১. চক্খুসুত্তং

৩২২. সাৱত্থিনিদানং. ‘‘যো, ভিক্খৱে, চক্খুস্মিং ছন্দৰাগো, চিত্তস্সেসো উপক্কিলেসো. যো সোতস্মিং ছন্দৰাগো, চিত্তস্সেসো উপক্কিলেসো. যো ঘানস্মিং ছন্দৰাগো, চিত্তস্সেসো উপক্কিলেসো. যো জিৱ্হায ছন্দৰাগো, চিত্তস্সেসো উপক্কিলেসো. যো কাযস্মিং ছন্দৰাগো, চিত্তস্সেসো উপক্কিলেসো. যো মনস্মিং ছন্দৰাগো, চিত্তস্সেসো উপক্কিলেসো. যতো খো, ভিক্খৱে, ভিক্খুনো ইমেসু ছসু ঠানেসু চেতসো উপক্কিলেসো পহীনো হোতি, নেক্খম্মনিন্নঞ্চস্স চিত্তং হোতি. নেক্খম্মপৰিভাৱিতং চিত্তং কম্মনিযং খাযতি, অভিঞ্ঞা সচ্ছিকৰণীযেসু ধম্মেসূ’’তি. পঠমং.