৫. উপ্পাদসংযুত্তং

১. চক্খুসুত্তং

৩১২. সাৱত্থিনিদানং. ‘‘যো খো, ভিক্খৱে, চক্খুস্স উপ্পাদো ঠিতি অভিনিব্বত্তি পাতুভাৱো, দুক্খস্সেসো উপ্পাদো, ৰোগানং ঠিতি, জৰামৰণস্স পাতুভাৱো. যো সোতস্স উপ্পাদো ঠিতি…পে… যো ঘানস্স উপ্পাদো ঠিতি… যো জিৱ্হায উপ্পাদো ঠিতি… যো কাযস্স উপ্পাদো ঠিতি… যো মনস্স উপ্পাদো ঠিতি অভিনিব্বত্তি পাতুভাৱো, দুক্খস্সেসো উপ্পাদো, ৰোগানং ঠিতি, জৰামৰণস্স পাতুভাৱো. যো চ, ভিক্খৱে, চক্খুস্স নিৰোধো ৱূপসমো অত্থঙ্গমো, দুক্খস্সেসো নিৰোধো, ৰোগানং ৱূপসমো, জৰামৰণস্স অত্থঙ্গমো. যো সোতস্স নিৰোধো…পে… যো ঘানস্স নিৰোধো… যো জিৱ্হায নিৰোধো… যো কাযস্স নিৰোধো… যো মনস্স নিৰোধো ৱূপসমো অত্থঙ্গমো, দুক্খস্সেসো নিৰোধো, ৰোগানং ৱূপসমো, জৰামৰণস্স অত্থঙ্গমো’’তি. পঠমং.

২. ৰূপসুত্তং

৩১৩. সাৱত্থিনিদানং. ‘‘যো খো, ভিক্খৱে, ৰূপানং উপ্পাদো ঠিতি অভিনিব্বত্তি পাতুভাৱো, দুক্খস্সেসো উপ্পাদো, ৰোগানং ঠিতি, জৰামৰণস্স পাতুভাৱো. যো সদ্দানং… যো গন্ধানং… যো ৰসানং… যো ফোট্ঠব্বানং… যো ধম্মানং উপ্পাদো ঠিতি অভিনিব্বত্তি পাতুভাৱো, দুক্খস্সেসো উপ্পাদো, ৰোগানং ঠিতি, জৰামৰণস্স পাতুভাৱো. যো চ খো, ভিক্খৱে, ৰূপানং নিৰোধো ৱূপসমো অত্থঙ্গমো, দুক্খস্সেসো নিৰোধো, ৰোগানং ৱূপসমো, জৰামৰণস্স অত্থঙ্গমো. যো সদ্দানং… যো গন্ধানং… যো ৰসানং… যো ফোট্ঠব্বানং… যো ধম্মানং নিৰোধো ৱূপসমো অত্থঙ্গমো, দুক্খস্সেসো নিৰোধো, ৰোগানং ৱূপসমো, জৰামৰণস্স অত্থঙ্গমো’’তি. দুতিযং.

৩. ৱিঞ্ঞাণসুত্তং

৩১৪. সাৱত্থিনিদানং. ‘‘যো খো, ভিক্খৱে, চক্খুৱিঞ্ঞাণস্স উপ্পাদো ঠিতি…পে… জৰামৰণস্স পাতুভাৱো…পে… যো মনোৱিঞ্ঞাণস্স উপ্পাদো ঠিতি…পে… জৰামৰণস্স পাতুভাৱো. যো চ খো, ভিক্খৱে, চক্খুৱিঞ্ঞাণস্স নিৰোধো…পে… জৰামৰণস্স অত্থঙ্গমো…পে… যো মনোৱিঞ্ঞাণস্স নিৰোধো…পে… জৰামৰণস্স অত্থঙ্গমো’’তি. ততিযং.

৪. সম্ফস্সসুত্তং

৩১৫. সাৱত্থিনিদানং. ‘‘যো খো, ভিক্খৱে, চক্খুসম্ফস্সস্স উপ্পাদো ঠিতি…পে… জৰামৰণস্স পাতুভাৱো…পে… যো মনোসম্ফস্সস্স উপ্পাদো ঠিতি…পে… জৰামৰণস্স পাতুভাৱো. যো চ খো, ভিক্খৱে, চক্খুসম্ফস্সস্স নিৰোধো…পে… জৰামৰণস্স অত্থঙ্গমো…পে… যো মনোসম্ফস্সস্স নিৰোধো…পে… জৰামৰণস্স অত্থঙ্গমো’’তি. চতুত্থং.

৫. সম্ফস্সজসুত্তং

৩১৬. সাৱত্থিনিদানং. ‘‘যো খো, ভিক্খৱে, চক্খুসম্ফস্সজায ৱেদনায উপ্পাদো ঠিতি…পে… জৰামৰণস্স পাতুভাৱো…পে….

যো মনোসম্ফস্সজায ৱেদনায উপ্পাদো ঠিতি…পে… জৰামৰণস্স পাতুভাৱো. যো চ খো, ভিক্খৱে, চক্খুসম্ফস্সজায ৱেদনায নিৰোধো ৱূপসমো…পে… জৰামৰণস্স অত্থঙ্গমো…পে… যো মনোসম্ফস্সজায ৱেদনায নিৰোধো ৱূপসমো অত্থঙ্গমো, দুক্খস্সেসো নিৰোধো, ৰোগানং ৱূপসমো, জৰামৰণস্স অত্থঙ্গমো’’তি. পঞ্চমং.

