২-৬. দুতিযাদিসমুদ্দনিন্নসুত্তপঞ্চকং

১২২-১২৬. ‘‘সেয্যথাপি, ভিক্খৱে, যমুনা নদী সমুদ্দনিন্না সমুদ্দপোণা সমুদ্দপব্ভাৰা; এৱমেৱ খো, ভিক্খৱে, ভিক্খু…পে… সেয্যথাপি, ভিক্খৱে, অচিৰৱতী নদী সমুদ্দনিন্না সমুদ্দপোণা সমুদ্দপব্ভাৰা; এৱমেৱ খো, ভিক্খৱে, ভিক্খু…পে… সেয্যথাপি, ভিক্খৱে, সৰভূ নদী সমুদ্দনিন্না সমুদ্দপোণা সমুদ্দপব্ভাৰা; এৱমেৱ খো, ভিক্খৱে, ভিক্খু…পে… সেয্যথাপি, ভিক্খৱে, মহী নদী সমুদ্দনিন্না সমুদ্দপোণা সমুদ্দপব্ভাৰা; এৱমেৱ খো, ভিক্খৱে, ভিক্খু…পে… সেয্যথাপি, ভিক্খৱে, যা কাচিমা মহানদিযো, সেয্যথিদং – গঙ্গা, যমুনা, অচিৰৱতী, সৰভূ, মহী, সব্বা তা সমুদ্দনিন্না সমুদ্দপোণা সমুদ্দপব্ভাৰা; এৱমেৱ খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো নিব্বাননিন্নো হোতি নিব্বানপোণো নিব্বানপব্ভাৰো. কথঞ্চ, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো নিব্বাননিন্নো হোতি নিব্বানপোণো নিব্বানপব্ভাৰো? ইধ, ভিক্খৱে, ভিক্খু সম্মাদিট্ঠিং ভাৱেতি অমতোগধং অমতপৰাযনং অমতপৰিযোসানং…পে… সম্মাসমাধিং ভাৱেতি অমতোগধং অমতপৰাযনং অমতপৰিযোসানং. এৱং খো, ভিক্খৱে, ভিক্খু অৰিযং অট্ঠঙ্গিকং মগ্গং ভাৱেন্তো অৰিযং অট্ঠঙ্গিকং মগ্গং বহুলীকৰোন্তো নিব্বাননিন্নো হোতি নিব্বানপোণো নিব্বানপব্ভাৰো’’তি. ছট্ঠং.

(অমতোগধদ্ৱাদসকী ততিযকী).