১. অট্ঠিকমহপ্ফলসুত্তং

২৩৮. সাৱত্থিনিদানং. ‘‘অট্ঠিকসঞ্ঞা, ভিক্খৱে, ভাৱিতা বহুলীকতা মহপ্ফলা হোতি মহানিসংসা. কথং ভাৱিতা চ, ভিক্খৱে, অট্ঠিকসঞ্ঞা কথং বহুলীকতা মহপ্ফলা হোতি মহানিসংসা? ইধ, ভিক্খৱে, ভিক্খু অট্ঠিকসঞ্ঞাসহগতং সতিসম্বোজ্ঝঙ্গং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… অট্ঠিকসঞ্ঞাসহগতং উপেক্খাসম্বোজ্ঝঙ্গং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. এৱং ভাৱিতা খো, ভিক্খৱে, অট্ঠিকসঞ্ঞা এৱং বহুলীকতা মহপ্ফলা হোতি মহানিসংসা’’তি.

অঞ্ঞতৰফলসুত্তং

‘‘অট্ঠিকসঞ্ঞায, ভিক্খৱে, ভাৱিতায বহুলীকতায দ্ৱিন্নং ফলানং অঞ্ঞতৰং ফলং পাটিকঙ্খং – দিট্ঠেৱ ধম্মে অঞ্ঞা, সতি ৱা উপাদিসেসে অনাগামিতা. কথং ভাৱিতায চ খো, ভিক্খৱে, অট্ঠিকসঞ্ঞায কথং বহুলীকতায দ্ৱিন্নং ফলানং অঞ্ঞতৰং ফলং পাটিকঙ্খং – দিট্ঠেৱ ধম্মে অঞ্ঞা, সতি ৱা উপাদিসেসে অনাগামিতা? ইধ, ভিক্খৱে, ভিক্খু অট্ঠিকসঞ্ঞাসহগতং সতিসম্বোজ্ঝঙ্গং ভাৱেতি…পে… অট্ঠিকসঞ্ঞাসহগতং উপেক্খাসম্বোজ্ঝঙ্গং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. এৱং ভাৱিতায খো, ভিক্খৱে, অট্ঠিকসঞ্ঞায এৱং বহুলীকতায দ্ৱিন্নং ফলানং অঞ্ঞতৰং ফলং পাটিকঙ্খং – দিট্ঠেৱ ধম্মে অঞ্ঞা, সতি ৱা উপাদিসেসে অনাগামিতা’’তি.

মহত্থসুত্তং

‘‘অট্ঠিকসঞ্ঞা, ভিক্খৱে, ভাৱিতা বহুলীকতা মহতো অত্থায সংৱত্ততি. কথং ভাৱিতা চ, ভিক্খৱে, অট্ঠিকসঞ্ঞা কথং বহুলীকতা মহতো অত্থায সংৱত্ততি? ইধ, ভিক্খৱে, ভিক্খু অট্ঠিকসঞ্ঞাসহগতং সতিসম্বোজ্ঝঙ্গং ভাৱেতি…পে… অট্ঠিকসঞ্ঞাসহগতং উপেক্খাসম্বোজ্ঝঙ্গং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. এৱং ভাৱিতা খো, ভিক্খৱে, অট্ঠিকসঞ্ঞা এৱং বহুলীকতা মহতো অত্থায সংৱত্ততী’’তি.

যোগক্খেমসুত্তং

‘‘অট্ঠিকসঞ্ঞা, ভিক্খৱে, ভাৱিতা বহুলীকতা মহতো যোগক্খেমায সংৱত্ততি. কথং ভাৱিতা চ, ভিক্খৱে, অট্ঠিকসঞ্ঞা কথং বহুলীকতা মহতো যোগক্খেমায সংৱত্ততি? ইধ, ভিক্খৱে, ভিক্খু অট্ঠিকসঞ্ঞাসহগতং সতিসম্বোজ্ঝঙ্গং ভাৱেতি…পে… অট্ঠিকসঞ্ঞাসহগতং উপেক্খাসম্বোজ্ঝঙ্গং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. এৱং ভাৱিতা খো, ভিক্খৱে, অট্ঠিকসঞ্ঞা এৱং বহুলীকতা মহতো যোগক্খেমায সংৱত্ততী’’তি.

সংৱেগসুত্তং

‘‘অট্ঠিকসঞ্ঞা, ভিক্খৱে, ভাৱিতা বহুলীকতা মহতো সংৱেগায সংৱত্ততি. কথং ভাৱিতা চ, ভিক্খৱে, অট্ঠিকসঞ্ঞা কথং বহুলীকতা মহতো সংৱেগায সংৱত্ততি? ইধ, ভিক্খৱে, ভিক্খু অট্ঠিকসঞ্ঞাসহগতং সতিসম্বোজ্ঝঙ্গং ভাৱেতি…পে… অট্ঠিকসঞ্ঞাসহগতং উপেক্খাসম্বোজ্ঝঙ্গং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. এৱং ভাৱিতা খো, ভিক্খৱে, অট্ঠিকসঞ্ঞা এৱং বহুলীকতা মহতো সংৱেগায সংৱত্ততী’’তি.

ফাসুৱিহাৰসুত্তং

‘‘অট্ঠিকসঞ্ঞা, ভিক্খৱে, ভাৱিতা বহুলীকতা মহতো ফাসুৱিহাৰায সংৱত্ততি. কথং ভাৱিতা চ, ভিক্খৱে, অট্ঠিকসঞ্ঞা কথং বহুলীকতা মহতো ফাসুৱিহাৰায সংৱত্ততি? ইধ, ভিক্খৱে, ভিক্খু অট্ঠিকসঞ্ঞাসহগতং সতিসম্বোজ্ঝঙ্গং ভাৱেতি…পে… অট্ঠিকসঞ্ঞাসহগতং উপেক্খাসম্বোজ্ঝঙ্গং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং. এৱং ভাৱিতা খো, ভিক্খৱে, অট্ঠিকসঞ্ঞা এৱং বহুলীকতা মহতো ফাসুৱিহাৰায সংৱত্ততী’’তি. পঠমং.