংৱত্তন্তি, আসৱানং খযায সংৱত্তন্তী’’তি. চতুত্থং.

৫. পঠমফলসুত্তং

৫৩৫. ‘‘পঞ্চিমানি, ভিক্খৱে, ইন্দ্ৰিযানি. কতমানি পঞ্চ? সদ্ধিন্দ্ৰিযং…পে… পঞ্ঞিন্দ্ৰিযং – ইমানি খো, ভিক্খৱে, পঞ্চিন্দ্ৰিযানি. ইমেসং খো, ভিক্খৱে, পঞ্চন্নং ইন্দ্ৰিযানং ভাৱিতত্তা বহুলীকতত্তা দ্ৱিন্নং ফলানং অঞ্ঞতৰং ফলং পাটিকঙ্খং – দিট্ঠেৱ ধম্মে অঞ্ঞা, সতি ৱা উপাদিসেসে অনাগামিতা’’তি. পঞ্চমং.

৬. দুতিযফলসুত্তং

৫৩৬. ‘‘পঞ্চিমানি, ভিক্খৱে, ইন্দ্ৰিযানি. কতমানি পঞ্চ? সদ্ধিন্দ্ৰিযং…পে… পঞ্ঞিন্দ্ৰিযং – ইমানি খো, ভিক্খৱে, পঞ্চিন্দ্ৰিযানি. ইমেসং খো, ভিক্খৱে, পঞ্চন্নং ইন্দ্ৰিযানং ভাৱিতত্তা বহুলীকতত্তা সত্ত ফলা সত্তানিসংসা পাটিকঙ্খা. কতমে সত্ত ফলা সত্তানিসংসা? দিট্ঠেৱ ধম্মে পটিকচ্চ অঞ্ঞং আৰাধেতি, নো চে দিট্ঠেৱ ধম্মে পটিকচ্চ অঞ্ঞং আৰাধেতি, অথ মৰণকালে অঞ্ঞং আৰাধেতি. নো চে দিট্ঠেৱ ধম্মে অঞ্ঞং আৰাধেতি, নো চে মৰণকালে অঞ্ঞং আৰাধেতি, অথ পঞ্চন্নং ওৰম্ভাগিযানং সংযোজনানং পৰিক্খযা অন্তৰাপৰিনিব্বাযী হোতি, উপহচ্চপৰিনিব্বাযী হোতি, অসঙ্খাৰপৰিনিব্বাযী হোতি, সসঙ্খাৰপৰিনিব্বাযী হোতি, উদ্ধংসোতো হোতি অকনিট্ঠগামী. ইমেসং খো, ভিক্খৱে, পঞ্চন্নং ইন্দ্ৰিযানং ভাৱিতত্তা বহুলীকতত্তা ইমে সত্ত ফলা সত্তানিসংসা পাটিকঙ্খা’’তি. ছট্ঠং.

৭. পঠমৰুক্খসুত্তং

৫৩৭. ‘‘সেয্যথাপি ভিক্খৱে, যে কেচি জম্বুদীপকা ৰুক্খা, জম্বূ তেসং অগ্গমক্খাযতি; এৱমেৱ খো ভিক্খৱে, যে কেচি বোধিপক্খিযা ধম্মা, পঞ্ঞিন্দ্ৰিযং তেসং অগ্গমক্খাযতি, যদিদং – বোধায. কতমে চ, ভিক্খৱে, বোধিপক্খিযা ধম্মা? সদ্ধিন্দ্ৰিযং, ভিক্খৱে, বোধিপক্খিযো ধম্মো, তং বোধায সংৱত্ততি. ৱীৰিযিন্দ্ৰিযং…পে… সতিন্দ্ৰিযং…পে… সমাধিন্দ্ৰিযং…পে… পঞ্ঞিন্দ্ৰিযং বোধিপক্খিযো ধম্মো, তং বোধায সংৱত্ততি. সেয্যথাপি, ভিক্খৱে, যে কেচি জম্বুদীপকা ৰুক্খা, জম্বূ তেসং অগ্গমক্খাযতি; এৱমেৱ খো, ভিক্খৱে, যে কেচি বোধিপক্খিযা ধম্মা, পঞ্ঞিন্দ্ৰিযং তেসং অগ্গমক্খাযতি, যদিদং – বোধাযা’’তি. সত্তমং.

