১. ৰূপঅঞ্ঞাণসুত্তং

৬০৭. একং সমযং ভগৱা সাৱত্থিযং ৱিহৰতি জেতৱনে অনাথপিণ্ডিকস্স আৰামে. অথ খো ৱচ্ছগোত্তো পৰিব্বাজকো যেন ভগৱা তেনুপসঙ্কমি; উপসঙ্কমিত্ৱা ভগৱতা সদ্ধিং সম্মোদি. সম্মোদনীযং কথং সাৰণীযং ৱীতিসাৰেত্ৱা একমন্তং নিসীদি. একমন্তং নিসিন্নো খো ৱচ্ছগোত্তো পৰিব্বাজকো ভগৱন্তং এতদৱোচ – ‘‘কো নু খো, ভো গোতম, হেতু, কো পচ্চযো, যানিমানি [যেনিমানি (?)] অনেকৱিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৱা, অসস্সতো লোকোতি ৱা, অন্তৱা লোকোতি ৱা, অনন্তৱা লোকোতি ৱা, তং জীৱং তং সৰীৰন্তি ৱা, অঞ্ঞং জীৱং অঞ্ঞং সৰীৰন্তি ৱা, হোতি তথাগতো পৰং মৰণাতি ৱা, ন হোতি তথাগতো পৰং মৰণাতি ৱা, হোতি চ ন চ হোতি তথাগতো পৰং মৰণাতি ৱা, নেৱ হোতি ন ন হোতি তথাগতো পৰং মৰণাতি ৱা’’তি? ‘‘ৰূপে খো, ৱচ্ছ, অঞ্ঞাণা, ৰূপসমুদযে অঞ্ঞাণা, ৰূপনিৰোধে অঞ্ঞাণা, ৰূপনিৰোধগামিনিযা পটিপদায অঞ্ঞাণা; এৱমিমানি অনেকৱিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৱা…পে… নেৱ হোতি ন ন হোতি তথাগতো পৰং মৰণাতি ৱাতি. অযং খো, ৱচ্ছ, হেতু, অযং পচ্চযো, যানিমানি [যেন (সী.), যেনিমানি (?)] অনেকৱিহিতানি দিট্ঠিগতানি লোকে উপ্পজ্জন্তি – সস্সতো লোকোতি ৱা, অসস্সতো লোকোতি ৱা…পে… নেৱ হোতি ন ন হোতি তথাগতো পৰং মৰণাতি ৱা’’তি. পঠমং.