১৩. ওঘৱগ্গো

১-৮. ওঘাদিসুত্তং

৩০২. ‘‘চত্তাৰোমে ভিক্খৱে, ওঘা. কতমে চত্তাৰো? কামোঘো, ভৱোঘো, দিট্ঠোঘো, অৱিজ্জোঘোতি ৱিত্থাৰেতব্বং.

১০. উদ্ধম্ভাগিযসুত্তং

৩১১. সাৱত্থিনিদানং. ‘‘পঞ্চিমানি, ভিক্খৱে, উদ্ধম্ভাগিযানি সংযোজনানি. কতমানি পঞ্চ? ৰূপৰাগো, অৰূপৰাগো, মানো, উদ্ধচ্চং, অৱিজ্জা – ইমানি খো, ভিক্খৱে, পঞ্চুদ্ধম্ভাগিযানি সংযোজনানি. ইমেসং খো, ভিক্খৱে, পঞ্চন্নং উদ্ধম্ভাগিযানং সংযোজনানং অভিঞ্ঞায পৰিঞ্ঞায পৰিক্খযায পহানায সত্ত বোজ্ঝঙ্গা ভাৱেতব্বা. কতমে সত্ত? ইধ, ভিক্খৱে, ভিক্খু সতিসম্বোজ্ঝঙ্গং ভাৱেতি ৱিৱেকনিস্সিতং ৱিৰাগনিস্সিতং নিৰোধনিস্সিতং ৱোস্সগ্গপৰিণামিং…পে… উপেক্খাসম্বোজ্ঝঙ্গং ভাৱেতি ৰাগৱিনযপৰিযোসানং দোসৱিনযপৰিযোসানং মোহৱিনযপৰিযোসানং… অমতোগধং অমতপৰাযনং অমতপৰিযোসানং… নিব্বাননিন্নং নিব্বানপোণং নিব্বানপব্ভাৰং. ইমেসং খো, ভিক্খৱে, ভিক্খু পঞ্চন্নং উদ্ধম্ভাগিযানং সংযোজনানং অভিঞ্ঞায পৰিঞ্ঞায পৰিক্খযায পহানায ইমে সত্ত বোজ্ঝঙ্গা ভাৱেতব্বা’’তি. দসমং.

ওঘৱগ্গো তেৰসমো.

তস্সুদ্দানং –

ওঘো যোগো উপাদানং, গন্থা অনুসযেন চ;

কামগুণা নীৱৰণা, খন্ধা ওৰুদ্ধম্ভাগিযানীতি.