৬. সঞ্ঞাসুত্তং

৩১৭. সাৱত্থিনিদানং. ‘‘যো খো, ভিক্খৱে, ৰূপসঞ্ঞায উপ্পাদো ঠিতি…পে… জৰামৰণস্স পাতুভাৱো…পে… যো ধম্মসঞ্ঞায উপ্পাদো ঠিতি অভিনিব্বত্তি পাতুভাৱো, দুক্খস্সেসো উপ্পাদো, ৰোগানং ঠিতি, জৰামৰণস্স পাতুভাৱো. যো চ খো, ভিক্খৱে, ৰূপসঞ্ঞায নিৰোধো…পে… জৰামৰণস্স অত্থঙ্গমো…পে… যো ধম্মসঞ্ঞায নিৰোধো ৱূপসমো অত্থঙ্গমো, দুক্খস্সেসো নিৰোধো, ৰোগানং ৱূপসমো, জৰামৰণস্স অত্থঙ্গমো’’তি. ছট্ঠং.

৭. সঞ্চেতনাসুত্তং

৩১৮. সাৱত্থিনিদানং. ‘‘যো খো, ভিক্খৱে, ৰূপসঞ্চেতনায উপ্পাদো ঠিতি…পে… জৰামৰণস্স পাতুভাৱো…পে… যো ধম্মসঞ্চেতনায উপ্পাদো ঠিতি অভিনিব্বত্তি পাতুভাৱো, দুক্খস্সেসো উপ্পাদো, ৰোগানং ঠিতি, জৰামৰণস্স পাতুভাৱো. যো চ খো, ভিক্খৱে, ৰূপসঞ্চেতনায নিৰোধো…পে… জৰামৰণস্স অত্থঙ্গমো…পে… যো ধম্মসঞ্চেতনায নিৰোধো ৱূপসমো অত্থঙ্গমো, দুক্খস্সেসো নিৰোধো, ৰোগানং ৱূপসমো, জৰামৰণস্স অত্থঙ্গমো’’তি. সত্তমং.

৮. তণ্হাসুত্তং

৩১৯. সাৱত্থিনিদানং. ‘‘যো খো, ভিক্খৱে, ৰূপতণ্হায উপ্পাদো ঠিতি…পে… জৰামৰণস্স পাতুভাৱো…পে… যো ধম্মতণ্হায উপ্পাদো ঠিতি অভিনিব্বত্তি পাতুভাৱো, দুক্খস্সেসো উপ্পাদো, ৰোগানং ঠিতি, জৰামৰণস্স পাতুভাৱো. যো চ খো, ভিক্খৱে, ৰূপতণ্হায নিৰোধো…পে… জৰামৰণস্স অত্থঙ্গমো…পে… যো ধম্মতণ্হায নিৰোধো ৱূপসমো অত্থঙ্গমো, দুক্খস্সেসো নিৰোধো, ৰোগানং ৱূপসমো, জৰামৰণস্স অত্থঙ্গমো’’তি. অট্ঠমং.

৯. ধাতুসুত্তং

৩২০. সাৱত্থিনিদানং. ‘‘যো খো, ভিক্খৱে, পথৱীধাতুযা উপ্পাদো ঠিতি অভিনিব্বত্তি পাতুভাৱো…পে… জৰামৰণস্স পাতুভাৱো; যো আপোধাতুযা… যো তেজোধাতুযা… যো ৱাযোধাতুযা… যো আকাসধাতুযা… যো ৱিঞ্ঞাণধাতুযা উপ্পাদো ঠিতি অভিনিব্বত্তি পাতুভাৱো, দুক্খস্সেসো উপ্পাদো, ৰোগানং ঠিতি, জৰামৰণস্স পাতুভাৱো. যো চ খো, ভিক্খৱে, পথৱীধাতুযা নিৰোধো…পে… জৰামৰণস্স অত্থঙ্গমো; যো আপোধাতুযা নিৰোধো… যো তেজোধাতুযা নিৰোধো… যো ৱাযোধাতুযা নিৰোধো… যো আকাসধাতুযা নিৰোধো… যো ৱিঞ্ঞাণধাতুযা নিৰোধো ৱূপসমো অত্থঙ্গমো, দুক্খস্সেসো নিৰোধো, ৰোগানং ৱূপসমো, জৰামৰণস্স অত্থঙ্গমো’’তি. নৱমং.

১০. খন্ধসুত্তং

৩২১. সাৱত্থিনিদানং. ‘‘যো খো, ভিক্খৱে, ৰূপস্স উপ্পাদো ঠিতি অভিনিব্বত্তি পাতুভাৱো, দুক্খস্সেসো উপ্পাদো, ৰোগানং ঠিতি, জৰামৰণস্স পাতুভাৱো. যো ৱেদনায… যো সঞ্ঞায… যো সঙ্খাৰানং… যো ৱিঞ্ঞাণস্স উপ্পাদো ঠিতি অভিনিব্বত্তি পাতুভাৱো, দুক্খস্সেসো উপ্পাদো, ৰোগানং ঠিতি, জৰামৰণস্স পাতুভাৱো. যো চ খো, ভিক্খৱে, ৰূপস্স নিৰোধো ৱূপসমো অত্থঙ্গমো, দুক্খস্সেসো নিৰোধো, ৰোগানং ৱূপসমো, জৰামৰণস্স অত্থঙ্গমো. যো ৱেদনায… যো সঞ্ঞায… যো সঙ্খাৰানং… যো ৱিঞ্ঞাণস্স নিৰোধো ৱূপসমো অত্থঙ্গমো, দুক্খস্সেসো নিৰোধো, ৰোগানং ৱূপসমো, জৰামৰণস্স অত্থঙ্গমো’’তি. দসমং.

উপ্পাদসংযুত্তং সমত্তং.