৬. পদেসসুত্তং

৩৯২. একং সমযং আযস্মা চ সাৰিপুত্তো আযস্মা চ মহামোগ্গল্লানো আযস্মা চ অনুৰুদ্ধো সাকেতে ৱিহৰন্তি কণ্ডকীৱনে [কণ্টকীৱনে (সী. স্যা. কং. পী.)]. অথ খো আযস্মা চ সাৰিপুত্তো আযস্মা চ মহামোগ্গল্লানো সাযন্হসমযং পটিসল্লানা ৱুট্ঠিতা যেনাযস্মা অনিৰুদ্ধো তেনুপসঙ্কমিংসু; উপসঙ্কমিত্ৱা আযস্মতা অনুৰুদ্ধেন সদ্ধিং সম্মোদিংসু. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদিংসু. একমন্তং নিসিন্নো খো আযস্মা সাৰিপুত্তো আযস্মন্তং অনুৰুদ্ধং এতদৱোচ – ‘‘‘সেখো, সেখো’তি [সেক্খো সেক্খোতি (স্যা. কং.)], আৱুসো অনুৰুদ্ধ, ৱুচ্চতি. কিত্তাৱতা নু খো, আৱুসো, সেখো হোতী’’তি? ‘‘চতুন্নং খো, আৱুসো, সতিপট্ঠানানং পদেসং ভাৱিতত্তা সেখো হোতি’’.

‘‘কতমেসং চতুন্নং? ইধাৱুসো, ভিক্খু কাযে কাযানুপস্সী ৱিহৰতি আতাপী সম্পজানো সতিমা, ৱিনেয্য লোকে অভিজ্ঝাদোমনস্সং; ৱেদনাসু…পে… চিত্তে…পে… ধম্মেসু ধম্মানুপস্সী ৱিহৰতি আতাপী সম্পজানো সতিমা, ৱিনেয্য লোকে অভিজ্ঝাদোমনস্সং. ইমেসং খো, আৱুসো, চতুন্নং সতিপট্ঠানানং পদেসং ভাৱিতত্তা সেখো হোতী’’তি. ছট্ঠং.