১. পঠমৱগ্গো

১. কাযগতাসতিসুত্তং

৩৬৬. সাৱত্থিনিদানং. ‘‘অসঙ্খতঞ্চ ৱো, ভিক্খৱে, দেসেস্সামি অসঙ্খতগামিঞ্চ মগ্গং. তং সুণাথ. কতমঞ্চ, ভিক্খৱে, অসঙ্খতং? যো, ভিক্খৱে, ৰাগক্খযো দোসক্খযো মোহক্খযো – ইদং ৱুচ্চতি, ভিক্খৱে, অসঙ্খতং. কতমো চ, ভিক্খৱে, অসঙ্খতগামিমগ্গো? কাযগতাসতি. অযং ৱুচ্চতি, ভিক্খৱে, অসঙ্খতগামিমগ্গো’’.

‘‘ইতি খো, ভিক্খৱে, দেসিতং ৱো মযা অসঙ্খতং, দেসিতো অসঙ্খতগামিমগ্গো. যং, ভিক্খৱে, সত্থাৰা কৰণীযং সাৱকানং হিতেসিনা অনুকম্পকেন অনুকম্পং উপাদায, কতং ৱো তং মযা. এতানি, ভিক্খৱে, ৰুক্খমূলানি, এতানি সুঞ্ঞাগাৰানি. ঝাযথ [নিজ্ঝাযথ (ক.)], ভিক্খৱে, মা পমাদত্থ; মা পচ্ছা ৱিপ্পটিসাৰিনো অহুৱত্থ. অযং ৱো অম্হাকং অনুসাসনী’’তি. পঠমং.

২. সমথৱিপস্সনাসুত্তং

৩৬৭. ‘‘অসঙ্খতঞ্চ ৱো, ভিক্খৱে, দেসেস্সামি অসঙ্খতগামিঞ্চ মগ্গং. তং সুণাথ. কতমঞ্চ, ভিক্খৱে, অসঙ্খতং? যো, ভিক্খৱে, ৰাগক্খযো দোসক্খযো মোহক্খযো – ইদং ৱুচ্চতি, ভিক্খৱে, অসঙ্খতং. কতমো চ, ভিক্খৱে, অসঙ্খতগামিমগ্গো? সমথো চ ৱিপস্সনা চ. অযং ৱুচ্চতি, ভিক্খৱে, অসঙ্খতগামিমগ্গো…পে…. দুতিযং.

৩. সৱিতক্কসৱিচাৰসুত্তং

৩৬৮. ‘‘কতমো চ, ভিক্খৱে, অসঙ্খতগামিমগ্গো? সৱিতক্কসৱিচাৰো সমাধি, অৱিতক্কৱিচাৰমত্তো সমাধি, অৱিতক্কঅৱিচাৰো সমাধি – অযং ৱুচ্চতি, ভিক্খৱে, অসঙ্খতগামিমগ্গো…পে…. ততিযং.

৪. সুঞ্ঞতসমাধিসুত্তং

৩৬৯. ‘‘কতমো চ, ভিক্খৱে, অসঙ্খতগামিমগ্গো? সুঞ্ঞতো সমাধি, অনিমিত্তো সমাধি, অপ্পণিহিতো সমাধি – অযং ৱুচ্চতি, ভিক্খৱে, অসঙ্খতগামিমগ্গো…পে…. চতুত্থং.

৫. সতিপট্ঠানসুত্তং

৩৭০. ‘‘কতমো চ, ভিক্খৱে, অসঙ্খতগামিমগ্গো? চত্তাৰো সতিপট্ঠানা. অযং ৱুচ্চতি, ভিক্খৱে, অসঙ্খতগামিমগ্গো…পে…. পঞ্চমং.

৬. সম্মপ্পধানসুত্তং

৩৭১. ‘‘কতমো চ, ভিক্খৱে, অসঙ্খতগামিমগ্গো? চত্তাৰো সম্মপ্পধানা. অযং ৱুচ্চতি, ভিক্খৱে, অসঙ্খতগামিমগ্গো…পে…. ছট্ঠং.

৭. ইদ্ধিপাদসুত্তং

৩৭২. ‘‘কতমো চ, ভিক্খৱে, অসঙ্খতগামিমগ্গো? চত্তাৰো ইদ্ধিপাদা. অযং ৱুচ্চতি, ভিক্খৱে, অসঙ্খতগামিমগ্গো…পে…. সত্তমং.

৮. ইন্দ্ৰিযসুত্তং

৩৭৩. ‘‘কতমো চ, ভিক্খৱে, অসঙ্খতগামিমগ্গো? পঞ্চিন্দ্ৰিযানি. অযং ৱুচ্চতি, ভিক্খৱে, অসঙ্খতগামিমগ্গো…পে…. অট্ঠমং.

৯. বলসুত্তং

৩৭৪. ‘‘কতমো চ, ভিক্খৱে, অসঙ্খতগামিমগ্গো? পঞ্চ বলানি. অযং ৱুচ্চতি, ভিক্খৱে, অসঙ্খতগামিমগ্গো…পে…. নৱমং.

১০. বোজ্ঝঙ্গসুত্তং

৩৭৫. ‘‘কতমো চ, ভিক্খৱে, অসঙ্খতগামিমগ্গো? সত্ত বোজ্ঝঙ্গা. অযং ৱুচ্চতি, ভিক্খৱে, অসঙ্খতগামিমগ্গো…পে…. দসমং.

১১. মগ্গঙ্গসুত্তং

৩৭৬. ‘‘কতমো চ, ভিক্খৱে, অসঙ্খতগামিমগ্গো? অৰিযো অট্ঠঙ্গিকো মগ্গো. অযং ৱুচ্চতি, ভিক্খৱে, অসঙ্খতগামিমগ্গো. ইতি খো, ভিক্খৱে, দেসিতং ৱো মযা অসঙ্খতং, দেসিতো অসঙ্খতগামিমগ্গো. যং, ভিক্খৱে, সত্থাৰা কৰণীযং সাৱকানং হিতেসিনা অনুকম্পকেন অনুকম্পং উপাদায কতং ৱো তং মযা. এতানি, ভিক্খৱে, ৰুক্খমূলানি, এতানি সুঞ্ঞাগাৰানি. ঝাযথ, ভিক্খৱে, মা পমাদত্থ; মা পচ্ছা ৱিপ্পটিসাৰিনো অহুৱত্থ. অযং ৱো অম্হাকং অনুসাসনী’’তি. একাদসমং.

পঠমো ৱগ্গো.

তস্সুদ্দানং –

কাযো সমথো সৱিতক্কো, সুঞ্ঞতো সতিপট্ঠানা;

সম্মপ্পধানা ইদ্ধিপাদা, ইন্দ্ৰিযবলবোজ্ঝঙ্গা;

মগ্গেন একাদসমং, তস্সুদ্দানং পৱুচ্চতি.