১. চক্খুসুত্তং

৩০২. সাৱত্থিনিদানং. ‘‘চক্খুং, ভিক্খৱে, অনিচ্চং ৱিপৰিণামি অঞ্ঞথাভাৱি; সোতং অনিচ্চং ৱিপৰিণামি অঞ্ঞথাভাৱি; ঘানং অনিচ্চং ৱিপৰিণামি অঞ্ঞথাভাৱি; জিৱ্হা অনিচ্চা ৱিপৰিণামী অঞ্ঞথাভাৱী [ৱিপৰিণামিনী অঞ্ঞথাভাৱিনী (?)]; কাযো অনিচ্চো ৱিপৰিণামী অঞ্ঞথাভাৱী; মনো অনিচ্চো ৱিপৰিণামী অঞ্ঞথাভাৱী. যো, ভিক্খৱে, ইমে ধম্মে এৱং সদ্দহতি অধিমুচ্চতি – অযং ৱুচ্চতি সদ্ধানুসাৰী, ওক্কন্তো সম্মত্তনিযামং, সপ্পুৰিসভূমিং ওক্কন্তো, ৱীতিৱত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৱা নিৰযং ৱা তিৰচ্ছানযোনিং ৱা পেত্তিৱিসযং ৱা উপপজ্জেয্য; অভব্বো চ [অভব্বোৱ (সী. স্যা. কং.)] তাৱ কালং কাতুং যাৱ ন সোতাপত্তিফলং সচ্ছিকৰোতি’’.

‘‘যস্স খো, ভিক্খৱে, ইমে ধম্মা এৱং পঞ্ঞায মত্তসো নিজ্ঝানং খমন্তি, অযং ৱুচ্চতি – ‘ধম্মানুসাৰী, ওক্কন্তো সম্মত্তনিযামং, সপ্পুৰিসভূমিং ওক্কন্তো, ৱীতিৱত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৱা নিৰযং ৱা তিৰচ্ছানযোনিং ৱা পেত্তিৱিসযং ৱা উপপজ্জেয্য; অভব্বো চ তাৱ কালং কাতুং যাৱ ন সোতাপত্তিফলং সচ্ছিকৰোতি’. যো, ভিক্খৱে, ইমে ধম্মে এৱং পজানাতি এৱং পস্সতি, অযং ৱুচ্চতি – ‘সোতাপন্নো অৱিনিপাতধম্মো নিযতো সম্বোধিপৰাযনো’’’তি. পঠমং.