৭. পঠমআমকধঞ্ঞপেয্যালৱগ্গো

১. অঞ্ঞত্ৰসুত্তং

১১৩১. অথ খো ভগৱা পৰিত্তং নখসিখাযং পংসুং আৰোপেত্ৱা ভিক্খূ আমন্তেসি – ‘‘তং কিং মঞ্ঞথ, ভিক্খৱে, কতমং নু খো বহুতৰং – যো ৱাযং মযা পৰিত্তো নখসিখাযং পংসু আৰোপিতো, অযং ৱা মহাপথৱী’’তি? ‘‘এতদেৱ, ভন্তে, বহুতৰং, যদিদং – মহাপথৱী; অপ্পমত্তকাযং ভগৱতা পৰিত্তো নখসিখাযং পংসু আৰোপিতো. সঙ্খম্পি ন উপেতি, উপনিধম্পি ন উপেতি, কলভাগম্পি ন উপেতি মহাপথৱিং উপনিধায ভগৱতা পৰিত্তো নখসিখাযং পংসু আৰোপিতো’’তি.

‘‘এৱমেৱ খো, ভিক্খৱে, অপ্পমত্তকা তে সত্তা যে মনুস্সেসু পচ্চাজাযন্তি; অথ খো এতেৱ বহুতৰা সত্তা যে অঞ্ঞত্ৰ মনুস্সেহি [মনুস্সেসু (পী. ক.)] পচ্চাজাযন্তি. তং কিস্স হেতু? অদিট্ঠত্তা, ভিক্খৱে, চতুন্নং অৰিযসচ্চানং. কতমেসং চতুন্নং? দুক্খস্স অৰিযসচ্চস্স…পে… দুক্খনিৰোধগামিনিযা পটিপদায অৰিযসচ্চস্স’’.

‘‘তস্মাতিহ, ভিক্খৱে, ‘ইদং দুক্খ’ন্তি যোগো কৰণীযো…পে… ‘অযং দুক্খনিৰোধগামিনী পটিপদা’তি যোগো কৰণীযো’’তি. পঠমং.

২. পচ্চন্তসুত্তং

১১৩২. অথ খো ভগৱা পৰিত্তং নখসিখাযং পংসুং আৰোপেত্ৱা ভিক্খূ আমন্তেসি – ‘‘তং কিং মঞ্ঞথ, ভিক্খৱে, কতমং নু খো বহুতৰং – যো ৱাযং মযা পৰিত্তো নখসিখাযং পংসু আৰোপিতো, অযং ৱা মহাপথৱী’’তি? ‘‘এতদেৱ, ভন্তে, বহুতৰং, যদিদং – মহাপথৱী; অপ্পমত্তকাযং ভগৱতা পৰিত্তো নখসিখাযং পংসু আৰোপিতো. সঙ্খম্পি ন উপেতি, উপনিধম্পি ন উপেতি, কলভাগম্পি ন উপেতি মহাপথৱিং উপনিধায ভগৱতা পৰিত্তো নখসিখাযং পংসু আৰোপিতো’’তি.

‘‘এৱমেৱ খো, ভিক্খৱে, অপ্পমত্তকা তে সত্তা যে মজ্ঝিমেসু জনপদেসু পচ্চাজাযন্তি; অথ খো এতেৱ বহুতৰা সত্তা যে পচ্চন্তিমেসু জনপদেসু পচ্চাজাযন্তি অৱিঞ্ঞাতাৰেসু মিলক্খেসু [মিলক্খূসু (স্যা. কং. ক.)] …পে…. দুতিযং.

৩. পঞ্ঞাসুত্তং

১১৩৩. … ‘‘এৱমেৱ খো, ভিক্খৱে, অপ্পকা তে সত্তা যে পন অৰিযেন পঞ্ঞাচক্খুনা সমন্নাগতা; অথ খো এতেৱ বহুতৰা সত্তা যে অৱিজ্জাগতা সম্মুড়্হা…পে…. ততিযং.

৪. সুৰামেৰযসুত্তং

১১৩৪. … ‘‘এৱমেৱ খো, ভিক্খৱে, অপ্পকা তে সত্তা যে সুৰামেৰযমজ্জপ্পমাদট্ঠানা পটিৱিৰতা; অথ খো এতেৱ বহুতৰা সত্তা যে সুৰামেৰযমজ্জপ্পমাদট্ঠানা অপটিৱিৰতা…পে…. চতুত্থং.

৫. ওদকসুত্তং

১১৩৫. … ‘‘এৱমেৱ খো, ভিক্খৱে, অপ্পকা তে সত্তা যে থলজা; অথ খো এতেৱ বহুতৰা সত্তা যে উদকজা. তং কিস্স হেতু…পে…. পঞ্চমং.

৬. মত্তেয্যসুত্তং

১১৩৬. … ‘‘এৱমেৱ খো, ভিক্খৱে, অপ্পকা তে সত্তা যে মত্তেয্যা; অথ খো এতেৱ বহুতৰা সত্তা যে অমত্তেয্যা…পে…. ছট্ঠং.

৭. পেত্তেয্যসুত্তং

১১৩৭. … ‘‘এৱমেৱ খো, ভিক্খৱে, অপ্পকা তে সত্তা যে পেত্তেয্যা; অথ খো এতেৱ বহুতৰা সত্তা যে অপেত্তেয্যা…পে…. সত্তমং.

৮. সামঞ্ঞসুত্তং

১১৩৮. … ‘‘এৱমেৱ খো, ভিক্খৱে, অপ্পকা তে সত্তা যে সামঞ্ঞা; অথ খো এতেৱ বহুতৰা সত্তা যে অসামঞ্ঞা…পে…. অট্ঠমং.

৯. ব্ৰহ্মঞ্ঞসুত্তং

১১৩৯. … ‘‘এৱমেৱ খো, ভিক্খৱে, অপ্পকা তে সত্তা যে ব্ৰহ্মঞ্ঞা; অথ খো এতেৱ বহুতৰা সত্তা যে অব্ৰহ্মঞ্ঞা…পে…. নৱমং.

১০. পচাযিকসুত্তং

১১৪০. … ‘‘এৱমেৱ খো, ভিক্খৱে, অপ্পকা তে সত্তা যে কুলে জেট্ঠাপচাযিনো; অথ খো এতেৱ বহুতৰা সত্তা যে কুলে অজেট্ঠাপচাযিনোতি [অকুলে জেট্ঠাপচাযিনোতি (স্যা. কং.)] …পে…. দসমং.

পঠমআমকধঞ্ঞপেয্যালৱগ্গো সত্তমো.

তস্সুদ্দানং –

অঞ্ঞত্ৰ পচ্চন্তং পঞ্ঞা, সুৰামেৰযওদকা;

মত্তেয্য পেত্তেয্যা চাপি, সামঞ্ঞং ব্ৰহ্মপচাযিকন্তি.