৫. অঞ্ঞতিত্থিযপেয্যালৱগ্গো

১. ৰাগৱিৰাগসুত্তং

৪১. সাৱত্থিনিদানং. ‘‘সচে ৱো, ভিক্খৱে, অঞ্ঞতিত্থিযা পৰিব্বাজকা এৱং পুচ্ছেয্যুং – ‘কিমত্থিযং, আৱুসো, সমণে গোতমে ব্ৰহ্মচৰিযং ৱুস্সতী’তি, এৱং পুট্ঠা তুম্হে, ভিক্খৱে, তেসং অঞ্ঞতিত্থিযানং পৰিব্বাজকানং এৱং ব্যাকৰেয্যাথ – ‘ৰাগৱিৰাগত্থং খো, আৱুসো, ভগৱতি ব্ৰহ্মচৰিযং ৱুস্সতী’তি. সচে পন ৱো, ভিক্খৱে, অঞ্ঞতিত্থিযা পৰিব্বাজকা এৱং পুচ্ছেয্যুং – ‘অত্থি পনাৱুসো, মগ্গো, অত্থি পটিপদা ৰাগৱিৰাগাযা’তি, এৱং পুট্ঠা তুম্হে, ভিক্খৱে, তেসং অঞ্ঞতিত্থিযানং পৰিব্বাজকানং এৱং ব্যাকৰেয্যাথ – ‘অত্থি খো, আৱুসো, মগ্গো, অত্থি পটিপদা ৰাগৱিৰাগাযা’তি. কতমো চ, ভিক্খৱে, মগ্গো, কতমা চ পটিপদা ৰাগৱিৰাগায? অযমেৱ অৰিযো অট্ঠঙ্গিকো মগ্গো, সেয্যথিদং – সম্মাদিট্ঠি…পে… সম্মাসমাধি. অযং, ভিক্খৱে, মগ্গো, অযং পটিপদা ৰাগৱিৰাগাযাতি. এৱং পুট্ঠা তুম্হে, ভিক্খৱে, তেসং অঞ্ঞতিত্থিযানং পৰিব্বাজকানং এৱং ব্যাকৰেয্যাথা’’তি. পঠমং.

২-৭. সংযোজনপ্পহানাদিসুত্তছক্কং

৪২-৪৭. ‘‘সচে ৱো, ভিক্খৱে, অঞ্ঞতিত্থিযা পৰিব্বাজকা এৱং পুচ্ছেয্যুং – ‘কিমত্থিযং, আৱুসো, সমণে গোতমে ব্ৰহ্মচৰিযং ৱুস্সতী’তি, এৱং পুট্ঠা তুম্হে, ভিক্খৱে, তেসং অঞ্ঞতিত্থিযানং পৰিব্বাজকানং এৱং ব্যাকৰেয্যাথ – ‘সংযোজনপ্পহানত্থং খো, আৱুসো, ভগৱতি ব্ৰহ্মচৰিযং ৱুস্সতী’তি…পে… ‘অনুসযসমুগ্ঘাতনত্থং খো, আৱুসো, ভগৱতি ব্ৰহ্মচৰিযং ৱুস্সতী’তি…পে… ‘অদ্ধানপৰিঞ্ঞত্থং খো, আৱুসো, ভগৱতি ব্ৰহ্মচৰিযং ৱুস্সতী’তি…পে… ‘আসৱানং খযত্থং খো, আৱুসো, ভগৱতি ব্ৰহ্মচৰিযং ৱুস্সতী’তি…পে… ‘ৱিজ্জাৱিমুত্তিফলসচ্ছিকিৰিযত্থং খো, আৱুসো, ভগৱতি ব্ৰহ্মচৰিযং ৱুস্সতী’তি…পে… ‘ঞাণদস্সনত্থং খো, আৱুসো, ভগৱতি ব্ৰহ্মচৰিযং ৱুস্সতী’তি…পে…. সত্তমং.

৮. অনুপাদাপৰিনিব্বানসুত্তং

৪৮. সাৱত্থিনিদানং. ‘‘সচে ৱো, ভিক্খৱে, অঞ্ঞতিত্থিযা পৰিব্বাজকা এৱং পুচ্ছেয্যুং – ‘কিমত্থিযং, আৱুসো, সমণে গোতমে ব্ৰহ্মচৰিযং ৱুস্সতী’তি, এৱং পুট্ঠা তুম্হে, ভিক্খৱে, তেসং অঞ্ঞতিত্থিযানং পৰিব্বাজকানং এৱং ব্যাকৰেয্যাথ – ‘অনুপাদাপৰিনিব্বানত্থং খো, আৱুসো, ভগৱতি ব্ৰহ্মচৰিযং ৱুস্সতী’তি. সচে পন ৱো, ভিক্খৱে, অঞ্ঞতিত্থিযা পৰিব্বাজকা এৱং পুচ্ছেয্যুং – ‘অত্থি পনাৱুসো, মগ্গো, অত্থি পটিপদা অনুপাদাপৰিনিব্বানাযা’তি, এৱং পুট্ঠা তুম্হে, ভিক্খৱে, তেসং অঞ্ঞতিত্থিযানং পৰিব্বাজকানং এৱং ব্যাকৰেয্যাথ – ‘অত্থি খো, আৱুসো, মগ্গো, অত্থি পটিপদা অনুপাদাপৰিনিব্বানাযা’তি. কতমো চ, ভিক্খৱে, মগ্গো, কতমা চ পটিপদা অনুপাদাপৰিনিব্বানায? অযমেৱ অৰিযো অট্ঠঙ্গিকো মগ্গো, সেয্যথিদং – সম্মাদিট্ঠি…পে… সম্মাসমাধি. অযং, ভিক্খৱে, মগ্গো, অযং পটিপদা অনুপাদাপৰিনিব্বানাযাতি. এৱং পুট্ঠা তুম্হে, ভিক্খৱে, তেসং অঞ্ঞতিত্থিযানং পৰিব্বাজকানং এৱং ব্যাকৰেয্যাথা’’তি. অট্ঠমং.

অঞ্ঞতিত্থিযপেয্যালৱগ্গো পঞ্চমো.

তস্সুদ্দানং –

ৱিৰাগসংযোজনং অনুসযং, অদ্ধানং আসৱা খযা;

ৱিজ্জাৱিমুত্তিঞাণঞ্চ, অনুপাদায অট্ঠমী.