৬. গঙ্গাপেয্যালৱগ্গো

১-১২. গঙ্গানদীআদিসুত্তদ্ৱাদসকং

৪১৭-৪২৮. ‘‘সেয্যথাপি, ভিক্খৱে, গঙ্গা নদী পাচীননিন্না পাচীনপোণা পাচীনপব্ভাৰা; এৱমেৱ খো, ভিক্খৱে, ভিক্খু চত্তাৰো সতিপট্ঠানে ভাৱেন্তো চত্তাৰো সতিপট্ঠানে বহুলীকৰোন্তো নিব্বাননিন্নো হোতি নিব্বানপোণো নিব্বানপব্ভাৰো.

‘‘কথঞ্চ, ভিক্খৱে, ভিক্খু চত্তাৰো সতিপট্ঠানে ভাৱেন্তো চত্তাৰো সতিপট্ঠানে বহুলীকৰোন্তো নিব্বাননিন্নো হোতি নিব্বানপোণো নিব্বানপব্ভাৰো? ইধ, ভিক্খৱে, ভিক্খু কাযে কাযানুপস্সী ৱিহৰতি আতাপী সম্পজানো সতিমা, ৱিনেয্য লোকে অভিজ্ঝাদোমনস্সং; ৱেদনাসু …পে… চিত্তে …পে… ধম্মেসু ধম্মানুপস্সী ৱিহৰতি আতাপী সম্পজানো সতিমা, ৱিনেয্য লোকে অভিজ্ঝাদোমনস্সং. এৱং খো, ভিক্খৱে, ভিক্খু চত্তাৰো সতিপট্ঠানে ভাৱেন্তো চত্তাৰো সতিপট্ঠানে বহুলীকৰোন্তো নিব্বাননিন্নো হোতি নিব্বানপোণো নিব্বানপব্ভাৰো’’তি ৱিত্থাৰেতব্বং.

গঙ্গাপেয্যালৱগ্গো ছট্ঠো.

তস্সুদ্দানং –

ছ পাচীনতো নিন্না, ছ নিন্না চ সমুদ্দতো;

এতে দ্ৱে ছ দ্ৱাদস হোন্তি, ৱগ্গো তেন পৱুচ্চতীতি.