৬. চতুত্থউপোসথসুত্তং

৩৪৭. সাৱত্থিনিদানং. একমন্তং নিসিন্নো খো সো ভিক্খু ভগৱন্তং এতদৱোচ – ‘‘কো নু খো, ভন্তে, হেতু, কো পচ্চযো, যেন মিধেকচ্চে ওপপাতিকা নাগা উপোসথং উপৱসন্তি ৱোস্সট্ঠকাযা চ ভৱন্তী’’তি?

‘‘ইধ, ভিক্খু, একচ্চানং ওপপাতিকানং নাগানং এৱং হোতি – ‘মযং খো পুব্বে কাযেন দ্ৱযকাৰিনো অহুম্হ, ৱাচায দ্ৱযকাৰিনো, মনসা দ্ৱযকাৰিনো. তে মযং কাযেন দ্ৱযকাৰিনো, ৱাচায দ্ৱযকাৰিনো, মনসা দ্ৱযকাৰিনো, কাযস্স ভেদা পৰং মৰণা ওপপাতিকানং নাগানং সহব্যতং উপপন্না. সচজ্জ মযং কাযেন সুচৰিতং চৰেয্যাম, ৱাচায… মনসা সুচৰিতং চৰেয্যাম, এৱং মযং কাযস্স ভেদা পৰং মৰণা সুগতিং সগ্গং লোকং উপপজ্জেয্যাম. হন্দ, মযং এতৰহি কাযেন সুচৰিতং চৰাম, ৱাচায… মনসা সুচৰিতং চৰামা’তি. অযং খো, ভিক্খু, হেতু, অযং পচ্চযো, যেন মিধেকচ্চে ওপপাতিকা নাগা উপোসথং উপৱসন্তি ৱোস্সট্ঠকাযা চ ভৱন্তী’’তি. ছট্ঠং.