৮. দুতিযৰুক্খসুত্তং

৫৩৮. ‘‘সেয্যথাপি, ভিক্খৱে, যে কেচি দেৱানং তাৱতিংসানং ৰুক্খা, পাৰিছত্তকো তেসং অগ্গমক্খাযতি; এৱমেৱ খো, ভিক্খৱে, যে কেচি বোধিপক্খিযা ধম্মা, পঞ্ঞিন্দ্ৰিযং তেসং অগ্গমক্খাযতি, যদিদং – বোধায. কতমে চ, ভিক্খৱে, বোধিপক্খিযা ধম্মা? সদ্ধিন্দ্ৰিযং, ভিক্খৱে, বোধিপক্খিযো ধম্মো, তং বোধায সংৱত্ততি. ৱীৰিযিন্দ্ৰিযং…পে… সতিন্দ্ৰিযং…পে… সমাধিন্দ্ৰিযং…পে… পঞ্ঞিন্দ্ৰিযং বোধিপক্খিযো ধম্মো, তং বোধায সংৱত্ততি. সেয্যথাপি, ভিক্খৱে, যে কেচি দেৱানং তাৱতিংসানং ৰুক্খা, পাৰিছত্তকো তেসং অগ্গমক্খাযতি; এৱমেৱ খো, ভিক্খৱে, যে কেচি বোধিপক্খিযা ধম্মা, পঞ্ঞিন্দ্ৰিযং তেসং অগ্গমক্খাযতি, যদিদং – বোধাযা’’তি. অট্ঠমং.

৯. ততিযৰুক্খসুত্তং

৫৩৯. ‘‘সেয্যথাপি, ভিক্খৱে, যে কেচি অসুৰানং ৰুক্খা, চিত্তপাটলি তেসং অগ্গমক্খাযতি; এৱমেৱ খো, ভিক্খৱে, যে কেচি বোধিপক্খিযা ধম্মা, পঞ্ঞিন্দ্ৰিযং তেসং অগ্গমক্খাযতি, যদিদং – বোধায. কতমে চ, ভিক্খৱে, বোধিপক্খিযা ধম্মা? সদ্ধিন্দ্ৰিযং, ভিক্খৱে, বোধিপক্খিযো ধম্মো, তং বোধায সংৱত্ততি…পে… পঞ্ঞিন্দ্ৰিযং বোধিপক্খিযো ধম্মো, তং বোধায সংৱত্ততি. সেয্যথাপি ভিক্খৱে, যে কেচি অসুৰানং ৰুক্খা, চিত্তপাটলি তেসং অগ্গমক্খাযতি; এৱমেৱ খো, ভিক্খৱে, যে কেচি বোধিপক্খিযা ধম্মা, পঞ্ঞিন্দ্ৰিযং তেসং অগ্গমক্খাযতি, যদিদং – বোধাযা’’তি. নৱমং.

১০. চতুত্থৰুক্খসুত্তং

৫৪০. ‘‘সেয্যথাপি, ভিক্খৱে, যে কেচি সুপণ্ণানং ৰুক্খা, কূটসিম্বলী [কোটসিম্বলি (স্যা. কং.)] তেসং অগ্গমক্খাযতি; এৱমেৱ খো, ভিক্খৱে, যে কেচি বোধিপক্খিযা ধম্মা, পঞ্ঞিন্দ্ৰিযং তেসং অগ্গমক্খাযতি, যদিদং – বোধায. কতমে চ, ভিক্খৱে, বোধিপক্খিযা ধম্মা? সদ্ধিন্দ্ৰিযং, ভিক্খৱে, বোধিপক্খিযো ধম্মো, তং বোধায সংৱত্ততি…পে… পঞ্ঞিন্দ্ৰিযং বোধিপক্খিযো ধম্মো, তং বোধায সংৱত্ততি. সেয্যথাপি, ভিক্খৱে, যে কেচি সুপণ্ণানং ৰুক্খা, কূটসিম্বলী তেসং অগ্গমক্খাযতি; এৱমেৱ খো, ভিক্খৱে, যে কেচি বোধিপক্খিযা ধম্মা, পঞ্ঞিন্দ্ৰিযং তেসং অগ্গমক্খাযতি, যদিদং – বোধাযা’’তি. দসমং.

বোধিপক্খিযৱগ্গো সত্তমো.

তস্সুদ্দানং –

সংযোজনা অনুসযা, পৰিঞ্ঞা আসৱক্খযা;

দ্ৱে ফলা চতুৰো ৰুক্খা, ৱগ্গো তেন পৱুচ্চতীতি.