১. সামণ্ডকসুত্তং

৩৩০. একং সমযং আযস্মা সাৰিপুত্তো ৱজ্জীসু ৱিহৰতি উক্কচেলাযং গঙ্গায নদিযা তীৰে. অথ খো সামণ্ডকো [সামণ্ডকানি (সী.)] পৰিব্বাজকো যেনাযস্মা সাৰিপুত্তো তেনুপসঙ্কমি; উপসঙ্কমিত্ৱা আযস্মতা সাৰিপুত্তেন সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নো খো সামণ্ডকো পৰিব্বাজকো আযস্মন্তং সাৰিপুত্তং এতদৱোচ –

‘‘‘নিব্বানং, নিব্বান’ন্তি, আৱুসো সাৰিপুত্ত, ৱুচ্চতি. কতমং নু খো, আৱুসো, নিব্বান’’ন্তি? ‘‘যো খো, আৱুসো, ৰাগক্খযো দোসক্খযো মোহক্খযো – ইদং ৱুচ্চতি নিব্বান’’ন্তি. ‘‘অত্থি পনাৱুসো, মগ্গো অত্থি পটিপদা, এতস্স নিব্বানস্স সচ্ছিকিৰিযাযা’’তি? ‘‘অত্থি খো, আৱুসো, মগ্গো অত্থি পটিপদা, এতস্স নিব্বানস্স সচ্ছিকিৰিযাযা’’তি.

‘‘কতমো পনাৱুসো, মগ্গো কতমা পটিপদা এতস্স নিব্বানস্স সচ্ছিকিৰিযাযা’’তি? ‘‘অযমেৱ খো, আৱুসো, অৰিযো অট্ঠঙ্গিকো মগ্গো, এতস্স নিব্বানস্স সচ্ছিকিৰিযায, সেয্যথিদং – সম্মাদিট্ঠি সম্মাসঙ্কপ্পো সম্মাৱাচা সম্মাকম্মন্তো সম্মাআজীৱো সম্মাৱাযামো সম্মাসতি সম্মাসমাধি. অযং খো, আৱুসো, মগ্গো অযং পটিপদা, এতস্স নিব্বানস্স সচ্ছিকিৰিযাযা’’তি. ‘‘ভদ্দকো, আৱুসো, মগ্গো ভদ্দিকা পটিপদা, এতস্স নিব্বানস্স সচ্ছিকিৰিযায. অলঞ্চ পনাৱুসো সাৰিপুত্ত, অপ্পমাদাযা’’তি. পঠমং.

(যথা জম্বুখাদকসংযুত্তং, তথা ৱিত্থাৰেতব্বং).