১২. ওঘৱগ্গো

১-১০. ওঘাদিসুত্তদসকং

৫৮৭-৫৯৬. ‘‘পঞ্চিমানি, ভিক্খৱে, উদ্ধম্ভাগিযানি সংযোজনানি. কতমানি পঞ্চ? ৰূপৰাগো, অৰূপৰাগো, মানো, উদ্ধচ্চং, অৱিজ্জা – ইমানি খো, ভিক্খৱে, পঞ্চুদ্ধম্ভাগিযানি সংযোজনানি. ইমেসং খো, ভিক্খৱে, পঞ্চন্নং উদ্ধম্ভাগিযানং সংযোজনানং অভিঞ্ঞায পৰিঞ্ঞায পৰিক্খযায পহানায পঞ্চিন্দ্ৰিযানি ভাৱেতব্বানি. কতমানি পঞ্চ? ইধ, ভিক্খৱে, ভিক্খু সদ্ধিন্দ্ৰিযং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… পঞ্ঞিন্দ্ৰিযং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. ইমেসং খো, ভিক্খৱে, পঞ্চন্নং উদ্ধম্ভাগিযানং সংযোজনানং অভিঞ্ঞায পৰিঞ্ঞায পৰিক্খযায পহানায ইমানি পঞ্চিন্দ্ৰিযানি ভাৱেতব্বানী’’তি. দসমং. (যথা মগ্গসংযুত্তং, তথা ৱিত্থাৰেতব্বং.)

ওঘৱগ্গো দ্ৱাদসমো.

তস্সুদ্দানং –

ওঘো যোগো উপাদানং, গন্থা অনুসযেন চ;

কামগুণা নীৱৰণা, খন্ধা ওৰুদ্ধম্ভাগিযাতি.