২. ৰূপসুত্তং

৩০৩. সাৱত্থিনিদানং. ‘‘ৰূপা, ভিক্খৱে, অনিচ্চা ৱিপৰিণামিনো অঞ্ঞথাভাৱিনো; সদ্দা অনিচ্চা ৱিপৰিণামিনো অঞ্ঞথাভাৱিনো; গন্ধা অনিচ্চা ৱিপৰিণামিনো অঞ্ঞথাভাৱিনো; ৰসা অনিচ্চা ৱিপৰিণামিনো অঞ্ঞথাভাৱিনো; ফোট্ঠব্বা অনিচ্চা ৱিপৰিণামিনো অঞ্ঞথাভাৱিনো; ধম্মা অনিচ্চা ৱিপৰিণামিনো অঞ্ঞথাভাৱিনো. যো, ভিক্খৱে, ইমে ধম্মে এৱং সদ্দহতি অধিমুচ্চতি, অযং ৱুচ্চতি সদ্ধানুসাৰী, ওক্কন্তো সম্মত্তনিযামং, সপ্পুৰিসভূমিং ওক্কন্তো, ৱীতিৱত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৱা নিৰযং ৱা তিৰচ্ছানযোনিং ৱা পেত্তিৱিসযং ৱা উপপজ্জেয্য; অভব্বো চ তাৱ কালং কাতুং যাৱ ন সোতাপত্তিফলং সচ্ছিকৰোতি’’.

‘‘যস্স খো, ভিক্খৱে, ইমে ধম্মা এৱং পঞ্ঞায মত্তসো নিজ্ঝানং খমন্তি, অযং ৱুচ্চতি – ‘ধম্মানুসাৰী, ওক্কন্তো সম্মত্তনিযামং, সপ্পুৰিসভূমিং ওক্কন্তো, ৱীতিৱত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৱা নিৰযং ৱা তিৰচ্ছানযোনিং ৱা পেত্তিৱিসযং ৱা উপপজ্জেয্য; অভব্বো চ তাৱ কালং কাতুং যাৱ ন সোতাপত্তিফলং সচ্ছিকৰোতি’. যো, ভিক্খৱে, ইমে ধম্মে এৱং পজানাতি এৱং পস্সতি, অযং ৱুচ্চতি – ‘সোতাপন্নো অৱিনিপাতধম্মো নিযতো সম্বোধিপৰাযনো’’’তি. দুতিযং.